السلام عليكم ورحمة الله وبركاته

المشكلة هذي صارت لي قبل 2024 تحديداً في اكتوبر 2023 تقريباً وحبيت اتكلم عنها للفائدة بحكم ماشفت احد تكلم عنها او صارت له


قررت اشتريلي كرت شاشة جديدة واتجهت الى كرت AMD لأول مره في حياتي اجرب كرت منهم وكنت متحمس للتجربة والكرت الي قررت اخذه هو XFX 7900XTX

المشكة الي صارت لي كالتالي فجاه بنص اللعب يصير فريز ثم شاشه سوداء ثم ترجع الشاشه تشتغل على طول واللعبه تكون مكرشه اثناء الشاشه السوداء وزيادة على ذلك حتى الدسكورد يكرش حتى ونا على سطح المكتب وفاتح الحاسبة يكرش معي! بعد فورمات من خلال الـUSB واستعمال برنامج DDU فوق ال 3 مرات وحوسه طويله وقلب الموضوع اطفي اي شي له علاقة بال Hardware Acceleration لأنه لاحظت يكرش بسرعة اذا كان شغال في الدسكور او كروم او اي متصفح ثاني. مازالت نفس المشكلة موجودة!

في النهاية انتهى فيني الأمر اني اكلم امازون وارجع الكرت ووقتها رفضوا الأستبدال بحكم سعر الكرت ولكن الأسترجاع بكامل المبلغ تم واخذوا اسبوع فقط او اقل من اسبوع الظاهر كانت بعد.

جداً جاني احباط وكرهت AMD والي سواها :angry1: ولكن ماخليت الموضوع يوقف هنا وقررت اخذ نفس الكرت من نفس الشركة والي هو XFX 7900xtx بحكم اني احب التجارب واجيب العيد دايم :mrgreen: وصل الكرت وسويت فورمات من خلال USB للمره المدري كم وفوقها شغلت DDU رغم انه توني مفرمت ولكن التوتر وعمايله يسوي كذا. وبالنهاية صارت لي نفس المشكلة :40::40::40::40: فريز ثم شاشة سوده ثم كراش! يبن الحلال شنو فيه! وانتهى فيني الوضع اني افصل جميع ال M.2 الي كنت مركبها وافصل الزايده لاني شابك M.2 Pcie Adapter وصل فيني الشك يمكن فيه خلل خلل بال Pcie Lanes وفوقها عطلت ال PBO وطفيت اي تعديل على الرامات من ضمنها ال DOCP او المعروف بال XMP عند انتل والبايوس بعد حدثته ولكن نفس الاشكالية... هو المفروض اني اعطلهم في الكرت الي رجعته من اول ولكن ثقتي الكبيره بالتعديل الي سويته في ال PBO في البايوس كانت كبيره لأني طاحن الجهاز طحن على نفس اعدادات ال Curve optimizer ومجرب كرتين 4060ti على جهازي و 2070S و 3080 ومافي اي مشكلة.




وفي النهاية من باب الي يقولك جرب تغير شي حتى لو ماله دخل سويت فورمات وانتقلت من Win10 الى Win11 وراحت المشكلة تماماً :imdead:


والأن انا العب Arkham Knight على 8K من باب الطقطه


ماشاء الله