السلام عليكم ورحمة الله وبركاته
ياجماعة انا صار معي سالفة واحتاج احد يفيدني بافضل تصرف في هذا الموقف

اليوم كنت بوقف سيارتي في مواقف مجمع وانا راجع ريوس بوقف صدمت واحد وراي ماكان يبغى ينتظرني اوقف او مدري وش سالفته كان قريب من سيارتي وانا ماانتبهت له
المهم نزلت له وطلع ولد صغير قلت له معليش ماانتبهت لك وجلس يخربط وماتشوف ومدري ايش

قلت له خلاص لاتكبر الموضوع معي تامين دق على المرور ، قال لا انا ماعندي تامين والسيارة اجار ومدري ايش ، قلت ننتظر اخوك او اي احد عادي قال لا مسامحك
ويوم وقفت سيارتي ويجي يصور لوحتي ويمشي

انا علطول عرفت انه يبغى يبلغ علي هروب او حاجة زي كذا ودقيت على المرور وقلت لهم السالفة وقالي فيه دوريه جايك بالطريق وماعندي لوحته طبعا ،المهم وانا انتظر بموقفي فجأة جاء شرطي وقفل علي واشر لي قال تعال رحت عنده وقال وش عندك وقلت له السالفة قالي ايه حنا وقفنا بزر جالس يفر بالمنطقة هذي وقالنا فيه واحد صادمني ووصف لنا سيارتك.
قلت له خله يجي الكذاب هالحين ، قالي ماعندي رقمه ويقول انك انت تفر هنا بعد
قلت يارجل حرام عليك عمري 28 وش اللي اجلس افر في مواقف حياتي مو فارغة لهالدرجة :mrgreen:
الشرطي صدقني وقل اصبر بطلع لك رقم لوحته لاننا وقفناه بعد شوي واعطاني رقم اللوحة وقالي ترى السيارة مو باسمه ، بس ماقال لي اذا هي اجار مقل ماقال لي او لاخوه او ابوه

المهم بعدها بشوي جاني المرور وقلت له السالفة وسجل محضر حادث وقالي راجع مرور الناصرية

هالحين ياجماعة عندي الاسئلة التالية:
1-هل تتوقعون انه هو دق على المرور بعد وبلغ علي هروب والا بس يوم وقفوه الشرطة قالهم؟
2-اذا كان اثنين مبلغين على بعض هروب وش يصير؟
3- انا سيارتي فيها صدمة من زمان وماتفرق معي التصليح بس ماابغاه يتبلاني بكرى عشان كذا بلغت ، هل اروح الاحد للمرور واكمل الاجرائات والاكيف؟

اسف على السالفة الطويلة بس قلت اعطيكم كل التفاصيل عشان تعطوني افضل حل