الله يفرج همومك
جرب المهن الحرة تعف نفسك عن السؤال كحل في حال ماحصلت وظيفة

جرب انك تسجل الكلية التقنية تخصص كهرباء او مكنيكا
تكسب حرفة وكمان تاخذ مكافئة تمشي امورك في المواصلات
وحاول تروح محل الجولات تشتغل لو براتب بسيط تتعلم

المشكله الكبرى اني لا املك سياره للدوام
ولا كان اشتغل في توصيل طلبات وكملت تقنية سنتين

ما اقدر افيدك غير بهذه الروابط للتقديم:

الحكير:
https://docs.google.com/forms/d/e/1FAIpQLSdo_yc...

الشامل:

https://docs.google.com/forms/d/e/1FAIpQLScgtYY...

اباريل:

https://docs.google.com/forms/d/e/1FAIpQLSfPqJR...

جيوردانو:

https://wws.giordano.com.sa/form-view/27

الشايع:
[email][email protected][/email]

ستاربكس:
[email][email protected][/email]

كودو:

https://docs.google.com/forms/d/e/1FAIpQLScUgfm...

واشترك بقروب ساحة الوظائف:

https://chat.whatsapp.com/BUzdOltCqZEHnf7mbcfL2E

ان شاء الله تتيسر وتتوظف قريب.

انت من تسجل في التقنية وتجيك الموافقه
سجل في اقرب وحده

بعدها تواصل مع التقنية قول لهم من الطلاب الي ساكنين حوالي او قريبين مني اكلهم اركب معاهم ويساعدوني

وراح اعطيه من المكافئة 200 ريال لين الله يفرجها

شوي شوي تلاقي عيال الحلال يفزعون لك انت اسعى وربي يسرها لك

والله ياخوي ان الشركات تدور على موظفين سعودين
روح قدم يدوي الي في الاعلانات اغلبها وهمية
ودور على الشركات الناشئة او المستشفيات
الرواتب فيها تعتبر ممتازه

اتركك من الاعلام وتويتر والله ان الوظايف موجوده لكن يبغا لك تقدم يدوي

الله يفرج همومك وييسر امرك ويرزقك بالوظيفة

الله ييسر لكم أمركم ويهديكم إلى سبيل الرشاد

لا تجلس. تحرك.
فتّح عينك وأنصت وشف وش المجالات اللي ممكن تبدا فيها كعمل حر.
تابع الناس اللي يقدمون حلول وخبرات في مجال الأعمال الحرة.
وابدأ. قم من مكانك وتصرف.

ما فيه غير كذا.

عزيزي، خالط، وتابع، وأنصت للناس اللي تقدم خبرات وحلول وأفكار، وابتعد
وابتعد
وابتعد
عن سوالف وجلسات التذمر والتشكي.
أنت بينك وبين نفسك، اشطب من راسك التشكي واللوم والتذمر. اشطبها من راسك نهائيا.. الحياة كذا. وأنا ممكن أدخل معك في جدال طويل وممكن يكون عقيم في محاولة إقناعك أنه الحياة كذا وما أحد متقصدك أنت شخصيا.

أخي الكريم، الإنسان لازم ينزل نظارة (المفروض يصير كذا) و (الواجب يصير كذا) و (فلان وفلان ما قاموا بواجبهم) و (يجب محاسبة المقصرين).. هذي النظارة اللي تنظر من خلالها لواقعك، غلط تستخدمها. مو وقتها ولا مكان استخدامها هنا.

أنت عليك استخدام نظارة الواقعية. البس نظارة (ايش اللي صاير في الواقع) و (وش ممكن أسوي الآن) و (ايش المُتاح أمامي) و (ايش قدرة التأثير على واقعي وكيف ممكن أستغلها) ...

