للاسف الموضوع منتشر وكذب واستغلال النساء خصوصا وقلة الوعي


خلاصة لازم هناك جهة رسمية واحده تجميع جميع اعلانات رغبة التوظيف
اما كل قطاع يعلن في موقعه طيب ايش عرفني في القطاع كذا في تاريخ كذا فتح التقديم


خلاصة الموضوع يحتاج توعية و جهات حكومية عديدة لحل هذي المشكله

كله كوم والي يبي يبيعك كتابك لتجارة الاشتراكات الرقمية كوم اخر .

أو اللي أشغل خلق الله بموضوع الدروب شوبينق علشان يبيع دوراته ويتكسب :3:

خذها قاعدة: الي جيبه مليان يشعر بالنشوة في الحياة عند التنظير على الفقراء والمحتاجين .

الحل ببساطة وفّر وظائف سنعة للشباب واخفض من نسبة البطالة بوظائف حقيقية
ضع شروط قوية على القطاع الخاص تحفظ حق المواطن، وضع قوانين تسهيلية له واجعله مغري للشباب
وعندها لن تجد أحدًا يلهث وراء كتابة آلف حرف مقابل 9 ريال
ولن تحتاج لهيئات للقضاء على الكذب والوهم ، لأنه له تجد أحدًا يستمع لهم أصلاً

من خبره 7 سنوات في البحث عن وظيفة

وباستثناء الوظائف الحكومية الي لها الية معينة كل سنة وطريقة واضحة

99٪ من الوظايف الي تجدها في وسايل التواصل الاجتماعي هي كذب في كذب
مادري صراحة وش هدفهم من انهم يعلنون عن وظايف وفي النهاية محد يتوظف
هل هو اجراء روتيني فقط انه ترا طرحنا وظايف ولو بالاسم ؟ الله اعلم

ممكن هالشي كان زمان
لكن اليوم اكاد اجزم يعني في اخر 5 سنوات انه احد لقى اعلان وظيفي في تويتر مثلا وقدم عليهم واتوظف
هل السبب انه اعداد العاطلين كبيرة يعني الوظيفة الي يعلنون عنها تلقى عدد المتقدمين 3000 او 6000 شخص
يعني فرصة انهم بس يشوفون السي في حقك 0.01٪ فما بالك يتواصلون معاك فما بالك يقبلونك هذا اذا اصلا وصلهم السي في من الاساس
لحد يضحك عليك ويقولك اخطاء شائعة في السيفي او لينكد ان او او او

طريقة التوظيف الوحيدة حاليا هي عن طريق المعارف مو شرط واسطات
ولكن تسمع عن وظيفة عن طريق (شخص) وتروح تقدم ويقبلونك
او تتوظف في جهة معينة وتنتقل لجهة اخرى وهكذا
او اعلان وظيفي غير مطروح في السوشال ميديا مجرد رابط من استبيانات قوقل كذا ممكن

يعني لو بتنصح احد بدال ماتنصحه وتقوله سجل في لينكد ان وكيف يكون حسابك قوي وكيف تسوي سيفي احترافي وتاخذ دورات والاسطوانة المشروخة ذي
انصحه قبل كل شي تكون عنده علاقاات

انصح اي احد مازال في مقاعد الدراسة انه يفكر في مجال توظيفه وهو مازال يدرس لان زمن انك تتخرج وتقدم على وظايف يبدو انه اصبح من الماضي
لا ادخل تخصص التوظيف فيه شيه مضمون المجال الصحي مثلا
او تدرج وظيفي لشركة معينة
او حاط قدام عيونك وظيفة معينة وشايف شروطهم وكل شي وبناء عليها تدخل التخصص
ياحبذا لو كان التخصص تقدر تعمل فيه حر بنفسك مثل البرمجة وغيرها وياسلام لو كان التخصص هو شغفك

الوضع يا صاحبي صار رأس مالية الوظايف المتوفرة هذا اذا لقى يا كاشير و لا حارس أمن حتى اللي عنده شهادات اذا لقى له وظيفة براتب ٥ آلاف زين الأوضاع قد هي بالجرف.


