السلام عليكم ورحمة الله وبركاته


تخرجت من تخصصي الاخير على الدفعة وكنت قبل آخر ترم عندي ثلاث انذارات وفي الترم الاخير فقط قررت ادرس ورفعت معدلي ووصلته للحافة وتخرجت …ولو كنت جايب قريد اقل باي مادة لفصلت من الجامعة وانا متخرج…!

بعدها سافرت احسن لغتي لمدة 4 شهور وفي اول اسبوع لي هناك كلمني واحد على اساس يسون معاي مقابلة للتدريب معهم وقلت له أنا مسافر وراجع بعد ٤ شهور… قال تمام بس توصل ان شاء الله اذا فيه فرصة نسوي المقابلة
بعدها لما خلصت وقررت ارجع ورسلت له واتس اب وانا غاسل ايدي اساسا ولكن بعدها بيومين من وصلت كلمني اسوي مقابلة سويتها قلت لهم بالمختصر انا مو فاهم ابدًا في المجال يلي تبوني اتدرب فيه.. طلعت وانا غاسل ايدي انهم يكلموني.. بعدها باسبوع كلموني ورحت اتدرب بمكافئة ١٥٠٠ ريال لان كان رمضان وضغط عندهم بسبب ان شغلهم شفتات ثلاثة طلعوا واضطروا يكلموني . جلست عندهم ثلاث شهور ثم وظفوني براتب 9500 بعد ماطلع اثنين كانوا يتدربوا معاي كانوا مرشحين عني وانا كنت بس بتدرب واطلع لكن خروجهم ساعد اني اتوظف…وثم بعدها صار فيه رفع للرواتب لتقليل عدد من يخرج لان السوق فيه طلب عالي.. صار راتبي بعد ما توظفت بثلاث شهور 14000.. بعدها جلست اربع سنوات معهم زاد راتبي وصار 18000 ثم جاني عرض وطلعت وصار راتبي 23000 وراتب رمضان وبونص راتبين حسب التقييم.. ثم جاني عرض بعدها بشهرين 31000 وراتب رمضان وعيد الاضحى وبونص ثابت راتبين وحسب الاداء يوصل 4 رواتب


انا خبرتي 4 سنوات وكم شهر فقط واقسم بالله اني ما اعرف احد ولا توسط لي احد… هدفي من الموضوع ان في رزق ومهما كانت الظروف استمر انا كنت اعاني في الجامعة مفروض اتخرج في ٤ سنوات جلست ٦ سنوات وحالتي حاله حتى الانجليزية كانت سيئة ولكن كل شيء تغير واثبت نفسي وغيرت كل مجرا حياتي بالمواصلة مهما كانت المصاعب استمر.. ولا تجلست بالبيت حتى لو تدريب وحتى لو كنت غاسل ايدك ياخذوك بعد التدريب مثلي كمل ودور بس لا تجلس في البيت… وشكرًا