روح رقيب امان وظيفي راتب 14-13500 هذي ماتلاقيها بالشركات الا بخبره 4-5 سنوات العسكريه دوام مريح وما عليك استلامات ويمديك تكمل ماستر بالجامعه السعودية الالكترونيه من 4-8 الليل ولو حصل لك تصير اكاديمي يكون تقدر تطلع من العسكريه وتكمل اكاديمي والله لو تفوتها لتندم ندم حياتك كلها كم سنه وتوصل 30-31 وتعلق رقيب اول والافضليه لك لان عندك نقاط وشهادة جامعيه والارقام للترقيات للتخصصات التقنيه متوفرة ويمكن تتقاعد اذا كان ملفك كويس على نقيب او رائد بس حاول تكون نفسك قبل تتقاعد لان الراتب حقك بينزل اكثر من 60% منه عند التقاعد والله يوفقك

بكالوريوس حاسب و رقيب؟؟ حراام و الله يعينك


دفعتي اللي دخلوا العسكرية علقوا نقيب و اعمارهم ٢٧ - ٢٨

هذي ما تجيبها الا على التقاعد

الله يوفقك و يكتب لك الخير و اذا ما فيه غيرها رح لها من باب تستر نفسك و تعيش لكن حط في بالك ان المواقف اللي بتضايقك كثيييييره جدا جدا

لو اني قريب منك شلتك ووديتك لهم

شي مضمون لاتشاور فيه ولا تكبه
توكل على الله وبالتوفيق وخل الفناطيس كيف طبيعة عملهم وكيف يسوون
افلح مع العرب واللي ما تعرف له بتتعلمه

ياخذ الرقيب الان ولها طرق ان تيسرت ملازم وكاتبها ربي بتتيسر
اما يضيع السنين على امل ممكن يدخل ملازم . المضمون افضل

يارجال لو كل واحد قعد يتمقل في الشي اللي بيتوظف فيه ماتوظف احد
دامها مضمونه فتلاحق عمرك والله يوفقك

محد يعلق نقيب الا الطبيب ويدرس تخصص بعد 7 السنين وخلص منه او ماجستير اما علق نقيب بالبكلوريوس كثر منها:mrgreen::mrgreen:

اقول لك توكل على الله وصل الاستخارة
المفترض لك 4 سنوات متخرج وسوق العمل خصوصا في مجال الحاسب بشكل عام الوظائف فيه كثيره، وفرص التطور وزيادة الرواتب افضل بمراحل العسكرية لكن بما انك جربت وماتوفقت لاتتردد وقدم


دراسة الماجستير فكره سيئة بما انك عاطل والسبب انك بتكون غالي على الشركات والجهات الحكومية وقت التوظيف، الماستر يصلح للي عنده خبره وعلى راس العمل لانه يطوره وظيفيا ويسوي له ترقيات كبيره

بارك الله فيك عمره ٢٨

يعني خدم ٥ او ٦ سنين قبل ما ياخذها

روح بدون ما تشاور الجامعيين الحين يقدمون على جندي اول ويتمنونها

وظيفة حكومية براتب ما يقل عن 10 ومسار وظيفي واضح هذي نعمة عظيمة ، لا تترد الوظايف شحيحة والكل يبي يلحق عمره ويتوظف وانت جاتك وظيفة حكومية برتبة طيبة وراتب طيب و ترقيات غالبا ما بتتأخر ، يعني سنتين ثلاث وانت متزوج بحول الله وأمورك طيبة

الفرص تجي ولا تتكرر دايم اترك عن كلام المنظرين الي يقولك تخصصك يشغلك باحسن شركة وحرام تتعب واخرها عسكرية وتلاقيه ساند نفسه على واسطة وله مع القوم ولد عم وربع ،واذا عل طبيعة العمل لا تدقق مهوب كل من توظف اشتغل على تخصصه ترا وظيفة حكومية براتب عالي بعيدة عن تخصصك افضل من العطالة وافل من مذلة الخاص ماعادنا بزمن تشرط، وصدق مقلع يوم قال لو انه عندك كان خذاك لهم وانا لو اني عندك بسوي نفس الشي لاننا نبي لك الخير

