استفسار: رحلة إلى سويسرا
banner
2023-12-01 , 09:16 صباحاً
ذييبان’s Avatar
ذييبان

مبدع

المشاركات:2580
التسجيل:May 2012
ذييبان
السلام عليكم

أنا بإذن الله حطيت النية اسافر في نص شهر مايو, تقريباً يوم 16-17 مايو ..

حاب اروح سويسرا وبالتحديد الاماكن الريفية, مثل انترلاكن وغيرها من المدن اللي قريبة من جوها اذا تقدرون تزوزدني فيها , وهم محتار من روحتي لزيورخ او جنيف بحكم انهم مو ريفيين مثل انترلاكن ..

مدة السفرة مبدئياً عشر ايام إن شاء الله ..

حاب نصايحكم في اختيار المدن الريفية ومدة الاقامة في كل مدينة + الاكتفتيز اللي ممكن اجربها هناك ..

وكذلك مايمانع اذا فيه اقتراحات لفنادق معينة جربتوها..

الرحلة اخليها لمطار جنيف افضل او زيورخ ؟

والافضل هناك استئجار سيارة او التنقل بالقطار ؟

في انتظاركم ..
Enlarged Image
2023-12-01 , 09:16 صباحاً
2023-12-01 , 09:37 صباحاً
ذييبان’s Avatar
ذييبان

مبدع

المشاركات:2580
التسجيل:May 2012
ذييبان
هم متى تنصحوني اطلع الفيزا السويسرية ؟ قبل السفره بكم ؟
2023-12-01 , 09:37 صباحاً
2023-12-01 , 09:54 صباحاً
ذييبان’s Avatar
ذييبان

مبدع

المشاركات:2580
التسجيل:May 2012
ذييبان
سؤال اخير , ممكن هالشيء صعب يتحدد , ولكن كـ افرج , كم اخلي ميزانيتي بهالعشرة ايام (من غير اسعار التذاكر والفنادق) عشان اكون بالسيف سايد ؟
2023-12-01 , 09:54 صباحاً
2023-12-01 , 06:41 مساءً
a.b.saet’s Avatar
a.b.saet

/\/\/\/\

المشاركات:8922
التسجيل:Jun 2008
a.b.saet
وعليكم السلام ورحمة الله

بعطيك جدولي بآخر زيارة وكنت مستمتع بالرحلة
بالبداية من ناحية الطيران كان الخيار الانسب بالنسبة لي اني اخلي الوصول إلى زيورخ والرجوع من جنيف ومساري كان كالتالي

المسار:
- الوصول زيورخ -> ليلتين لوسيرن -> 6 ليالي انترلاكن -> 3 ليالي مونترو -> 3 ليالي شاموني -> العودة جنيف
- بالنسبة لي دائما افضل ما اكثّر تنقلات ما اخلي المسافات بين المدن بعيدة وهذا تفضيل شخصي خصوصا اذا كانت الرحلة (قد ما يكون مناسب لك)
- لو كنت مكانك وبروح 10 ايام، ابخلي جدولي نفس فوق بس بلغي مونترو واخلي انترلاكن 5 ليالي
- عن نفسي دائما افضل استاجر سيارة خصوصا اني اروح اماكن كثيرة بعيدة واحب اتجول على راحتي خصوصا اني معظم وجهاتي للارياف فما اعاني بالمواقف
- ايجار السيارة ما كان يفرق كثير لاني ماخذها ومرجعها بنفس الدولة


