صعب جدا تحصل احد يقبل بهالشروط، طبعا اشوف من حقك تشرط اللي تبغى بس تكون واضح من الخطبه، ما تروح تتشرط بعدين

بالنسبة لي اذا هي موظفة وشايله مصاريف نفسها كثر خيرها .. كافي جدا

عشر ساعات برا البيت اقل شيء تسويه هو انها تشيل نفسها ولا وش فايدة الوظيفة؟


صعب اكيد مثل القيادة للمرأة والتعليم والعمل المختلط
مع الوقت صار عادي وطبيعي جدا

الموضوع سهل جداً

المفروض يكون خيارك الاول غير موظفة بكل بساطة وتجلس معاها من اول يوم خطبة و تقولها يا بنت الناس انا امكانياتي المادية كذا يناسبك نكمل ما يناسبك مع السلامة وانتي مسؤولة مني وانا ابي اشوفك كل يوم في البيت لا وظيفة ولا غيرة

خيارك الثاني موظفة(عانس) حسب ما يسميها المجتمع هذي بتكون اقل شروط و اقل طلبات و قدها صحصحت ودرت ان حكي مبزرة النت ما يفيدها و شافت من محيطها ان الفكر النسوي ضيع نساء و عوائل كثير لذلك بتكون افضل بالتعامل من الصغيرة

هذا اذا انت لازم تاخذ سعودية

اذا خيار الاجنبية متاح وضعك يختلف كلياً من ناحية المصاريف



الكلام هذا كله لو انت ملزم على زوجة من سكان المدن الكبيرة و عندك شروط كثيرة

لو تدور زين بتحصل عاقلات من 18 وحلمها تأسس عائلة مع رجل ميسور يخاف الله فيها

بس طبعاً مافيه احد كامل بالدنيا كل وحده بينقصها شي في نظرك دائماً لذلك انت احسبها صح و تنازل عن الاشياء الي صدق مو مهمه خصوصاً بعد 10 او 20 سنة (يعني مثلاً شديدة الجمال هذا الشي بيروح مع العمر لو سلمت من اي شي مفاجئ مصيرها تكبر و يتغير شكلها) لكن العاقلة و جمالها عادي هذي كل ما يزيد فيها العمر بتزيد عقل و نضج و وعي و بترتاح معك وانت بترتاح معاها

صحيح اني اتفق مع الشباب في كثير من النقاط بس الواحد لازم يتذكر انك بتاخذها من بيتها معززه مكرمه, انا اشوف اذا تزوجت وحده موظفه فيه اشياء ايجابيه اول شي تقدرون تتفقون بعدين اذا صار عندكم عيال انها تشارك تصرف عليهم وما اتوقع بيرفضون في هذي النقطه. من ناحية اول الزواج وتروح تكلمها لازم نتشارك الصرفية اعتقد اغلب البنات بيرفضون وراح ياخذون موقف سلبي.

بالعكس انا ابيها تكون موظفة عشان تعينني على هذي الدنيا
ابي لا صارت اعمارنا بين ٣٥-٤٠ يكون عندنا بيت واسع
ابي ابناءنا يدرسون بمدارس ممتازة
ابي كل سنة نسافر

بالعكس انا ابيها تكون موظفة عشان تعينني على هذي الدنيا
ابي لا صارت اعمارنا بين ٣٥-٤٠ يكون عندنا بيت واسع
ابي ابناءنا يدرسون بمدارس ممتازة
ابي كل سنة نسافر



باذن الله من قبل الزواج اكلمها عن هالموضوع
هي معززه ببيت ابوها تجلس عند ابوها بالنهاية تكبر بالعمر وتعرف ان فيه اشياء الفلوس ما تجيبها

هل انت مجهز نفسك للأشياء هذي من الحين؟
هل انت تدخر و تستمثر جزء من دخلك ولا تنتظر الين تجي هي تساعدك؟
هل انت تصرف بعقل ولا تركب اي موجة و اي ترند و تشتري الهبه على قولتهم؟
تحب الماركات ؟ تحب السكن في فنادق فخمه بغض النظر عن السعر و المنافسين لمجرد انك سكنت بالفندق الفلاني في سفريتك؟ تحب الاكل في مطاعم سمعتها عاليه بغض النظر عن حلاوة الاكل او حتى تقبلك له لمجرد انك اكلت بالمطعم الفلاني؟
هل انت غارق بالديون بأي شكل كانت مشتريات(تابي وغيرها) فيزا قروض متوسطة الى كبيرة سيارات اي شي؟

