اللي يقول تسع ساعات تعب ..

الصراحه مااشوفها تعب ..
قبل اسبوع مسافر من مكه الى الدمام 13 ساعه تقريبا

مشيت الساعه 11 الصباح .. وصلت الساعه 12 وشوي بالليل .. وقوفي بانزين .. محطه .. بقاله .. مسجد للصلاة ..

ما اشوفها صعبه .. لكن انت مشكلتك اني بتستلم وترجع يعني مو مريح . اشوفها صعبه شوي ..

السياره المستخدمه .. اكسبديشن

السلام عليكم

بالبداية الموضوع طويل نوعاً ما و فيه شوية فضفضة لكن بنفس الوقت فيه اشياء مهمة احتاج نقاشكم فيها :d
اللي فاضي و عنده معلومات ياليت يفيدنا و يبشر بالدعوات ان شاء الله و اللي ما عنده اي اجابات ابد حياه الله تكفي طلته و ان شاء الله الموضوع يكون مفيد للبعض.

رسالة للمشرفين: صحيح ان الموضوع يحتوي على نقاشات و اسئلة لا تخص السيارات و لكن المحتوى الرئيسي لهذا الموضوع هو النقاش عن مواضيع اكثرها تتعلق في السيارة و امور السلامة الخاصة بها فأرجوا عدم نقل الموضوع الى قسم السفر و السياحة.

الموضوع يا اخوان عندي عمل في مدينة دبي يحتاج ازورها عشان اخلصها بنفسي و لكن الموضوع يتطلب السفر عبر السيارة للسبب في الأسفل:

انا في حيرة يا اخوان و من لديه الخبرة يفيدني و جميع الاقتراحات و النقاشات مرحب بها بسبب اني ابحث عن المساعدة من الخبراء بحكم اني ما امسك خطوط الا نادر و كلها داخل السعودية فقط.

الفكرة من هذي السفرة هي وجود بضائع في دبي يحتاج اروح اجيبها بسيارتي الشخصية بما اني ابحث عن اقل تكلفة ممكنة و ما عندي مانع اوفر المادة مقابل تعبي و وقتي الشخصي لأن الفائدة لي بالأخير
البضائع يا اخوان تجارية و هي عبارة عن مجموعة صناديق اكبر من مساحة شنطة سيارتي و كل ريال يتوفر في جيبي بيكون مهم طبعاً فأرجوا ما احد يقترح علي اوكل شركة شحن او جهة ينقلوها من دبي الى الرياض لأن هذا الشي بيكلفني على الأقل 1500 درهم مصاريف النقل و تحديداً 1532 ريال
1532 ريال هذا السعر لشركة نقل يتعامل معها التاجر و لكن المبلغ يعتبر عالي مقارنة مع قيمة البضائع و لهذا رفضت استكمل الطلب مع التاجر و قلت اصبر علي يمكن اجيك بنفسي استلمها ببلاش و ما قدامي الا قيمة البنزين لو نحسبها مع بعض ما تكلف ان شاء الله ولا 200 ريال.

شفت لي عامل من موقع حراج معه دينا في السعودية قال لي 3000 ثم نزلها الى 2500 ريال لكن ما زالت غالية و مستحيل ادفع هالمبلغ و الا ما صارت فيه فائدة لي
فكرت و قلت اكيد الأفضل اني اشوف شركة في الامارات تنقلها الى الرياض عشان يطلع ارخص و لكن حتى مع ذلك ما اعتقد بحصل شي ارخص من 1500 ريال و انا عموماً ابحث عن ارخص بكثير يعني نقول 500 ريال فمستحيل نحصل احد بالسعر هذا.

فقلت بدال ما ادفع على 1500 ريال للنقل اشغل سيارتي و اسحب القلص (عربة) و اتوكل على الله و اتجه الى دبي احمل البضاعة في العربة و شنطة سيارتي و اخلص الأمور بنفسي بدون مساعدة احد
الحمدلله حسب دراستي للموضوع ما فيه صعوبة كثير ان شاء الله بما انها دولة شقيقة عربية و يمكن زيارتها ببطاقة احوالي السعودية و بسيارتي مع لوحاتها السعودية و ايضاً حسب ما قرأت بعض التجار يقبلون عملة الريال السعودي.