الفعاليات بكل يوم:
- كل جدول يمثل فعاليات يوم واحد وغالبا تكون متتالية على نفس المسار
- الفعاليات اللي بكل يوم غالبا ما اروح لها كلها لكن اخليها محفوظة عندي لو حبيت اغير واصير اختار الأماكن اللي افضلها اكثر في حال ما كان فيه وقت كافي لكل الفعاليات
- أحيانا اقسم فعاليات اليوم الواحد إلى يومين اذا كانت تستغرق وقت، اهم شي استمتع بكل مكان الى اقصى حد حتى لو يروح اليوم كله على فعالية وحده
- ما امشي على الجدول بالملي، لكن افضّل اكون عارف الاماكن السياحية بحيث ما اضيع وقت بالبحث خلال الرحلة
-ترتيب الايام عشوائي ما عدا بعض الجداول لانه تصير بالطريق من وجهة الى وجهة ثانية، يعني مثلا شلال لينك وافيغباش كانت بالطريق من انترلاكن الى مونترو ومصنع ليندت كان بعد طلعتي من مطار زيورخ وقبل روحتي الى لوسيرن


Image
Image
Image
Image

الفعاليات اللي في جريندلفالد ولوتربرونن وبرينز وثون ولونجيرن كانت خلال وقتي في انترلاكن
الفعاليات اللي في جنيف وانسي كانت خلال وقتي في شاموني

السكن:
- عن نفسي ما احب اسكن بالاماكن المزدحمة حتى لو كانت ماهي كبيرة (ما افضّل اسكن بزيلامسي او انترلاكن او لوسيرن وقس على ذلك)
- افضل السكن دائما بأماكن قريبة من القرى او المدن الرئيسية
- في لوسيرن سكنت بـKüssnacht ، اسم الفندق Tailormade Hotel RIGIBLICK (حليو وهادي)
- في انترلاكن سكنت بـBeatenberg ، اسم الفندق Dorint (جميل واطلالته رهيبة لكن القرية نفسها فوق جبل وممكن الطريق يكون متعب)
- في مونترو سكنت بـLeysin ، اسم الفندق Les Frênes (الفندق جيد لكن الديرة نفسها ما جازت لي مرة)
- في شاموني سكنت بشاموني نفسها ، الفندق كان متوسط ولو رجع بي الوقت ما سكنت فيه

الفيزا:
انا دائما افضّل اطلع الفيزا من المكان اللي بجلس به اكثر مدة حتى لو كان معروف عنهم انهم ما يعطون مدة طويلة
آخر فيزا طلعتها كانت سويسرية وعطوني سنة (ثالث شنقن)
2023-12-01 , 06:41 مساءً
2023-12-03 , 10:14 صباحاً
منآآآحي قردآآحي’s Avatar
منآآآحي قردآآحي

مبدع

المشاركات:3800
التسجيل:Apr 2011
منآآآحي قردآآحي
عليكم السلام
اول شي التوقيت ممتاز،
الاجواء معتدلة وما فيه زحمة
اعتقد فترة اختبارات او ما قبل الاختبارات النهائية للفصل الثالث.

انترلاكن والمدن الصغيره اللي جنبها جميلة جدا
واذا حاب تاخذ لك ليلة او ليلتين في مكان هاديء بعيد عن الازعاج
وما توصلها السيارات،
قمة الهدوء والسكينة والاسترخاء

توقف في مواقف القطار وتركب القطار وتروح للقرية اعتقد تقريبا 15 او 20 دقيقة ما اتذكر

اسمها Wengen
سكنت في الفندق Hotel Belvédère Wengen
الدور الاخير
واستمتع بالبلكونة والاطلالة الرائعة على قرية Lauterbrunnen بالاسفل والشلال

استئجار سيارة هو الافضل
التنقلات بالمواصلات العامة متعب وياخذ منك وقت في الانتظار
اسعار ايجار السيارات مو غالي لو ترجعها في نفس الدولة

الفعاليات فيه اماكن للزيارة
واذا وصلت اي فندق اطلب منهم الخريطة والفعاليات
يعطونك كتيب فيه الفعاليات بجميع التفاصيل ( نوعها ومتى يفتحون وموقعها )

التأشيرة طلعها من اي سفارة
واذا كان النظام نفس اول، تقدر تبدا في اجراءات التأشيرة قبل السفر ب 3 شهور

الفرنسية في الأغلب تعطي فترات اطول
ومو دائما لكن هي حظوظ

وما سبق وجربت السفارة السويسرية



الميزانية تعتمد على كم شخص
وطريقة المعيشة ونوع الفعاليات اللي راح تروحها
السيارة السيدان او الكروس اوفر المتوسطة، كمتوسط سعر شامل التأمين الشامل في حدود 500 ريال تقريبا لليوم الواحد

الأكل يعتمد على عدد الاشخاص وكذلك الفعاليات
وسويسرا اغلى من الدول الثانية حسب تجربتي


بالتوفيق
2023-12-03 , 10:14 صباحاً
2024-02-01 , 03:42 صباحاً
عبودات’s Avatar
عبودات

بارز

المشاركات:1779
التسجيل:Dec 2011
عبودات
رحت لها قبل سنه في شهر سبعه اسبوعين

من اجمل السفريات وسهوله التنقل بين اريافها الجميله

حجزت على جنيف واستاجرت سياره مده اسبوعين كلفتني تقريبا 4000 ريال واخذو مني تامين 2000 فرنك تقريبا 7500 لكن مسترجعه وفعلا رجعوها لي
جلست يومين في جنيف وتمشيت فيها والفندق كان سعره ب 400 ريال بنص جنيف واسمه سويس جنيف مقابل القطارات وقريب من شارع المطاعم وعشر دقايق مشي لبحيره جنيف كان جميل وهادي

بعدها مسكت خط من جنيف الى انترلاكن تقريبا 3 ساعات والطريق حلو وكله مناظر لكن قبلها مريت سوبر ماركت اسمه كوكو اتوقع وشريت مفرحات لطريق

اول ماوصلت كنت ساكن في قريه براس الجبل تطلع لها بالقطار اسمها vengen في فندق اسمه فالكون جلست فيه 7 ايام وفرفرت القرى كله من شلالات ومطاعم وكل شي

بعدها مسكت خخط الى زيورخ وكنت حاجز يومين في فندق ومريت من لوسيرن وفريت فيها شوي وكملت تقريبا مده الرحله ساعتين وتمشيت في زيورخ واكلت من عندهم برقر مانساه للحين ياحلوه وبعدها اشتقت لريف ورجعت لانتر لاكن جلست 3 ايام وبعدها رجعت الى جنيف وجلست 3 ايام ورجعت لسعوديه

كلفتني الرحله 30 الف مع طياران وحجز السياره وتامين السياره
2024-02-01 , 03:42 صباحاً
2024-02-01 , 08:57 صباحاً
معتز الثويني’s Avatar
معتز الثويني

متميز

المشاركات:6264
التسجيل:Nov 2007
معتز الثويني
الديرة غالية جدا ( اغلى مكان على وجه الأرض ) .. وبالنسبة لمسار الرحله خذ 4 ايام لوسيرن و 4 ايام انترلاكن .. لوسيرن حلوة وتستاهل وقت اكثر .. وانترلاكن مملة واقل من توقعاتي .. كلها جبال والمسارات ضيقه .. يعني مافيه مساحات ممتده
2024-02-01 , 08:57 صباحاً
2024-02-01 , 11:19 صباحاً
المهـــند’s Avatar
المهـــند

مبدع

المشاركات:3602
التسجيل:Nov 2006
المهـــند
عملت في سويسرا لفترة من الزمن، بلد ساحر بما تعنيه الكلمه

والله العظيم احيانا اوقف واتأمل واقول انا بحلم والا بعلم ، صدق المناظر هذي والا تخيلات وتهيؤات

البلد ساحر جدا لكن مشكلته الاسعار العالية

شخصيا افضل مطار جنيف على زيورخ لان الدخول فيه اسهل بكثير، لكن اغلب الاماكن الحلوة والسياحية بتكون من جهة زيورخ