تابع الناس اللي يجذبون الحديث حول الفرص والإمكانيات والحلول اللي أمام الناس.
فيه حسابات في تويتر ممتازة.
ولكن الآن تك توك أصبح فيه حسابات تبث بثوث ممتازة وفيها نقاشات مختلفة.
ناس تفتح بث حول التسويق العقاري والوساطة العقارية وكل ما يتعلق بالعمل في العقار.
ناس تفتح بثوث يتناقشون في تطبيقات التوصيل وكيف اشتغلوا فيها وايش التحديات اللي واجهتهم وكيف حلوها وهل فيه عندهم فرص أخرى غيرها.
ناس تفتح بثوث مختلفة عن الأعمال الحرة.

قبل يومين واحد فاتح بث عن العقار والأراضي، هذا البث ما له علاقة في موضوعنا، لكن اللي لفت انتباهي، دخل واحد وقال يا عم أنا اشتغلت في بيع التمر. تنصحني أطلع واشتغل في العقار (يشتري ويبيع في العقار).. وقال أنا دخلت في بيع التمر بمبلغ 25 الف ريال وطلعت آخر السنة ب95 الف. صاحب البث قال استمر في شغلك وتعلم منه واكسب منه واستفد للآخر، واذا تجمعت عندك زود قروش ادخل في العقار.

الزبدة ناس تشتغل.

خالد الطلحي.. له حساب في تويتر وله بث في تك توك. الرجل الله يجزاه خير عنده باع طويل في الأعمال الحرة ويطرح أفكارة كثيرة في تويتر. وعنده بث على تك توك، ويدخل عليه ناس كثير يسألونه، وفيه ناس تدخل وتشارك معه في طرح تجاربها ومعلوماتها في الأعمال الحرة.

أذكر زميل لي من أهل عسفان. ضرب مشوار للقصيم بونيته علشان يحضر مزاد التمور بعنيزة، وجاب تمر وباعه في جدة. صافي مكسبه 250 ريال. مشوار 3 ايام بس.

ولازم تتعلم أخلاق وعلوم وسلوم التجارة والأعمال الحرة. يعني الصبر والحلم وأهم شيء كسر الغرور والكبرياء. واحد صرخ علينا ويمكن يشتم، ما له داعي كبرياءنا ياخذنا لرد الصاع بصاعين. هذي ما هيب سلوم التجارة.

خل حساباتك في التواصل الاجتماعي، تويتر (اكس)، تك توك، سناب تشات.. تتابع الناس هذي، الناس اللي تقدم خبراتها، و الناس اللي تتكلم عن أمور مفيدة، و الناس اللي تقدم محتوى بصري عن اهتماماتهم (واحد كل فيديوهاته عن تصليح السيارات بنفسه، ثاني عن أعمال النجارة، ثالث عن اتجارة والبيع).

أو تدري، احذف حساباتك الحالية، وابدا جديدة بنظرة جديدة ومتابعين جدد. الذكاء الاصطناعي حق التطبيقات يقدم لك محتوى بناء على اللي انت شفته. اذا انت تتابع وتشاهد في العقار والوساطة العقارية والتسويق العقاري، يبدا يركز لك على هالموضوع. وإذا بديت في متابعة أعمال التجارة والبيع ، يبدا يعطيك من هالخط الجديد.
متى تبدا بفيديوهات مضيعة الوقت، واحد ينكت أو سوالف عابرة غير مفيدة، يبدا الذكاء الاصطناعي يلطع لك هذي وتبدا تنجر انت لهالخط.

كلام الاخ كافي وافي




كلامي لك بيكون قوي تحمله لان هذا واقع .. نصيحه اخ فقط لا غير

كم عمرك ؟ وش الي ما يخليك تتعلم شي جديد ومهاره جديده .. شي يدخلك فلوس ترا حتى الي عنده حلال و ما عنده شهاده عنده مهاره التفاوض اكتسبها وتعلمها من والده قيس عليها .. :70:

لو بسأل عن كم شركه قدمت ؟؟ هل قدمت على طاقات ؟؟
كم ايميل ترسل باليوم؟؟ ,, كم مره تزور الشركات او توصي احد عليك ؟؟
اذا ما عندك اجابه ف فيه خلل فيك مو في النظام و الشركات ..