الله يصلح الأحوال

واتساب في يد كبير في السن هذا آفة العصر الحالي

وسلامتكم
سواء في وظائف
او مشاكل اسرية
او اطباء وعلاجات
او مشاكل اطفال
او سيارات

الله يحفظهم ويطول باعمارهم
لكن صعب انهم يقتنعون بكلامنا
وهم يشوفون المقاطع واللي يصور يتكلم بكل ثقه فيصدقون
وما الومهم صراحة
اللوم على اللي " يكذب " ويعرف انه يكذب بس عشان مشاهدات او متابعين او ترند

على وقت الكورونا خلال سنه وحده فقط عملت عشر مقابلات من مؤسسات صغيره لشركات كبيره و تحس من الكثير منهم عدم الجدية

من الحلول اللي اشوفها بتقضي على هالظاهره الوزاره تعمل رابط للشركات عند التوظيف تعبي فيه البيانات التاليه


الوظيفه : محاسبة

الخبره المطلبوبه: 2-5 سنوات

اللغه : يكون بناء على درجتك في اختبار معين مو تقييم شفهي حسب المزاج
الشهادات : .......

و يكون على كل معيار درجه معينه لاجل تفاضل بين المتقدمين

و من ثم تعبي اسماء المرشحين : محمد - علي - خالد - احمد

و لازم توظف من الاربعه ذولي . صح بيكون فيه مجال للتلاعب بحيث اذا انا بوظف شخص اختار منافسين ضعيفين بحيث بعد الترشيح يكون هو الافضل لكن خلينا نقول مو دايما هالشي بيصير و يكون التوظيف تحت مراقبة الوزاره و مو على كل وظايف الشركة يعني 75% تحت المراقبة و الباقي خلهم يختارو بطريقتهم

مستحيل تسيطر على التوظيف في الشركات
في النهاية هو بزنس خاص ويحق له يوظف اللي يبي في الأخير
حتى الهيئات الحكومية الآن توظيفهم معتمد بشكل كبير على العلاقات

في شركة تقنية وظيفتها انها تعمل تقييم للمتقدمين هما جهة توظيف للوظائف التقنية الـ Mid level وال Advanced طرف ثالث يعملوا اختبارات فنية والجانب النفسي وممكن مايصير في قبول للشخص من البروفايل الي يقدم عليه من البداية وهما مايدوروا على شركات لا . هما متعاونين مع شركات يشوفولهم موظفين يعني بعد ماتنقبل من شركة الطرف الثالث كل الي تسويه مع الشركة الي بتتوظف معاهم مقابلة بسيطة ويوظفوه عندهم . يريت يكثر هذا النوع من الشركات الي تعمل تقييم ويكون موجود عندهم بقاعدة بياناتهم حتى تختصر وقت كبير للمتقدم وللشركات ايضاً وبعدها يتم استحواذ على هذي الشركات من صندوق الإستثمارات السعودية وحرص على تدوير الموظفين بحيث مايكون في فساد واسطات لأشخاص من دون كفائة

للأسف كيف تقدر تقنع كبار السن والشيبان بهذا الكلام ممكن الصغير والعاطل عنده فهم ووعي بهذي الأمور لكن الكبير يحسب العاطل قاعد يتدلع والوظائف بالهبل موجودة في كل شبر تحصل وظيفة متاحة فيها بكل يسر وسهولة , (الله يرزق كل عاطل) .