اخر زيارة لي لدبي كانت قبل 4 سنوات تقريباً لكن ما اتذكر منها شي كثير صراحة.

الان نقاط بسيطة حاب اسأل و اتأكد منها و هي اللي احتاج مساعدتكم فيها اكثر شي:

- هل صحيح بالإمكان الزيارة في بطاقة احوالي فقط بدون الحاجة لجواز؟ يعني بالعربي الموضوع ما يحتاج أي جواز صحيح؟ ملاحظة جوازي منتهي من سنة بعني بروح بدون ما اخذه
- و كذلك الرخصة السعودية كيف الموضوع معاها؟ هل حدود الامارات او المرور يطلبونها مني او مالهم علاقة فيها؟ يعني سؤالي هل الرخصة مخصصة للسعودية فقط او تمشي كتصريح سواقة في دبي؟
- التسجيلات المهمة الخاصة بالسيارة اللي هي الاستمارة و التأمين لازم يكونون صالحين و السيارة تكون بأسمي او عندي تفويض..هذي امور معروفة لكن سؤالي هل فيه شي ثاني اركز عليه او هذي فقط؟
- النقطة الأخيرة للخبراء كيف الوضع مع حدود الامارات و السعودية هل يفتشون البضائع و يفتحونها يتأكدون منها او الموضوع عالماشي بدون تدقيق؟ (ما عندي شي اخفيه طبعاً لكن ما ابيهم يفتحون بعضها و يحوسونها) و كيف الوضع مع حدود السعودية خوفي يكون فيه جمرك او رسوم معينة ادفعها او من هالكلام مثل السيارات..ابي افادتكم هذي اهم شي لأن اذا فيه جمرك اجل كنسلنا الموضوع كله.

الان بعطيكم بعض المعلومات:

اولاً نبدأ بسيارتي و هي فورد ايدج سبورت 2013



السيارة الحمدلله سليمة من المشاكل و زيوتها جديدة و فلاترها نظيفة و انوارها كاملة LED مع زينون امامي شغالة سليمة و الفرامل ممتازة و بعض الفحمات جديدة و المكينة قدرتها ممتازة تتحمل سحب وزن ثقيل بدون مشكلة و المقاعد الداخلية مريحة فما فيه أي عوائق من هالناحية تمنعني من هذي السفرة الطويلة او تصعبها علي
بالنسبة للكفرات صحيح انها من نفس وكالتها ما غيرتها لكن ممشاي بسيط 34 الف من 2013 (تاريخ الكفرات 2012) يعني باقي عليها عمر ف ان شاء الله ما فيه مشاكل من هالناحية و هنا صورتين

الكفرات عكستها على شكل X قبل كم شهر و نلاحظ الخلفي مستهلك اكثر من الامامي بشكل بسيط لأنه كان مركب قدام اكثر من سنتين
الصورة اليمين هو الخلفي و اليسار امامي



حالة الكفرات سليمة و باقي فيها يمكن نص العمر فما فيه مشكلة من هذي الناحية ان شاء الله لكن خوفي على عمرها الطويل فأحتمال صارت يابسة شويتين و يُفضل تغييرها
صحيح ان الكفرات من اهم الاشياء اللي تحافظ على سلامتي بعد الله و لكن ما فيه مجال اغيرها يا اخوان لأن قيمتها غالية الكفر الواحد ما يقل عن 1500 ريال و اكثر بسبب ان الجنط 22 انش و انا عموماً لو فكرت اغيرها ما راح ارضى الا بنفس نوعية الكفرات الممتاز من Pirelli يعني ما راح اركب نوعية رخيصة تمشية حال
فلذلك بتوكل على الله و اكمل مع الكفرات.

