رايكم بوظائف حراس الامن ؟
banner
2023-12-20 , 07:49 صباحاً
عمار 16’s Avatar
عمار 16

مشارك

المشاركات:301
التسجيل:Dec 2014
عمار 16
السلام عليكم ورحمة الله وبركاته

ي أخوان الله يسعدكم بسألكم هل يوجد سلبيات لوظائف حراس الامن من ناحية تأخير الرواتب وغيرها ؟

تعبت وانا عاطل وم حصلت فرصة مناسبة لي إلا هذي واعتبرها مؤقتاً لحين الحصول على فرصة في تخصصي شبكات الحاسب

اللي عنده فكرة او يسمع سلبيات عنها ياليت تطرحونها هنا

وشكرا مقدماً
Enlarged Image
2023-12-20 , 07:49 صباحاً
2023-12-20 , 09:59 صباحاً
لعــــيونك’s Avatar
لعــــيونك

مشارك

المشاركات:160
التسجيل:May 2008
لعــــيونك
وعليكم السلام ورحمة الله وبركاته

من واقع تجربة شركات الحراسات الأمنية وضعها مزري

لكن مو كلها اكيد فيه شركات محترمة لانها غالبا تعتمد على المستخلصات

الحراسات الأمنية حسب موقع العقد وحسب الشركة فيه شركات محترمة وفيه شركات دون المستوى

تجنب حراسات الأسواق والمجمعات والمنشئات الصحية و بعض البنوك المزدحمة

افضل الحراسات الي يكون عقدها مع الشركات المميزة مثل مواقع نيوم وأرامكو والهيئات الملكية والشركات الكبرى والمستودعات وغيره

فيه شركات تأخر الرواتب لكن مع نظام حماية الأجور بيضبطون معك وأهم شي تكون مسجل بالتأمينات وأهم شي تاخذ نسخة من عقدك

وأسوأ نظام في الحراسات هو نظام الشفتات الي كل يوم تداوم فيه بعض مواقع يكون العمل يوم كامل وتسلم يومين او حسب نظامهم

بالتوفيق لك ونصيحة اذا جتك اي وظيفة توظف ولاتجلس بتكسب خبرة وتعامل مع الناس وكثير توظفوا وظائف افضل من احتكاكهم بالناس
2023-12-20 , 09:59 صباحاً
2023-12-20 , 11:28 صباحاً
Rollo’s Avatar
Rollo

مشارك

المشاركات:436
التسجيل:Sep 2011
Rollo
أسوا وظيفه ممكن الانسان يشتغلها.. تشتغل في بقالة حارتكم ولا تشتغلها
99% من الشركات أوضاعها مزريه ووزارة العمل نايمه في العسل من سنوات
خذ السلبيات
1/مافيه اي مراعاه لظروفك الشخصيه يعني ممنوع تستأذن أو تغيب أو حتى تتأخر
2/كل شي عليه خصميات
3/فوق سوء الرواتب التأخير فيها شي اعتيادي
4/اذا الدوام في مكان تجاري الله يعينك على سوء اخلاق وقلة أدب بعض الناس
2023-12-20 , 11:28 صباحاً
2023-12-20 , 11:20 مساءً
سلطان الاحمدي’s Avatar
سلطان الاحمدي

مشارك

المشاركات:402
التسجيل:Oct 2013
سلطان الاحمدي
وعليكم السلام والرحمه
انا فبدايتي اشتغلت فاكثر من ٦ شركات واماكن كنت فيها حارس امن
صراحة كانت بعد الله عون لي ف اني ادفع قسط سيارتي + اكل وشربي وغيره واعتمد ع نفسي ف امور كثير
( اخرها وانا طالب جامعي كنت اشتغل وادرس بحكم اني بمدينه غير عن اهلي )

مثل ما قالو لك الاخوان الحراسات الامنيه نوعا ما قطاع في ظلم ولاحد داري عنك

لكن خذ مني هالنصايح لعلها تفيدك
اولا ابحث عن الحراسات الامنيه في الجامعات او او الشركات اللي في المدن الصناعيه
( لان هي اللي مافيها مواجهه ولا تصادم مع الجمهور الا نادر ..)

ثانيا
انتبه انتبه تشتغل بدون عقد رسمي او يقولون لك بنجربك ٣ شهور بدون عقد
( عشان تضمن حقك ولا ياكلون عليك شي واذا فيه تامين طبي تستفيد )

ثالثا وهو الاهم
لا توظفت لا تجلس فالوظيفة وبس لاتخلي الوقت يروح كمل دراستك كمل دراستك كمل دراستك
( تخصصك ممتاز وامتداده ممتاز شد حيلك وطور من نفسك وكمل )

مع مرور الوقت بتلاقي نفسك عايش وانجزت بدال الجلسه .. والوقت ترا يمشي وسريععع
2023-12-20 , 11:20 مساءً
2023-12-21 , 05:19 مساءً
خبل بس ثقة’s Avatar
خبل بس ثقة

كيــميــائي

المشاركات:4837
التسجيل:Sep 2008
خبل بس ثقة
كل وظائف الحراسات الأمنية مزرية , لكن الأرحم هي الحراسات الأمنية في المشاريع ( عقود الشركات لحراسة المشاريع المؤقتة ابو سنتين ثلاث )

ولا تدور على شي تقول لا بيكون دائم , لأنه بيكون سيء ولا فيه زيادة راتب ولا فايدة لو استمريت فترة طويلة, بينما عقود المشاريع القصيرة تتنقل بين الشركات وخدمتك تخدمك واذا كنت شغيل يمكن وقتها تثبت مع شركة بمزايا أفضل, ودائما بيكون متاح لك ترجع للشركة اللي انتهى عقدك معها دامك ماطلعت منها مفصول.

واذا توظفت حارس أمن , ركز على التطور والبحث عن اي وظيفة ثانية أفضل , لا تقول خلاص كذا معيشتي وباصبر عليها وتضيع سنين عمرك عبث.

انا اشتغلت فيها قبل 20 سنة وانهيت العقد لأني لقيت وظيفة حكومية أفضل وراتبها أقل على الرغم من ان راتبي وقتها في الحراسات الأمنية كان 12 الف وشوي بينما الوظيفة الحكومية كان 8 الاف , لكن كان عقد شركة مؤقت ابو 5 سنوات بعدها انت وحظك ومصيرك, غير ان الدوام 12 ساعة 3 شفتات متغيرة التوقيت.

الشي اللي تنتبه له وتحطه في بالك, في نظام العمل , 99% من البنود اللي في صالح العامل تجي لآخر السطر وتلاقي مكتوب " ويستثنى من ذلك الحراسات الأمنية وما في حكمها".

الكلام هذا مايعني تتجنبها لصالح بقاءك عاطل, بالعكس تشتغل في الحراسات الأمنية وتتقبل خيرها وشرها حتى يكتب لك الله خير منها , أفضل مليون مرة من العطالة, اخواني الآن 3 شغالين في الحراسات الأمنية ومع شركة بنظام المشاريع لكن عقد المشروع حكومي وهو أفضل من غيره , ( اثنين خريجين جامعات وواحد ثانوي ), ومرتاحين نسبيا مع ذلك يكفي ان تعرف انهم يخرجون الصبح ولا يرجعون الا العصر لمنطقة بعيدة عن الدنيا عشان عملهم هذا والراتب 4000 بالقوة ومثل ماهو من 3 سنوات ولا اظن يزيد ريال لو يكملون فوقها 7 سنوات|, غير انهم يقولون لي كل اسبوع يشوفون وجيه موظفين معهم جديدة ومايطولون ويفصلون في شهر او أقل ( بيئة عمل صعبة ) .
2023-12-21 , 05:19 مساءً
2023-12-24 , 02:36 صباحاً
anim19’s Avatar
anim19

VIP

المشاركات:14759
التسجيل:Jun 2008
anim19
شف اعطيك خبرة شخص
عمل في الحراسات ل6 سنوات

اذا حاطها كوظيفة مؤقتة دور لك على موقع في احد فروع البنوك الفترة الليلية عشان تتخلص من مقابلة الجمهور و وحع الراس و في الصباح تبحث عن وظيفة اقضل

ثانيا اذا حابب توفر مبلع دوام في وظيفتين حراسات صحيح تعب

بس توفر راتب الوظيفة الثانية و راتب الوظيفة الاولى تصرفه مرتاح و يكفيك

اغلب الحراسات في البنوك الراتب 4 الاف
اذا تمسك موقعين قريبات من بعض

تستلم 8 الاف ريال

صحيح بتنحرم من خوياك و بعض المناسبات

بس صدقني ما رح يفيدوك و خصوصا في الزمن هذا
2023-12-24 , 02:36 صباحاً