انت مين ؟؟ ايش تملك مهارات ؟؟ شهادات حتى لو مجانيه !!

السوق متغير متعطش للتجديد ,, شهادتك هي تثبت وجودك اذا ما تملكها خبرتك هي الي تثبتك .. بتقولي ما عندي وظيفه حلو تمام ادخل على الشركات اقسام اداريه طور نفسك بوقتها شوف ايش يصير معاك جرب جرب ثم جرب .. ما عجبك ادخل سكيورتي ..


كل ما قلت شهادتك قلت فرصك .. ف يعني انك لازم تكافح اكثر تدور اكثر .. بعكس الي عنده شهاده جامعيه ..

مو عذر السياره انك ما تروح جامعه .. اذا تبي تدور اعذار خلك بالبيت

هل شفت الوظايف عن بعد هل سالت عنها وش متطلباتهم ...

اخيرا تعرف طاقات ؟ يجيبون لك الوظيفه وانت جالس بالبيت الي عليك مقابلتك وشكلك منطوقك فقط حتى لو بدون انجليزي

والله يوفقك

السيارة مو عذر تعلق فيه مشكله الدراسه انا اعرف شخص درس معاي الهندسه ويوميا يمشي من بيته الى الجامعه فوق 14 كيلو مطر صيف شتاء غبار مشي وفيه عزه نفس مايخلينا نوصله لبيتهم يطلع بعد الفجر ويرجع البيت العشاء ولا عمري لقيته غايب جمع مكافئته وشرا سيكل كهربائي اخر سنتين والان متوظف مهندس في سابك ومترشح للماجستير والادمي مخه نظيف بالامكان انك تدرس واترك التململ واحاطة نفسك بالاعذار الغير مقنعة الثانوي والباكلرويوس هالايام ماتوكلك نص عيش كمل وخلك رجال واعي على نفسك

ربي يسعدك دنيا واخره

لو ساكت ابرك لك قالك سيكل كهربائي
انا 3 سنوات في المرحلة الثانوية اروح اطلع من البيت الساعه 6 الصبح واجلس عند البوفية انتظر عيال الحاره عشان اركب معهم ما كانت معي سياره
اجلس ساعه
ساعه ونص انتظرهم ونروح سوا وبعض المرات يروحون بدون ما ادري وما يعلمون احد انت وحظك
ضاقت في الدنيا 3 سنوات بالثانوية
دقيتها ميانه معهم عشان المواصلات وتحملنا ثلاث سنوات ممتالية
نوقف عن البوفية عشان المواصلات
والان الجامعة او كلية التقنية تركتها بسبب المواصلات
ولان المسافة بعيده ما اقدر اروح لها مشي

وبعدين المكافاة كلها 950 ريال وش بتسوي في الزمن هذا
الي راتبه 7000 ريال يعتبر فقير مديون مهموم فما بالك 950 ريال او 1000 ريال

شكرا اخي

الله يسهل امرك يارب ,
ماقلت لنا طيب وش تعرف بالضبط , هل عندك خبرات في اي مجال ؟ ممكن نساعدك او ندلك على شيء يفيدك

لا املك اي خبره ولكن مطلع واميل الى تخصص الجغرافيا والتاريخ والتكنولوجيا

اجل خلك شكايه بكايه بالمنتديات الرجل لابد ان يقاوم الظروف وامثالك هم من تخذلهم الدنيا وينسحبون ويقومون برمي مشاكلهم وفشلهم على الاخرين وعلى المجتمع انت ماقدرت تصلح نفسك لاتنتظر الدنيا تصلحك حاول تكون رجل وتقاوم الحياة مافيه شي بيجيك وانت مبردها تحت المكيف وتبغى راتب في العلالي فوقها

[QUOTE]وبعدين المكافاة كلها 950 ريال وش بتسوي في الزمن هذا
الي راتبه 7000 ريال يعتبر فقير مديون مهموم فما بالك 950 ريال او 1000 ريال[/QUOTE]

