انا مع اخذ اللقاح
لكن ضد الاجبار

بس الاجبار فينا فينا، بالبداية يجيبون لك حكام ومسؤولين، ثمن خصومات، ثمن الوظايف، والحين غصب

مع اخذ اللقاح وبقوة للامانة لانه الخيار الوحيد المتوفر ؛ والقرار هذا من مصلحة جهة العمل ايضا

انا والله ماني مقتنع فيه اطلاقا


ولكن اخذته بسبب عملي والسفر والحياه الطبيعيه


لكن ماصار فيني وشي من اللقاح بس ع المدى البعيد فيها كلام كثير

نعيد ونقول
كل شخص لديه كامل الحرية في الاختيار وهذا كلام وزير الصحة وليس كلامي

تبي تتلقح الله يقويك ونشجعك ومحد اعترض
اما سالفة الاجبار هنا محد يرضاه شرعا وقانونا

نعيد ونكرر مالها علاقة الحرية الشخصية في موضوع مثل هذا
حريتك في حال كانت تتسبب في الضرر بالاخرين تصير خط احمر
حريتك تتسبب في استمرار الازمة وتعطيل مصالح وحياة الناس والمجتمع
لأن انهيار النظام الصحي يعطل كل شيء معه بما فيه ارزاق الناس

في الدول المتقدمة في اولياء امور ما يبون يطعمون عيالهم قبل الدراسة وما يحق لك تدخل ولدك المدرسة بدون تطعيم ما تبي تطعمه خله عندك وبعض الدول يحولنك محاكمة لأنك ما طعمته ولا دخلته مدرسة
ليش ما قالوا لا للاجبار؟
ليش ما قالوا حرية شخصية ؟

حريتك فيما يخص هالموضوع في بيتكم وانعزالك عن المجتمع فقط اما بخالط الناس والمجتمع وما ابي اتبع قوانين تهدف لحمايتهم لا والف لا مع نفسك

ملاحظات هامة


اللقاح لا يحمي من الاصابة ولكن يقلل اعراضها وشدتها
اللقاح لا يمنع انتقال العدوى للآخرين ولكن يمنع تكاثره وطول عمر الفايروس بجسمك من 14 يوم الى 5 ايام بالكثير وبالتالي فرص عدوى اقل بكثييييير
واهم هدف من اللقاح انه يمنع نشوء تحورات وتطورات جديدة بشكل الفايروس قد لا تكون اللقاحات فعالة معها مثل ماهو حاصل بالمتحور الهندي (انخفضت قوة اللقاح معه لكن ما انعدمت) وبالتالي يكتسب المجتمع مناعة مجتمعية ويتلاشى الفايروس

وشلون يتحور ويتطور؟
الفايروس ذكي كل ما دخل جسم انسان يكتسب خبره وطرق لتجاوز جهاز المناعة ويطلع من الشخص المصاب مكتسب خبره من جسد الانسان وجهازه المناعي لكي يتجاوز جهاز مناعة الشخص الاخر (يحدث ذلك بشكل بطيء) لكن اذا كان الاكثرية غير ملقح يحدث ذلك بسرعة (مثل ماحصل بالهند)
اللقاح يمنع الفايروس من اكتساب الخبرة والوصول للرئتين لأن الجهاز المناعي يعرفه ويمنعه قبل لا يتكاثر ويكتسب الخبرة
يعني كأنك حطيت تفتيش عند مداخل جهازك التنفسي

اخيرا اذا انت نجوت من الفايروس حاليا بدون لقاح يمكن ما تنجو اذا تطور وكسب خبرة

والدليل ناس صابهم الفايروس وتعافوا ومع ذلك ينتظرون موعدهم ياخذون اللقاح.. ليش ما قال انا قدرت اتجاوز الفايروس واتعافى بدون لقاح وشوله اخذ لقاح ؟

امريكا طعمت فوق 250 مليون من اصل 350 مليون ومع ذلك مسوين حظر للقادمين من الهند خوفا من المتحور الجديد اللي بسبب ممكن يحتاجون يعيدون التلقيح لو صار التحور الهندي اقوى من الحالي

بريطانيا تنتج اللقاحات وتبيعه بدون ربح فقط قيمة تشغيل مصنع ورواتب
امريكا تدرس طرح براءات اللقاحات للجميع عشان يقدرون يصنعون مثلها
وش السبب برأيك؟
لأنهم يعرفون ان الجميع بقارب واحد وصحة المجتمع اهم ونجاة لهم قبل اي شيء ثاني بعيدا عن الحرية الشخصية


بخصوص كلام وزير الصحة كان في وقت معين حسب المعطيات الصحية في وقتها

كلام المتحدث الرسمي بعدها قال كل شيء خاضع للتقييم المستمر والاجراءات تتغير بشكل مستمر حسب التطورات مع هذه الجائحة الفيديو موجود اللي يبيه يقولي

يمديك تشجع الناس بدلا من الضغط عليهم
لو مرة وحدة اقتدوا بالكفار صح :
هذي تغريدة لبايدن

[QUOTE]The rule is now simple: get vaccinated or wear a mask until you do.

The choice is yours.[/QUOTE]

وش فايدة اللقاح إذا ماحد يبي ياخذه لابد من أكبر نسبة تاخذه عشان اللقاح يثبت فعاليته بعدم نقل العدوى
وأحد الحلول للقضاء على المرض بمشيئة الله .

صح النوم... التشجيع من بداية وصول اللقاح ومافيه فايدة

الحرية الشخصيه تنتهي عند عتبة باب. بيتك
المجتمع له احترامه وخصوصا اذا الموضوع يمس صحة المجتمع

كيف نفسر العباره هذي: انا مع اللقاح بس اني ضد الاجبار

اذا انت مع اللقاح رح تلقح
اما اشغال طاقة المستشفيات الكامله وحرمان من له حاجه صحيه وتسميها حرية شخصيه
نظرت لحريتك فقط. لكن لم تحترم الاف المرضى اللي بحاجة المسشتفيات.

وش رايك يسوقون المجتمع بالعصا ؟
ما يضر لو استمريت بالتشجيع اللقاح مهما قيل عنه يبقى جديد و ما فيه لا حكومة ولا شركة تضمن لك ان ما له اعراض او اثار في المستقبل

بس الوزير مجرد شخص مثله مثلك ويقول كلام يتغير باي لحظة
يعني يقولك لك حرية الاختيار
لكن يجيك وزير الموارد البشرية يقولك ماتداوم الا لازم تكون محصن باللقاح
يعني فيه تضارب هنا

..

انا مع فكرة اخذ اللقاح لكن ليس بالاجبار

هههه وبايدن متى قال هالكلام الان << الان ترجع بعد ما طعم 255 مليون شخص من اصل 350 مليون
وبنسبة قريبة من 40% (جرعة كاملة)

لكن خل نشوف رأيه اذا ما وصل لهالنسبة وش بيكون

لا تصدق الكفار دايما

على فكرة 40% جرعة كاملة من الشعب + التزام بالكمامة كفيلة بنهاية الفايروس وضعف انتشارة وتححوراته يعني ما يحتاج يوصل 70% او 100% تلقيح عشان كذا يقول الامر سهل ههههه

بس هل بيلتزمون الناس بالاجراءات .. ما اعتقد يمكن الوعي عندهم يسبق كل شيء

اوكي خل الكفار على جنب
اجبار الناس و تحديدا على شي ما هو واضح و معروف بشكل كامل ظلم

واشغال طاقة المستشفيات بالكامل وحرمان من بحاجتها . ماهو ظلم .

الجهات اللي اي عرض صحي يصيبنا نتجه لها لأننا نثق فيها قالت آمن وش ابي اكثر من كذا ... تقدر تثبت انه غير آمن ؟

وانا لو اني من الشركات المنتجه للقاحات وحتى لو كنت واثق من لقاحي بقول نفس الكلام وبشيل نفسي من القضايا مو بسبب ان اللقاح شختك بختك لا.. الوضع كله في كرونا حوسة دول تعطلت والوفيات كثيرة والاحصائيات والتثبت من تسبب الضرر من اللقاحات غير ممكن في هالازمة وبدل ما يكون الضغط على القطاع الصحي فقط بيتحول ضغط اخر على المحاكم

ياغالي تراك من اول جالس تلعب على وتر العاطفة
كلامك هذا أتفق معك فيه يوم يكون اللقاح يمنع الاصابة ونقل العدوى
مين اللي يتنوم في غرف الطوارئ من مصابين كرونا ؟ كلهم كبار سن وأصحاب أمراض مزمنه
طيب خلاص الفئتين هذي لو اخذوا اللقاح مايدخلون العناية على دراستهم صحيح؟ طيب انا كشخص سليم ولله الحمد ماني مضطر اخذه بسبب سخونه عابره

الوالد الله يحفظه من بعد اخذ الجرعتين بدأ يفقد تركيزه ونقص وزنه بشكل سريع رغم مرور شهرين والله يستر من الجاي ، ليش ماهي مذكورة من ضمن الاعراض؟ ببساطه لأن اللقاح في مرحله تجريبية ومابانت كل الاعراض لسى ممكن تصل لسنين
ومن اول ماحبت أقول هالكلام عشان ماحب أخوف أحد

عموما الله يستر لا تقول غير الملقح هو سبب الاحتباس الحراري وكل الكوارث

ياغالي ماودي ادعي ان الله يبلاك بما يجبرك تروح الطوارئ ويرفضون استقبالك وتروح تدفع شهريا اكثر من سبعه الاف ريال. في احد المستشفيات الخاصه

اذا ماتحس في معاناة الناس او ماعندك فكر ان فيه ناس تنتظر مواعيد واحالات من مستشفيات اخرى ومراكز صحيه مشكله .
وغير صحيح ان كل اللي اللي مشغلين المستشفيات كبار سن فقط فيه من جميع الاعمار المعرضه للاصابه .

اتلكم بشي واقع ماهو بعاطفه مثل ماتقول والوالد الله يخليه لكم بصحه وعافيه لاتسمعونه الكلام السلبي عن اللقاح وبيشوف العافيه باذن الله .

لا للاجبار.

اللي يتعب من اللقاح كثير وهو فايروس معدل ايش تتوقع يصير له لو جته كورونا نفسها؟

الف سلامه على الوالد و الله يحفظه ويتم عليه بالصحة و العافية