ادخل عسكرية ...وحط خطه لنفسك خلال سنتين إلى ثلاث تكسب خبرة في مجالك ودورات من عملك في تخصصك وبعد ابحث عن الفرصة في اي شركة حكومية او شركة إنترناشيونال واحرص على اللغه ...وفالك التوفيق ولكل مجتهد نصيب

والله انك ماتدلها ياصاحبي لاتتكلم في شي ماتفقه فيه :60:

لازم يكمل 4 سنوات خدمه اسمها خدمه العلم بعدها يقدر يطلع

هذي الاستقالة، اما الطرد من الخدمة مايحتاج ال4 سنوات، يفصلونه بالغيابات

بس لازم يشيلون اسمه من التامينات عشان يروح وظيفه ثانيه وفيها جزاء عسكري ثم بعدها فصل

الوظيفة هدف ذو أولوية عليا
لا تنحرف بوصلتك عن الأهداف الحرجة الحالية لأجل أهداف مستقبلية غير مؤكد حدوثها

انت شف الخيارات اللي قدامك للحصول على دخل مطمئن
ما عندك غير العسكرية؟ توكل على الله العزيز الكريم ولا تتردد
كل طموحاتك ممكن تحققها
الدراسة؟ ممكن في الجامعة الإلكترونية وممكن بغير الجامعة

والله الموفق

خصوصا تخصصك الحاسب
شف التوجهات الحديثة واتعلمها وادرسها واثبت خبرتك بمحفظة مشاريع Portfolio وبسيرة ذاتية مرتبة

أمثلة على التوجهات الحديثة اللي تقدر تستثمر وقتك وجهدك وانت في بيتك بعد الدوام وفي آخر الأسبوع وما تحتاج إلا دراسة أونلاين وحتى ممكن بدون فلوس أو بشيء رمزي:

1. تحليل البيانات/ علم البيانات/ تعلم الآلة/ الذكاء الاصطناعي
2. الحوسبة السحابية ومنصات AWS و Azure و GCP و AliBaba Cloud

وتراها غير مستحيلة ولا تظنها خاصة بالطلاب (الأذكياء والعباقرة وأصحاب المعدات العالية)
يبغى لها بس استثمار وقت كبير وجهد عالي والتزام مستمر

والله الموفق

دامها مضمونه
فتلاحق عمرك والله يوفقك

ما قريت غير انك انسان عاطل وجاتك وظيفة ومتردد

مع كل الاحترام جاتك وظيفة أيش خيار الثاني حالياً ؟ ما في خيار ؟ طيب ليه تفكر ؟

تقدر تسوي كل الي قلت تبي تسويه و انت موظف بلعكس الوظيفة بتسهلك كل امورك


الله يوفقك

قسم بالله ماتفوت اذا بكالورويوس ورقيب في ذا الوقت
والراتب لن يقل عن 10
حسب مايبدو ان دوامك مكتبي
وعلى حد علمي ان وزارة الدفاع اجراءات القبول الى رسالة الدورة تاخذ وقت طويل يمكن سنه سنتين
واحد من الشباب شارف يكمل سنة الى الان ينتظر رسالة الدورة رقيب تخصص انجليزي
والثاني اخذ مايقارب سنتين ونص الا ان جاته الرسالة وهو اصلاً قد نسيها
من الاخير لاتفرط فيها ولاتتكل عليها بنفس الوقت سوي نفسك منت مقبول ودور رزقك الين تفرح ان شاء الله برسالة الدورة او يغنيك ربي عنها بوظيفة احسن

وولد خالي نفس تخصصك والله يانه وجد صعوبات مريره لعدة اعوام وهو يسعى
اخر ماسمعت انه قبل عدة اشهر حصل له شركة زينة بالرياض وراتبها طيب والله يوفقه

المهم انك تداقش مع العالم بالوقت الحالي على قد ماتقدرخلال مدة الاجراءات
واذا جاك القبول شد الرحال والله يوفقك تراها زينه وصححوني اذا غلطان [ انت تعتبر فني ] فرق عن العسكري الميداني وهذا مؤشر ايجابي على فكرة

اذا ماترى نفسك بالعسكرية ازيل فكرة ان عمرك قرب لل30 لان هذا الحد لايعني محق البركه في حياتك
هو مجرد نهاية للقبول في العسكرية فقط
ورزقك ربي وكيلة لو بلغت ال100 عام

أسأل الله العلي العظيم ان يرزقك
وفالك التوفيق