هذه النماذج لفتح بوابة دفع فقط وليس فتح حساب بنكي تجاري

هذه المستندات تم شحنها لشركة telr وهم بدورهم يتواصلوا مع سامبا

ايه فاهم عليك

قصدي بعد ماافتح حساب سامبا، من وين اجيب النماذج عشان اعبيها واشحنها لتلر؟

عادي اخوي تابع معي:

شركة الفيزا و الماستر كارد + البنك + مزود الخدمة مثل هايبر باي

كلهم يكسبون من النسبة على كل عملية في متجرك نفس ما ذكر في رد اخونا:

للبطاقات الائتمانية ( فيزا / ماستر كارد ) : 2.6% + 1 ريال
مدى : 1.75% + 1 ريال

يعني لا تتوقع قصدهم ان الرسوم 0% على العمليات الشرائية اللي توصلك :33:

أساسا رسوم التأسيس هذي نصبة و مالهم داعي يطلبونها و هي تعتمد على حسب الشركة يعني لو تأخذها بمنظور عالمي فيه شركات كذا و شركات كذا كل واحدة و سياستها و فكرها بالتجارة و كيف نظامها

بالنسبة للرسوم الشهرية هذي تعتمد و انا اقول ما يحق لهم ياخذونها الا بحالات معينة مثل لو كان البائع صغير و مبيعاته بسيطة هنا منطقياً يحق لهم ياخذون عليه رسوم شهرية عشان يغطون من مبيعاته اللي ما تجيب مدخول للشركة
يعني ما يمانع لأن الموضوع لازم نسبة و تناسب ما ينفع يجيك بائع مبيعاته بالشهر 1000 ريال و بالنهاية الشركة ما يتكسبون من وراه الا اقل من 20 ريال لأن بهالحالة صار البائع الصغير هو اللي كسبان :d

دائماً بالتجارة ادفع اكثر = احصل على سعر افضل

فيه بوابات الدفع بعضهم لو مبيعاتك عالية تقدر تفاوضهم و تحصل على نسبة اقل من المعروض



تتواصل مع شركة تيلر مباشرة و يرسلونها لك

الموضوع يكون بينك و بين تيلر يعني مالك علاقة في مراجعة بنك سامبا

وضحت الله يعطيك العافية

فهمت عليك :17:

بالنسبة لتيلر هل لازم بنك سامبا فقط؟ ووش رسومهم؟

شكرا

نعم لازم سامبا

الرسوم تحصلها في موقعهم و في الردود السابقة

حالياً حتى الان ما بدأت اتعامل معهم

ارسلي رسالة على الخاص وأرسلك رقم جوال الشخص المسؤول في البوابات السعودية

السلام عليكم



موضوع أكثر من رائع واستفدت منه كثير


والحين حبينا نفيد


انا فتحت حساب مؤسسة عن طريق الأون لاين في بنك البلاد


السجل التجاري تجارة إلكترونية


للأسف بسبب انها تجارة إلكترونية يوم اتصلت وكلمت الموظف قالي التجارة الألكترونية لازم فتح الحساب من الفرع ولكن في احتمال ان الحساب يكتمل ويفتح عادي (يعني حاليا معلق الحساب اما يوافقون او ارجع وافتح حساب جديد من الفرع)
(رغم اني قدر ادخل على الحساب اون لاين بالاضافة انهم ارسلوا لي بطاقة صراف بس لسى ما استخدمتها


تحديث: [COLOR=navy]رجع البنك دق علي وقال الحساب اعتمد وشغال تمام يعني نقدر تقول ان بنك البلاد فتح الحساب في بالأون لاين بدون مراجعة الفرع وبدون عنوان وطني مسجل [/COLOR]




بعدها سألته عن بوابة الدفع الإلكتروني وافادني بالآتي:


1- رسوم تأسيس 2000 ريال

ولكن قال الموظف ممكن تقدم استثناء عليها ولكنه غير متأكد هل في حالات استثناء تم قبولها أو لا


2- ريال واحد عن كل عملية


3- نسبة البطاقات الائتمانية 2.5% + 5% من مبلغ العمولة ضريبة مضافه
انا حسبتها تصير النسبة بالضبط 2.625% شاملة الضريبة



4- نسبة بطاقات مدى 1.75 + 5% من مبلغ العمولة ضريبة مضافه
برضوا حسبتها تصير النسبة بالضبط 1.8375% شاملة الضريبة


البوابة المتعاملين معها هايبرباي hyperpay


تحديث: تراسلت مع هايبرباي عبر الأميل وكانت استجابتهم وردهم سريع .. المهم انهم عطوني جدول بكامل البنوك والعمولات والرسوم



يعني الرسوم الشهرية ورسوم التأسيس تعتمد على البنك
فانا اشوف افضل عرض بنك الجزيرة بدون رسوم تأسيس وبدون رسوم شهريه :17:
هو وساب كذلك بس ساب خبري فيهم انهم معقدين في فتح الحسابات عشان كذا راح اشوف الجزيرة









