السلام عليكم

عندي استفسار منكم يا أهل الخبرة. سالفة الموضع عندي صني ٢٠١٦ وبدأت اسمع صوت صفير وقت ما امسك فرامل وقلت يمكن الفحمات تحتاج تغيير كون السيارة لسه ماشية على فحمات الوكالة بعد ممر ٨ سنين وقطع مسافة ٨٥٠٠٠ كم. المهم دورت على ورشة فرامل في جوجل وطلع لي واحد تقييماته عالية ومختص بالفرامل. قلت ممتاز ورحت له. الرجال شيك عليها وقال لي الفحمات لسه باقي لها عمر بس تحتاج صنفرة بس الهوبات تحتاج خرط. قلت اكيد، قال اكيد.

وده الهوبات عند ورشة ثانية خلفه وصنفر الفحمات ثم رجع ركبهم وقال لي جرب السيارة. جربت السيارة حولين الورشة وحسيت ان الفرامل صارت أضعف شوي عن أول، قال امشي فيها يومين وتتحسن.

لاحظت في صوت حك حديد ، مو صفير زي اول، لما امسك فرامل. والصوت يشد اذا لفيت على اليسار. رجعت له بعد المغرب وقلت له السالفة، يقولي لا شغلي ممتاز ومافي مشكلة. معروف ان يكون صوت بعد تغيير الفحمات وتروح بعد ما تمشي بالسيارة. قلت له تعال اركب معاي واسمع بنفسك.

والله العظيم اول ما ركب السيارة ومشينا ما نسمع اي صوت، ما ادري عشان الزحمة وأصوات السيارات الثانية وحقون الورش ولا ايش بس الصوت يا دوبه ينسمع. لما قلت له عن صوت مع لفة الدركسون لليسار، يقول هذا صوت العكس، معروف. العكس ما كان له صوت قبل ما اجي عندك، يقول ما تدري، جاء وقته.

رجعنا الورشة ورش من بخاخ الايسي ديلكو وقال امشي بالسيارة والصوت راح يختفي.

اليوم اللي بعده، من جد الصوت خف بكثير، وقلت الحمدلله الأمور تمام وان شاء الله حتختفي كليا.

اليوم رجع الصوت بكل قوته. وديت السيارة عند العضيب وشيك وركب السيارة واخذنا لفة والصوت واضح. قالوا لي ان خرط الهوبات تعبان. ويحتاج خرط من جديد.

الميكانيكي الاول اللي اشتغل على السيارة حيجي الورشة بعد العشاء وناوي اروح استرجع فلوسي منه واودي السيارة لورشة ثانية يزبطوا لي الفرامل. سؤالي كيف اتعامل معه؟ ما ابغى اغلط على احد، كلنا ناس وكلنا نخطىء. بس ما ابغى حقي يضيع. وايش تنصحوني، اغير الفحمات مرة واحد بالرغم ان لسه الفحمات فيها عمر؟

وشكرا لكم مقدما.