السلام عليكم ورحمة الله وبركاته

انا يا جماعة الخير من شريت سيارتي وانا اغير على زيت بترومين 20w50 .. وكانت السيارة يوم اخذها ماشية 240 ألف .. ومشيت عليها لين وصلت 500 ألف [ ما شاء الله تبارك الله ] وانا على ذا الزيت واغيره مع فلتر الزيت كل 5 الى 7 الاف كيلو

الحقيقة ما واجهت اي مشاكل مع هالزيت وكان اختياري له بناء على نصيحة المصنع المكتوبة في دليل المالك

لكن شفت كمية المدح لزيت a1 كونه تخليقي بالكامل ويتحمل الى 10 الاف كيلو قلت كويس بدل ما اغير الزيت كل ثلاث اسابيع اصير اغير كل شهر ونصف

وفعلاً رحت لمحلات جملة الزيت وشريت خمس علب ب 100 ريال وشريت الفلتر وغيرت الزيت واخذت عينة من الزيت القديم اللي هو 20w50 في علبة موية ام نصف ريال

بعد التغيير الحقيقة ما فرقت اي شي .. سوى اني مشيت لين 11 الف عقبها رحت شريت 5 علب ثانية من نفس اللزوجة والنوعية

وغيرت الزيت مرة ثانية وبرضه اخذت عينة من الزيت a1 اللي لزوجته 5w30

المصيبة الكبرى قال لي البنشري ترا الزيت شوي وان اللي نزل تقريباً لترين ونصف فقط وما توصل لثلاث لترات

انا هنا توحشت قلت له متأكد قال ايه قلت طيب شكراً ركب هالزيت لين اشوف وش اسوي

يوم مشيت لين 7000 كيلو على الزيت a1 شيكت على مستوى الزيت ولقيته ناقص عن المعدل الطبيعي .. لان المعدل الطبيعي هو بين النقطتين اللي في العيار .. مب لازم في الوسط بس اهم شي بينهم .. لكن هالحين اشوف الزيت تحت النقطة السفلية .. واعبيه لتر ووصل للنقطة السفلية واكمل 2000 كيلو زيادة واغيره وارجع لحبيبنا الاول 20w50 علبته ب 10.50 ريال واغيره كل 5000 وانا متطمن انه ما يحترق او يتبخر وتجلس المكينة بزيت شوي


الخلاصة ان زيت a1 ما انصح فيه اطلاقاً ولا انصح بأي زيت حوله في اللزوجة لانه خفيف وحنا أجوائنا حارة ما يتحملها

المصنع ابخص وبعد التجربة طلع فعلاً ابخص .. للمعلومية لحد يقول لي المصنع حاط هاللزوجة عشان اجوائهم .. لا يا حبيبي المصنع مصنع السيارة على المواصفات السعودية ودليل المالك بالعربي والسيارة وارد وكيل سعودي يعني اللزوجة ذي 100 بالمية مناسبة لنا

اما اذا انت ملزم على زيت تخليقي بالكامل فدور لك زيت تخليقي بالكامل لزوجته 20w50

بالنسبة للعينات اللي اخذتها للزيتين بعد الاحتراق الحقيقة كل الزيتين قلب لونهم أسود كأنه قار .. والحمد لله اللي سلم مكينتي من التخبيط بسبب هالزيت الخفيف اللي يحترق بسرعة


أي سؤال عن التجربة أنا حاضر

بالتوفيق للجميع