أتذكر زمان كنت اقدم على مواقع مثل انديد و بيت كوم وغيرها من الخراط ولا عمري مرة وحدة سمعت رد منهم كنت أعتقد أني ما ساتحدث اتوظف ولا في شيء غلط وكذا لكن اتوقع انهم كذابين
لاني كنت اقدم على كل انواع الوظائف من ابسط وظيفة الى اكبرها ولا قدر جا رد او حتى مقابلة مرة وحدة لمدة سنتين !! لو اني ما معي الا شهادة ابتدائي كان طلع اسمي ولو مرة عندهم بس شكلهم كذابين وفعلا مدري ايش بستفيدون لا تعطيهم فلوس ولا شيء

لا تفوتك المنتجات الرقمية، بصراحة فيها رزق، واحد مصور محادثته مع اخوه، كان يبي منه عشرين ريال للعشاء، قال له
اخوه انقلع يا زلابه ولا ريال بعطيك، ثم قرر يفتح متجر منتجات رقمية برامج وتطبيقات وكتب، فسبحان مغير الأحوال تغير
حسابه من صفر ريال إلى 17 الف شهريا، واذا شد حيله يجيب 25 الف!


واذا انت طموح وتبي تشتري لك فيلا دورين مع مسبح، اشترك بدورات عبدالله الفوزان، بصراحة خطيرة جدا، تنقلك من
الصفر إلى الثراء بغضون أيام بسيطة، واذا تبي تؤكد ثراءك أكثر مر على سمية الناصر خذ منها طاقة الثراء.




لكن ليش هم يسوون كذا؟
لأن هذولا يدورون المتابعات، واغلب الناس عندهم شغف بمتابعة أي شخص يرشدهم للثراء المزعوم، حتى وهو كاذب،
بس مع ذا يرغبون بمتابعته، لكن تعال افتح حسابك وبيّن ووضح لهم أن الطريق للثراء صعب، وأن الفكرة التجارية هذي
مستهلكة، وأن المشروع الفلاني غير مجدي، محد يبيك.

ما زالت الوظائف رزق يسوقه الرحمن الى عبده

ان اراد له الخير وهو من اهل الخير رزقه الله .


الشهادة والطموح والمعدل ومن ثم التقديم في

مواقع الشركات الاصلية والله ولي التوفيق

الافه الكبيره ان الان كل اللي ردو مركزين على مجال الوظايف وتاكين يدورون وظايف طيب انت بدال ماتدور وظيفه ليه ماتصنع فكرة والفكره تصير مؤسسه والمؤسسه تصير شركه وتصنع لك فرصه وظيفيه بدال ماتصنعك فرصه وظيفيه !! للاسف هذا اللي مخلينا راجعين 50 سنه ورا ومتكلين على الشركات الاجنبية مع كامل احترامي الشديد

يوم كنت ادرس بالجامعة باليابان تقريبا 90% من الطلاب موقعين عقد مع شركة بالسنة الثالثة من الدراسة يعني اول ما تتخرج على طول تروح تبدء عمل



والشركات على قفى من يشيل في جميع المجالات


لولا ظروفي الخاصة كان توظفت هناك بدال ما اشوف الناس تتوظف بالواسطات , الشركات تعلن عن وظايف وهي اصلا محددة مين تاخذ من قبل بالواسطة الى من رحم الله


رحت بنك الراجحي الفرع القريب مني كل الموظفين نفس اسم العائلة مصخرة عيني عينك

لو الموضوع بالسهولة الي تقولها كان الكل سواه
الكلام سهل مرة ، ومو كل شخص تستهويه فكرة
إنشاء شركة و إداراتها و الوجع الرأس الي يجي مع هذه
وهذه إذا ما تكلمنا على أنه في نسبة كبيرة جدا أن الشركة تفشل
وهذه الي اعرفه أنه معظم الشركات تفشل وما يبقى منها إلا الأقوى

اخخ لو حصلت لي فرصة ادرس باليابان واشتغل كان سويتها ؛(

طيب يا اخي الكريم لو سلمنا بكلامك كم يحتاج الشخص من سنة ليبني مؤسسة محترمة؟ ومن وين له الفلوس اصلا ليحول فكرته لمؤسسة ؟ وهل هي مضمونة النجاح اصلا ؟ وهل المقابل المادي من المؤسسة يسمح له يفتح بيت ؟ وبما انك ذكرت فكرة المؤسسة ليش ما تبدأ وتغتني فيها وتقدمنا 50 سنة وتوظف الشباب؟
اللي يده بالنار مو مثل اللي يده بالماء