وعليكم السلام ورحمة الله وبركاته , شوف ي عسل ما فهمت كلامك ولا وش تبغا ووش دخل الحج , ولكن السكوتر التجاري بتلاقيه نفس تصميم حق شاومي بالملي ولكن افضل من ناحية سرعة يعطيك 40كم عكس حق شاومي الي حده 25كم بس , البطارية ما اعرف والله عن شاومي ولكن التجاري يقعد معك 5 ساعات تقريبا ويمكن تزيد على اقل سرعة (20كم) , ويشحن نفس المدة ذي , طيب الحين موضوع الراحة , حق شاومي يجيك بدون كرسي وبدون انوار (بس خلفي للفرامل وامامي قوي للرؤية) , فيه نوع مدري وش هو يجيك لمبات وكرسي وبوري وحركات بس شكله غالي وحول 2000 ريال ,وتفرق الانواع .

شاومي تلاقاه بحول 1700-1500 (لا تشتريه الا من موقعهم او مكان معتمد مره لان قلت لك التجاري زيه بالملي)
التجاري تلاقيه بكل مكان وسعره حول 1000 (هو الي عندي وخرب مره وغيرت بطاريته ب150 وله معي سنة ونص تقريبا)
الاثنين يجي معهم جرس مو بوري (يعني حق تسمعه باذنك ما ينفع قدام السيارات)

موفق ي عسل ولا تنساني من دعائك (:

يعطيك العافية
لقيت شاومي وسيقواي
لكن فيه تجاري عليه ضمان تشغيلي فقط
انا احتاجه للتنقل من موقغ السيارة الى موقع العمل بالمنطقة المركزيه
تقريبا 10 كيلو رايح و10 كيلو راجع تقل احيانا حسب الموقف
السرعه مو مهمه كون وقت الحج الدنيا زحمه
الشاومي لقيت وكيله عصر الجوال
ويباع في اكسترا واكسايت لكن فيه اكثر من نوع عشان كذا احترت

حياك الله يالغالي بالنسبة للسكوترات الكهربائية انا اقترح عليك تركز على حجم البطارية عندك مثل شاومي 2 برو سعة بطاريته 13000 ملي امبير يعني عدد مرات شحن اقل في الاسبوع ويصمل معاك الى اقل شي 40 كيلو

انا شاري واحد من البحرين من السوق الصيني قبل سنة
لـ ابن صاحبي وبصراحة شغال معه زي اللوز الى الان مع العلم اني توقعت انه خرابيط
كلف 700 او 800 ريال ناسي
وسريع بصراحة وفيه شاشه تعلمك البطارية كم فيها ... الخ

طبعا انا لي تجربه سابقه بالبطاريات العاديه قبل منعها من الطياره كانت كلها خرابيط
تشتغل يوم وتخرب ثاني يوم وهكذا
لكن ما اعمم كذلك انصح انك تاخذ من شركة محترمه لسببين اولا الجوده ثانيا عشان موضوع البطارية انتبه هذي قنابل بالبيت

انا بقولك نصيحة

اذا كان مشوارك عليه علي الازفلت والازفلت مو نظيف ركز علي سكوتر تكون كفراته كبيره او اوف رود ويفظل يكون فيه سسبنشن لانك لو اخذت عادي او كفرات صغيره راح يزعجك ولا توصل الا رجولك منمله

واذا طريقك ممهد يعني رصيف او ممشي او ازفلت نظيف مافيه اي تكسرات خذلك شاومي برو 2 حلو ويمشيك بشحنه الواحدة تقريبا 35 كيلو

وركز ع كم كيلو يتحمل ولا تاخد اقل من 100 كيلو



ينفع للكل الضعيف والمتين

الله يعطيكم العافيه جميعا
انا توكلت على الله واشتريت شاومي برو 2
والطريق الحمدلله مسفلت وممتاز
وفعلا افدتوني كثير بارك الله فيكم