اقتراحاتي لك وانت احسبها زي ماتشوف وماراح ازود على كلام الشباب فوق الا بعض النقاط:

- زيورخ مدينة عمل وتسوق واذا انت تحب الارياف والطبيعة المفروض انك ماتضيع وقتك فيها، نفس الكلام ينطبق على جنيف
- افضل مناطق ريفية هي انترلاكن، بيرنز، والبلدات الواقعة على جبال الالب، لكن يعيبها ان اغلب السكان هناك مايتكلمون لغة انجليزية وراح تتعب بالتواصل
- اذا قدرت، فيه مدينة فرنسية بجانب جنيف اسمها انسي، جميلة جدا وتستحق الزيارة
- لو تقدر تنزل بمطار ميونخ المانيا افضل لك، لان اسعار التذاكر وايجار السيارات ارخص بكثير ، وتقدر تعبر الحدود بشكل طبيعي لسويسرا
- اثناء عبور الحدود تأكد ان معك الجواز.
- بالنسبة للتأشيرة تقدر تطلعها من اي سفارة مايفرق، لكن يفضل دائما انك تروح للبلد الي اصدرت منه التأشيرة كأول محطة لك، لكن بصراحة معظم سفراتي لاوروبا شفت ان الوضع مايفرق، الاوربيين الفترة الاخيرة صاروا يقدرون الجواز الاخضر ومايستقعدون له كثير (دام عزك ياوطن).
- كل شئ بسويسرا مرتفع الجودة، حرفيا اي فندق تسكن فيه بتلقى جودة عالية مهما كانت اسعاره
- لاتفوتك الاجبان والتشوكلت، احرص عليها تراك بتاكل جبن ماعمرك شفت مله بحياتك
- بعض المعابر في جبال الالب تنفتح في آخر الصيف بعد ذوبان الجليد، لاتنسى زيارتها.
- اذا كانت اسعار سويسرا غالية جدا عليك، النمسا بديل يعطيك تجربة مقاربة لكن بتكلفة اقل بحوالي 30%
- السفر لاوروبا من ناحية التفتيش والتشديد مايفرق عن السفر لدول الخليج، لذلك وسع صدرك ترا الدنيا سهالات مره. الي سفراتهم لامريكا كثيرة راح يشوفون فرق شاسع جدا بالتعامل
- شئ ضروري جدا تستوعبه بسويسرا هو انها دولة استرخاء وطبيعة وتمشي، ماهي مدينة ملاهيات وحدائق ومدن ترفيهية، لازم تستوعب النقطة هذي عشان ماتروح وتصير ممله بالنسبة لك، اذا تبغى اماكن ترفيهية ممكن سويسرا ماتكون مناسبه لك
- من اجمل الاشياء الي ممكن تسويها بحياتك انك تاخذ امك معك وتخليها تتمشى وتشوف وتناظر، حلم حياتي اقنع امي تسافر معي سويسرا لكن للاسف امي تخاف من الطيارة.
- مستوى الامان بيكون صادم جدا بالنسبة لك، شئ مايخطر على البال.
- حاول تستخدم النقل العام عشان تستمتع بالطبيعة والمناظر وتجنب استخدام السيارة قدر الامكان.
- الشمس تكون حارقة شوي بالصيف لاتنسى تاخذ معك واقي شمس.
- الجبال والمرتفعات تكون باردة حتى بعز الصيف، لازم تاخذ معك ملابس شتوية.
- الشعب السويسري لطيف جدا، حاول دائما تبتسم وتسأل عن الحال والاخبار قبل لاتطلب شئ من اي احد تقابله.
- عشر ايام كثيرة وراح تمل، حاول تخليها بحدود اسبوع، وعادة الاسبوع يكلفني حوالي 40 الف ريال لشخصين ، مع التذاكر والاقامة والترفيه
2024-02-01 , 11:19 صباحاً