السلام عليكم ورحمة الله وبركاته

مع اقتراب موعد صدور لعبة Starfield
ظهرت كثير مخاوف انه فيه كواكب فاضية والكواكب هذي راح تكون مملة
المقال هذا مو الهدف منه الدفاع عن Starfield وانما تقديم
وجهة نظر مختلفة انت بنفسك ممكن تتفق معها بس انت حاليًا
ما تعرف ذا الشي لأنك ما قد جربته او جربته لكن بقناعة سابقة انه 100%
راح يكون حاجة سيئة وبالتالي ما عطيته فرصة فعلية.

تدري انه اكثر شي متحمس له بلعبة Starfield الجديدة هو الكواكب الفاضية ؟
فكر فيها، تشوف كوكب وتنزل عليه وتشوف بيئة مختلفة وغريبة
وعليه مخلوقات اول مرة تشوفها بحياتك ! حتى لو الكوكب ميت
انك تشوف منظر الكوكب والتضاريس والسماء حقته وكيف شكل الاقمار
إلي حوله هذي ماهي تجربة بحد ذاتها ؟!

مو لازم كل كوكب تنزل عليه تحصل عشر ساعات محتوى
وتسوي خمسمية مهمة جانبية عشان تحس انه والله شي يستاهل
بعض الاحيان انك تنزل نص ساعة تشوف كيف شكله وكيف بيئته
وكيف شكل المخلوقات عليه وكيف شكل النباتات
وبعدها تمشي وخلاص راح يعتبر تجربة حلوة بحد ذاتها !

هذي التجربة وهو انك تحس انك عايش بالفضاء وراح
كل شوي تشوف بيئة جديدة ماهي متوفرة إلا بلعبتين
Starfield و No Man's Sky وللأسف NMS
خسرت ذا الشي من بعد تحديث NEXT إلي
حسن كل شي باللعبة لكن للأسف قتل تنوع البيئات
بالكواكب حقتها ولليوم المطور ما قدر يرجع ذا التنوع.

سالفة انك بالفضاء وكل شوي راح تنزل على كوكب جديد وراح
تشوف منظر جديد حاجة نادرة مرة بألعاب الفيديو وهي تجربة مميزة بحد ذاتها.

غير فكرتك شوي، الكواكب الهدف منها انك تشوف بيئة جديدة
وتشوف حاجة جديدة وهذي تجربة بحد ذاتها تستاهل انك تعيشها
الموضوع زي الالعاب إلي الرصاص فيها قليل لو جيت لها بعقلية انه الرصاص القليل
حاجة سيئة و100% مستحيل يكون حاجة حلوة ما راح تقدر تشوف إلي يميزه
وغالبًا بيخلص رصاصك من اول مرة وتعصب وتحذف اللعبة.

لكن لو جيت بعقلية ثانية وهو انه قلة الرصاص راح تضيف تجربة
مختلفة وراح تضيف تحدي اكثر وبتخليني اندمج مع اللعبة بشكل اقوى وإلخ
ممكن انك انت برضه ما تحبها بالنهاية هذا ذوقك ولكن ممكن كمان
انك تكتشف انه والله التجربة هذي فعلًا تستاهل وتصير حاجة
مفضلة عندك لأنك عطيتها فرصة.

لليوم اتذكر قبل سنوات كنت قاعد اشرب شاهي اخضر
ونزلت على كوكب في لعبة No Man's Sky وشفت السماء حقته
وكانت من اجمل مناظر السماء إلي شفتها بلعبة !
ما اذكر اي حاجة ثانية سويتها على الكوكب هذا
لا قصة ولا مهمات جانبية ولا قتال.

وبالرغم من ذا الشي عشت تجربة عليه لا تزال عالقة بدماغي
كمية الاسترخاء إلي كنت عايشها وشعور انك على
كوكب ثاني خلتها ذكرى موجودة دايم معي.

وهذا إلي مخليني اكثر شي متحمس للعبة Starfield
وهو الكواكب حقتها إلي كثير ممكن يعتبرها "فاضية" لكن بالنهاية
فيه مليون لعبة راح تقدملك قصة ومليون لعبة راح تقدملك عناصر rpg
ومليون لعبة راح تقدملك نظام قتال لكن انه تحس انك عايش
بعالم فيه مئات الكواكب إلي تقدر تزورها وكل وحدة منها
تعطيك منظر مميز هو حاجة نادر مرة نشوفها.

اسلوب لعبي المفضل غالبًا في starfield راح يكون إني اروح
لكل كوكب باللعبة واسوي scan لكل حاجة عليه
راح اشوف كل بيئة ممكن تكون موجودة باللعبة وشكل
كل كائن ونبتة واعيش جو اني قاعد اسافر لكواكب ثانية.

فاهم انه ناس كثير ما راح يحبون يسوون ذا الشي لكن ودي
على الاقل انه اكبر عدد يجرب ويعطي الموضوع فرصة بدون ما يدخل
بعقلية انه مليون بالمية هذا الشي راح يكون مخيس لأنه
ما راح تعطيه فرصة اصلًا لو انك داخل بالعقلية هذي وما تدري ممكن يعجبك.

واعذروني على الاطالة :27: