بسم الله الرحمن الرحيم


السلام عليكم ورحمة الله وبركاته ، انقل لكم هذه تجربتي لخدمة AliExpress Direct ، اللي مايحب يقرا المواضيع الطويلة من الآخر الخدمة فاشلة وبجدارة


واللي حاب يقرا بالتفصيل يتفضل جميع التفاصيل من الطلب حتى الاستلام ،


موقع علي اكسبرس استخدمه من سنوات وطلبت منه اشياء كثييرة ولي تجارب هنا بالمنتدى للموقع وفيه غيرها كثيييير ماطرحتها

الموقع ميزته اسعاره الرخيصة مقارنة بالسوق المحلي وجودته العالية ايضًا ،

مثل اسلاك الـHDMI بالسوق العادي اللي يخرب بسرعة سعره 20 ريال والنوعيات اللي تعيش وكويسة سعرها 40 - 60

بس سعر النوعيات الكويسة بنفس الموقع ماتتجاوز 4 دولار يعني 15 ريال تقريبًا !

والشواحن ايضًا اللي عليها الكلام من السوق بمبلغ وقدره وبالموقع سعرها رخيص جدًا وهذي ميزة

بالبداية مجموع الطلبات 21 طلب بمبلغ حدود 150 دولار تقريبًا



الشحن كان مجاني ، بعد ماطلبت من تطبيقهم بالجوال وجيت للدفع رفض يدفع ، ضغطت مرة ثانية وليتني ماضغطت بس رفض يدفع ايضًا ،

رحت ابي ادفع بشكل يدوي لقيت الطلبات 42 لأني ضغطت الضغطة الثانية !

وجلست ادفع لكل طلب لحال واكنسل المدبلة واستغرق مني اكثر من ساعة تقريبًا ولكن انتهيت من الموضوع ولله الحمد ،

طبعًا الطلبات يوم حطيتها بالسلة كنت متأكد 100% ان كلها تنشحن عن طريق خدمة علي اكسبرس دايركت ولكن بعد الطلب فيه طلبين انشحنوا للبريد

ولما رجعت دخلت صفحات الطلبين لقيتهم معدلين طريقة الشحن من علي اكسبرس دايركت الى البريد الصيني وسعر الشحن دولارين

قلت مو مشكلة لعلها خيرة ، الطلب كان بتاريخ 15 سبتمبر والشحنات اللي مع علي اكسبرس دايركت وصلت بتاريخ 5 اكتوبر

والشحنات اللي ع البريد وحدة وصلت بـ1 اكتوبر ووحدة ماوصلت الى الآن !!

يعني البريد الصيني يوصل اسرع من ارامكس !!

طبعًا نسيت اقول ان الشحنة انقسمت الى طردين كلها مغلفة وداخلها الشحنات الاساسية ،

يعني اخذوها زي ماهي وحطوها بأكياس وارسلوها مع ارامكس !

اجمالي الطلبات 21 وانشحنت مع البريد اثنين يعني صار الباقي 19 ، اللي وصلني مع ارامكس 17 وشحنتين للحين ماسوو فيها شي

الاولى حالتها بتتبع موقعهم الصيني cainiao ماتطلع لي معلومات والثانية يطلع Waiting for pick up


والشحنات اللي استلمتها كلها ممتازة بس فيها ريحة سمك مزعجة جدًا وفيه شحنة طالب 5 حبات منها ووصلني 4 وكلمت البائع وانتظر رده


مبدأيًا الخدمة سيئة وتخليك تقعد على اعصابك فما انصح فيها ابدًا ، التغليف وجوده وعدمه واحد

لو تأخر عليك بائع بتتأخر باقي الشحنات كلها ،

في مثل حالتي حاليًا الشحنتين اللي باقي مانشحنت ماادري وش مصيرها ولا ادري بيرجعون لي شي ولا لا

وايضًا الواحد يستخدم الخدمة يبي يرتاح من البريد والوقفة والانتظار والقلق وبالاخير بعض البائعين يسحب ويرسلها على البريد !!



طبعًا مادفعت ولا ريال لأرامكس لأن البعض يقولون فيه ضريبة وفيه رسوم مناولة بس انا ماطلبني ولا ريال



بالبداية كنت احسبها شحنة وحدة ويوم دخلت تطبيقهم لقيتها شحنتين فأنصح الجميع بالتسجيل في تطبيق ارامكس على الجوال

يجيك اشعار في حال وجود شحنات قادمة بنفس رقم الجوال اللي مسجل في التطبيق ،

طبعًا الشحنتين اللي على البريد للحين ماستلمتها وماادري عنها انتظر يوصلون كلهم واروح مرة وحدة

واخيرًا وليس آخرًا عن نفسي لن اشتري منه مجددًا الا اذا كانت اغراضي كلها من بائع واحد او كان الشحن عن طريق البريد

بالسابق كنت اشتري منه اشياء ماتفرق معي متى تجي مثلًا اسلاك HDMI اطلب كمية واذا قربت تخلص اطلب غيرها

اما حاليًا لو بطلب كمية بدفع على الشحن لحاله 8 دولار او اكمل الطلب ل90 دولار

فبالنسبة لي اشوفهم قتلوا الموقع بخدمتهم السيئة هذي ، يعني لو خلوا البائعين يوفرون الشحن اختياري اشوفه افضل بكثييير

اما كذا السلع كلها تقريبًا مع هالخدمة السيئة هذا الشي يخليك تعيد التفكير في الطلب من الموقع ككل ،

البديل الافضل اللي وجدته هو موقع بانقود ، https://www.banggood.com




وبالختام ياليت اللي جرب الخدمة يطرح تجربته ويفيدنا والسلام عليكم ورحمة الله وبركاته.