فهمت قصدي اتوقع؟

فاهمك
الآن نفرض ان مصاريف معيشتنا 10 آلاف ريال شهريا
بالسنة 120
بعد خمس سنوات بكون صرفت 600 ألف
لكن لو هي تشاركني مثلا أنا دفعت 400 ألف وهي 200 ألف (على مدار خمس سنين) نقدر نشتري ارضين كل ارض ب اطراف المدينة بعد عشر سنوات دبلت قيمتها
او نطلع قروض شخصية ونشتري بهن ارض ب أطراف الرياض (تكون استثمار) وبعد كم سنة نبيعها وكل واحد يأخذ حقه

بالله هالشيء مب احسن من ان الفلوس تضيع على قسط سيارة ولا على خرابيط مالها سنع؟ ولا الزوج المسكين يطلع قرض يقص ٦٥٪؜ من راتبه وبالنهاية يعيشون بسجن (شقة)
ولا هم الي عاشو زي الناس ولا هم الي استثمرو صح



طبعا أنا أتكلم عن الحياة أثناء العمل بعد التقاعد عالم آخر والي ما يفكر لوقت التقاعد غلطان

الله يهديك

تبي الصراحة، لو عندي بنت وتبي تخطبها وهذا منطقك، لا يمكن أزوجك
لأن معيار الزواج الصالح هو البساطة والالتزام بالمبادئ الشرعية البسيطة

نعم أنا متفهم للإشكالات اللي طرحتها، ولكن كونك داخل باستقطاب فكري حاد وبنفسية شخص غاضب من التغير المجتمعي، هذا لا يطمئنني أبدا

بمعنى آخر، أنا أشفق على الزوجة الطيبة اللي ممكن تتدبس معاك واللي تبيها أنت بكل أنانية تشاركك في المصروف ولا تشاركك في شراء المنزل

ليش نطالب الرجال فقط بتطبيق الشرعية؟

انا ريحتها من شراء المنزل
الفلوس الي المفروض تشاركني فيها بالمنزل تقدر تستثمرها او تسوي فيها الي تبي

عارف الأشكالية الي انت فيها للأسف يعني , كذالك و ودك يكون كل شيء بيرفكت ومخطط له بس بالزمن ذا ماراح تسوي 25 بالمئة كذالك نصيحتي ضع شروطك من البداية او دور لك أجنبية هاذا الي جالس اسويه نفسك و قلت لك الدنياء ماتوقف على الي هنا و كل مالهم يكثرون و يكبرون بالعمر وتقل شروطهم لين تقول اهم شيء يصلي :)

خيار الاجنبية ما يناسبني ولا هو حل حلو

الصدق انا اتفهم لو ناقشت مرأة وعارضتني لكن الرجال غريب امرهم مدري المشكلة بي ولا كيف

شوف يا عزيزي
انا رديت من اول على الموضوع
والاخوان هنا بعد ما قصروا

وانت مو راضي تقتنع الا انها تشارك "غصب"

ممكن يكون كلامي قاسي شوي ولا اقصدك انت كشخص
لكن بما انك مو راضي تقتنع لازم اقوله ( الكلام من وجهة نظري انا )

الرجال اللي عينه على فلوس مرته انا في وجهة نظري ماهو رجال.
اذا راح تتزوج عشان تعاونك مرتك في قروضك ومصاريفك انت والبيت ومو قادر تتحمل مصاريف البيت والمعيشة الطيبة لك ولبيتك انصحك ما تتزوج.

انا لو عندي بنت او واحد يبي اختي ويشترط عليها تشاركه المصاريف
طردته من البيت هو واللي معه.

قلتها لك واعيدها واكررها
معظم النساء بطبيعتها عاطفية
وعاطفية جدا
بالمعاملة الحسنة والمحبة والألفة صدقني تعطيك عيونها ولو تبي راتبها كامل تعطي من نفسها بدون ما تحس ولا تحسب.

ابحث عن بنت الحلال الصالحة اللي تسعدك في بيتك
وتربي عيالك التربية الصالحة وتحافظ عليك وعلى بيتك وتستر عليك

والرزق من الله.