وسلامتكم






********
طلب مساعدة
للي سوو عنوان وطني للمؤسسة


انا تعبت وانا احاول اسوي عنوان وطني ولكن كل شوي تواجهني مشكلة


فلو احد سوى عنوان وطني للؤسسة ياليت يساعدني ويعطيني الطريقة بالتفصيل


مع العلم اني رحت البريد وقال ماعد نقدر نسويه من عندنا لازم انت تسويه اون لاين
والاون لاين يطلب رقم منشأة ويرفض اني اكمل الإجراءات بدون رقم المنشأة رغم انه موضح في موقعهم انك عادي تقدر تكمل الخطوات بدون رقم منشآة


ورجعت البريد وقال مقدر افيدك

رحت لمكتب العمل وقال لازم تسجل أون لاين
وسجلت اون لاين وسجلت المنشأة وطلع لي رقم ولكن للأسف حاولت اسجل فيه العنوان الوطني يعطيني خطأ في التحقق
مع العلم ان المنشأ وافقت عليه مكتب العمل وبأنتظار موافقة الوزارة الداخلية


الحين لي شهر المشكلة اني مداوم ومقدر اتفرغ 100% واذا تفرغت كم يوم لازم تجيني عرقلات جديدة تخليني أأجل ..

المشكلة ان كل البنوك طلبوا عنوان وطني



فهل من حل للعنوان الوطني هذا لأنه من جد تعبني



وشكرا

وعليكم السلام.
لأنه من ذكائهم الزايد تقريباً كل شي من ضمنها حسابات البنوك (الين مابدأوا يقبلوا التجارة الألكترونية قبل فترة) مخصصة للشركات والمؤسسات الفعلية. يعني لازم يكون عندك محل/مكتب.

كل بوابة دفع لها اتفاقيات معينة مع بنوك أو منصات بيع إلكتروني فالأفضل إن كل تاجر يبحث عن بوابة الدفع اللي توفر له أفضل عرض
على سبيل المثال قبل كنت مشترك مع باي تاب وكانوا ياخذون مني 200 ريال شهرياُ بالإضافة للعمولات (2.75% للفيزا والماستر كارد + 1.5 ريال لكل عملية) وهذا كله غير رسوم التأسيس اللي قيمتها 1500
علماً ان خدمة مدى ما يوفرونها لك إلا إذا كان حسابك في البنك العربي

حالياً مشترك مع تاب ( Tap ) حليلين وخدمة العملاء عندهم كويسة والربط سريع ومن غير رسوم تأسيس أو اشتراك شهري (عمولة 2.75%+1 ريال لكل عملية للفيزا والماستر كارد، 1.75% مدى+1 ريال لكل عملية) ويوفرون خدمة مدى لكل البنوك حسب علمي

السلام عليكم

انا عندي مشكلة حقيقة مو عارف لها حل

عندي موقع الكتروني لكن خارج المملكة عمله
وابي بوابة دفع الكتروني لو فردي بحيث اربط فيها حسابي السعودي او الفيزا

طبعا هنا البنوك السعودية اجراءات معقدة حاولت افتح حساب تجاري لكن يومك بسنة ولازم سجل وانا موظف



هل احد جرب اي بوابة لو خارجية تقبل الافراد غير البايبال !!

بوابات الدفع غالية بالحييييييييل بالحيل
ومرات أحسها ماهي مجدية. خصوصا إذا المبيعات ماهي بذاك الزود.

كيف اشتركت مع tap لاني ابي ادخل معهم وما لقيت لهم تسعير او عروض

ماهي افضل منصة دفع للمنتجات الرقمية غير سلة حد مبيعات 4-6 مليون شهري
نرجوا المساعدة. سلة ترفض كثير بطايق

شباب عندي موقعين

الاول متجر استخدم سكربت opencart
والثاني سكربت استضافه واداره مواقع الانترنت اسمه whmcs

كيف اقدر اضيف apple pay mada وجميع خيارات السداد حتى خدمه سداد


انا استخدم paypal وزمان كنت استخدم 2co لكن ليا ٥ سنين بطلت لان اغلب العملاء تحويل بنكي مباشرة

السلام عليكم
استفسار بسيط
بالنسبة للشركات والبنوك هل هم المسؤولين عن ربط التطبيقات
يعني مثلا انا لدي تطبيق وابغى اضيف خدمات الدفع هل هم يضيفونها او لا ؟
ام يعطونك دليل واضح وتتبعه او لا؟

تحتاج تتواصل مع كل جهة لوحدها.
مدى غير Apple Pay
و (سداد) برضو مستقلة.

أول شيء شف لك وحدة من بوابات الدفع حقت المواقع الإلكترونية، وغالبا خدمة (مدى) تكون من ضمنها إذا محدثين وضعهم.

وبيني وبينك، بوابات الدفع مكلفة، التحويل البنكي ولا أحلى. تاخذ حقك كامل.

وعليكم السلام

لا.
أنت صاحب الموقع أنت مسئول عن تنصيب بوابة الدفع في موقعك، هم بس يعطوك الإرشادات.

بالعاده هل تكون الارشادات واضحه ام حوسه ؟

حوسة
لابد من مبرمج متخصص في تركيب بوابات الدفع، ويتابع معك فترة لضمان سلاسة الامور.