900 تكفي لطالب مع اخوياه ويركبون في سيارة واحدة
شوف اقرب معهد راح تلاقي ناس تروح معاهم

ابو 7000 عنده قروض وايجارات وبيت واسره 900 بدون اللتزامات تقدر تدف امورك وتمشيها لين ما تفرج الموضوع يبغاله شوي حركه وتتيسر

روح سجل وإذا نقبلت روح ادارة المعهد قول حاول تبحثون معاي ناس ساكنين حوالي الشارع كذا من شان اروح معاهم لان ما عندي مواصلات

من تتحرك صدقني راح تفرج بس تحرك

شوف على حسب معرفتي
روح مكتبة اكتب اسمك ورقم جوالك
في سيرة ذاتية بما انك بدون اي خبرة

يسوي لك سيرة ذاتية اهم شيء حط معلوماتك
اسمك رقم هويتك تاريخ ميلادك وجوالك
واكتب عنوانك واسم الحي اللي انت فيه

سوي منها نسخ كثير مثلا 50 نسخة ...

مر على المحلات - بقايل - محامص - مكتبات - ملابس - سباكة
بمعنى اصح كل المحلات جنب بيتكم عطهم نسخه
حتى المكتبة اللي سويت فيها السيرة الذاتية عطهم

وقول لهم اذا محتاجين موظف انا ساكن هنا جنب المحل
وعطهم نسخه من السيرة الذاتية حتى لو قال لك مافي وظيفة
عطهم نسخه وقول خلوها اذا احتجتم موظف تكون موجودة

حاول تروح لهم وانت مظهرك كويس ... وركز على هالشيء

لاحظ هالحل لشخص يبغى لقمة عيش ويبغى له دخل
حتى من خلاله يقدر يكمل حياته سواء دراسه او متطلبات
وترى وضائف المحلات سهلة وحاجتهم لك بس على النظام
يعني تقدر تروح الجامعة وتداوم معهم بعدها

====
شيء ثاني ابغى اقوله وشدني في كلامك
اذا مستقبلا لقيت احد من خوياك يوصلك
يفضل تعطيه مبلغ وهو لوحده ...

مثلا عطه 300 ريال وقل له هذه مو حق وقفتك معي
بس اتمنى تساعدك اشوي بالبنزين وحتى لو يرفض
انت اصر تصر الحاحاً . حتى لو كان خويك الروح بالروح

وحتى لو كنت انت اللي تنتظره على الشارع
ضروري تعطيه مبلغ حتى ما يشوفك عاله


الله يوفقك

الشباب عطوك مواقع
وشخص اخر اشار الى طاقات ...
راح تساعدك سجل فيها اذا تشوف فكرتي ما تناسبك

والله يخوي انا كنت في وضعك وكنت محبط وفكرة العطالة تعمقت في عقلي فصارت هي الشيء الوحيد الي اشوفه, اعيش بناء عليه, واتصرف وفقه.
صدقني من علق أمله بالله وثم اجتهد بيجيه الخير ولو بعد حين, ووقتها بيقول انا كنت اشوف الاشياء بنظرة مختلفة وراح تفتح عيونه ونفسيته لأمور جديده.
لكن هالتغير ماراح يصير فجأة, تدريجياً باذن الله.

الي عليك حالياً, تجتهد والا ماراح يتغير شيء.
الاخوان قالوا لك عدة طرق,, ممكن تكون احدها تنفعك وممكن شيء مختلف تماماً.
الي عليك فقط: تجتهد.
سواء بالتقديم على الشركات والمعاهد والجامعات. (لا تخلي اعلان يمر عليك الا تقدم,, لأنه من بين 100 اعلان تقدمه, 99 ماراح يقرون 1 راح يقرون,, فانت تعتمد على الكثرة)
او العمل الحر او التجارة أو التطوع
كلها أمور تجتهد فيها.