كلنا تزوجنا مديونين
وشريت سيارة اقساط
وسكنت مديون
ولازلت مديون

لكن الحياة ماشية يارب لك الحمد
متزوج من 11 سنة
يعلم الله ما طلبتها ريال واحد الا مره وحده عشان اكمل الايجار وقلت ارجعه لك مع الراتب
واعطتني وحلفت ما ارجعه
وهي اللي تقضي للبيت اوقات كثير
وملابسها وملابس الاولاد
مع اني معطيها صرافة واقولها اشتري منها
وتشتري منها اوقات واوقات تشتري هي

خصوصا اخر الشهر مع العلم بطاقتي اللي معها فيها فلوس
تقول لا اخر الشهر اقضي حسب الحاجة ومع الراتب نقضي كويس

آخر مره اشتريت جوال لنفسي كان في 2018
اشتريت اثنين لي ولها
بعدها والله جوالاتي كلها هي اللي تجيبها
فجأه الاقيها شاريته وجابته
العطور نسيت متى آخر مره اشتريت لنفسي عطر
هي تشوف العطور اذا قربت تخلص او فيه مناسبة تشتري لي عطر او عطرين


الحياة الزوجية مشاركة
لكن بالنية الطيبة والمعاملة الحسنة
والتفاهم
من اول يوم وقبل الزواج تقول اشترط عليها تشارك المصاريف
انا أشك ان فيه احد راح يقبل في الكلام هذا
الا اذا كانوا يبون الفكة من البنت

مدري انت صادق ولا

اذا عندك مجرد احساس انك ماتقدر وتبي تشرط عليها تساعدك خلك عزوبي

اسآل الله ان يديم عليكم العشرة الطيبة ويرزقكم اضعافها

لو هي صارت شريكة لي ( الزواج علاقة تشاركية ) الاثنين يساهمون ويستثمرون فيها
وضعنا بيكون احسن

تدري وش مشكلة ردودك وردود الاخوان؟
محد جاوب على تساؤلتي
كلهم يلفون ويدورون حول موضوع الرجولة وانه حنا ما نقبل ولو جا احد يشترط هالشرط ..الخ لكن محد يجاوب

الان هي برا بيتها ٨ ساعات اقل شيء ولاهي لم عيالها او بيتها او زوجها وهذا طبيعي ومتوقع وش المشكلة لو شاركتني بنسبة ٣٠ او ٤٠ بالميه من المصاريف؟
انا ما احتاج عطر ولا جوال انا ودي استقطع من راتبي مبلغ ثابت يروح ل اشياء اهم تساهم فيه نمو العلاقة وهي اكيد بتشوفني كذا وتسوي زيي وراح اساعدها

ي اخوان ترا هدفي نبيل
بعضهم يتزوج ولا يجيب طارئ هالشيء وبعد فترة يهملها ولا يصرف اي ريال وهي تشيل البيت وعيالها وهو يعرس عليها


يعني لاني صريح وواضح محد راح يزوجني؟
والله المجتمع صار غريب
لو تطلع اماكن تجمعات الشباب والبنات بتشوف العجب
ليش؟ بسبب الناس الي للحين بنفس عقليتك ( مع كامل الاحترام والتقدير انت كنت صريح معي وانا بسوي نفس الشيء )
والله مب صحي ابدا الشاب او الشابه يوصلون فوق الثلاثين بدون زواج ومؤشر خطير

انا صادق
والحمدلله اقدر

لكن دامك قريت الموضوع ممكن تقول الاسباب الي تمنع ذلك؟

انا صادق
والحمدلله اقدر

لكن دامك قريت الموضوع ممكن تقول الاسباب الي تمنع ذلك؟

اخوي مع احترامي لك بس اذا هذا منظورك كذا زواجك ماحينجح .. اذا بتتزوج ويكون زواجك ناجح لازم يكون عندك شخصية وتكون قائد ما اتكلم عن موضوع المساعدة بالمصاريف هذي بينكم لكن اقصد تكون قائد مو ضحية انك من البداية توضح امورك .. ولفتني كلامك بانك تقول الدولة سامحه لهم يسوقون ويعملون .. لاحظ هي سمحت مو فرضت يعني منت ملزوم .. تقدر توضح قبل الزواج بالخطبة مثلا انها الاساس تكون ربة منزل وماعندي مشكله مثلا تعمل لكن ماتكون مختلطة مثلا او تكون وظيفة حكومية فقط وغير مختلطة واذا بتشتغل بالتجارة من البيت وانا اساعدها ماعندي مشكله يكون تجاره باي شي تحبه تسويه من البيت .. هنا مثلا حددت اللي يناسبك وهذا حقك تقولهم تقبلوني زي ما انا ولا من البداية اعطوني خبر ان مافيه نصيب .. اذا كلامك انه مسموح القيادة والعمل طبب الطلاق مسموح هل معناته لازم اطلق ؟ لازم الواحد يكون له شخصيه ويختار الشي اللي يناسبه ومايقدم على خطوة مهمه زي الزواج الا هو متاكد ان تفكيرها ودينها واخلاقها تناسبه .. فيه بنات اصيلات وفيه بنات يبغون ويدورون الفلته انت تدعي ربك وتختار وتتحمل مسؤولية قرارك انك عارف وقبلت .. طبعا كلامي هذا بعد ماتكون عرفتها بالخطبة زين وعرفت تفكيرها كونك قبلت بشي عكس اللي متربي عليه هذا شي انت تتحمل عواقبه لانك تنازلت عن رايك وقبلت بشي ماتبغاه ولا يرضيك .. وبرجع لموضوعك الاساسي انا شخصيا عندي قناعه الزوجة ياتكون ربة منزل وما يكون مطلوب منها اي شي ماديا لان بتمون معوضتني داخل البيت .. اما اذا ماهي ربة منزل تساعدني بمصاريف البيت وليس شي شخصي .. كونها الغت انها تكون ربة منزل تعوضها بالمساعده فالبيت يعني يكون لها فايدة على الاسرة .. اما انها تمون موظفة ولا تقوم باي شي من امور البيت ولا تساعد ماديا هذي رايي الشخصي ماتنفع تكون زوجة والرجل مايرضى يتم استغلاله لانك انت قاعد تتعب علشانها وهي مانفعتك يعني باختصار لاربة منزل ولا موظفة وهذا رايي الشخصي ونفس ماوضحت فوق تقدر بالخطبة الناحية هذي توضحها حسب اللي يناسبك انت وتشوف اذا يرضون او لا

الحين ما فيه بنت ما تسوق او هدفها تتوظف بعد الجامعة
وبيني وبينك ذي حقوق والحقوق محد يقدر يمنعها

واذا قارنت الحياة الان بعشر سنين اي رجل يقدم على الزواج ضحية وهذا حكم الزمان عشان تتزوج لازم تتنازل وانا عادي اتنازل عن ما سبق النقاش فيه والمقابل انها تعينني على هذي الدنيا

لا مهو ضحيه الا اذا هو تنازل عن رجولته وسلم رقبته للبنت واهلها .. مثل ما البنت واهلها حريصين على حقوق بنتهم واقل حاجه بسيطة لبنتهم ينبهونك عليها انت كمان من باب اولى تحفظ حقوقك زيهم خصوصا انك انت اللي بتشيل الليله وانت اللي بتتحمل المسؤولية كامله وتكون مسؤول عنها .. لازم توضح وتكون واثق من نفسك بحيث ان لو حقوقك رفضوها ترفضهم مباشره بدون تردد وتشوف غيرهم البيوت ملياااااانه الحين تحصل الف غيرها يتمنون شخص سوي يتزوجهم ومو كل البنات مثل ماتتصور او صورت لك السوشل ميديا انهم لازم يسوقون ويشتغلون فيه اللي همها الاساسي تكون ام وتكون اسره وهذا الطبيعي ومايمنع انها تشتغل بوظيفة تناسب انوثتها بدون مخالطة رجال وتسوق للحاجة والضرورة بس هذا رايي وحذكره لو جيت بخطب وبدون اي خجل نهائيا يقدرون يقبلون ويقدرون يرفضون وتشوف غيرهم انت بالنهاية رجل وتقدر تبحث الف بيت غيرها اذا ماقبلوا الدنيا ماتوقف عليهم ولا على احد غيرهم كل واحد يروح للشي اللي يناسبه وفيه بنات اصلا ماتحب تشتغل وفيه اللي تشتغل وماتبغى مختلط وفيه اللي تبغى اي شي وماتفرق معها .. انت تختار وتحدد اللي يناسبك وهم يقبلون اذا ناسبهم او يرفضون شي راجع لهم