عندي في البيت قلص او عربة كافية تشيل دبابين 4 كفرات قلت اقدر استفيد فيها و احط البضائع عليها و اغطيها في غطاء عشان الهواء و الغبار او الامطار لا سمح الله
ثم اجيب احبال و الفها على البضائع و الغطاء بشكل ممتاز عشان اطمئن وقت الرجعة و ما اشيل هم الوزن او المشي و انا محمل البضائع الكثيرة و الثقيلة.

هنا صورة للعربة و هي مقاربة لحجم الموجودة عندي (اعتذاري لصاحب الصورة)
العربة تقريباً طول سيارة كاملة



القلص حالياً هو راس المشكلة لأنه شي اضافي طويل اسحبه بسيارتي و بيصعب علي الروحة و الرجعة
ما اقدر اسرع عليه و خوفي حتى الـ 120 بتكون خطيرة عليه خصوصاً مع الخطوط الطويلة و الهواء القوي اللي تخبرونه
يعني القلص لا بد منه و ما تسوى خط 9 ساعات تقريباً على بضائع بحجم شنطة سيارتي لحالها فقلت استفيد و اسحب القلص
القلص هو اللي مصعب الموضوع لأن الفكرة فيها سحب بضائع و مشكلة الحواجز الجانبية مو مرتفعة كثير فبضطر اثبت الصناديق بالحبل و طبعاً مركز على هالنقطة و لازم اخذ لي احبال كثيرة.

طبعاً سيارتي من المصنع ما يجي عليها هوك في الخلف عشان نسحب فيه عربة
و لكن السيارة عادي يتركب عليها هوك بدون مشكلة و شريت لي هوك عالي الجودة من شركة امريكية موديل مصنوع خصيصاً لنفس فئة سيارتي (فئة السبورت و ليس الفئات الاخرى من الليميتيد و غيرها).



قبل عدة ايام وصلني الهوك و رفعت السيارة و ركبته بنجاح و الحمدلله الامور مضبوطة كأنه شغل وكالة :17: الان باقي فقط اروح السلي اشوف لي القطعة اللي تتركب داخل الهوك (اللي فيها كورة) عشان اركب القلص عليها.

القلص مشكلته واقف من 5 سنوات تقريباً لكن اشوف كفراته سليمة ما فيها الا العافية مثل الجديدة لأنها ما مشت اصلاً
يعني بكذا نقدر نقول كل شي سليم و جاهز للخطوط.

المشكلة بالقلص ما فيه انوار فرامل او اشارات او بالأصح فيها لكن يبي لها توصيل اسلاك و صعب اسويها و احوس بكهرب سيارتي
فما ادري وش رأيكم هل خطيرة كذا؟ ما ادري يمكن البضائع بتكون مغطية على اسطبات سيارتي الخلفية فما راح يقدر يشوف انواري اللي ورا اوقات الشمس
و الاهم كيف وضع مرور دبي هل يركزون على القلص لو انواره الخلفية مو مشبوكة مع سيارتي؟

------------------------------------------------------------------------

بالنسبة للخط من الرياض الى دبي
دخلت خرائط قوقل و حطيت عنوان التاجر في دبي و قوقل عطاني ان الخط 1003 كيلو و المدة 8 ساعات و 59 دقيقة



السؤال كيف اعرف صحة المدة من قوقل؟ هل يحسبها لي على سرعة 120 كيلو او كيف بالضبط لأني حست بالخيارات و المعلومات ما حصلت شي يفيدني.

طبعاً الخطة اني امسك خط مباشرة من الرياض الى التاجر في دبي..يعني ما ابي اوقف في فندق و اريح او من هالأمور..ثم احمل البضائع معي و ارجع للرياض
صح انها صعبة و بتكون متعبة لكن ما اشوف فيه حل ثاني؟ ياليت كل واحد يعطينا من عنده يمكن فيه شي فايتني

لا تنسون يا اخوان انا ابحث عن ارخص طريقة لأن كل ريال بيكون محسوب على قيمة البضاعة يعني لا احد يقترح سفر طيارة او سكن فندق غالي او ايجار ونيت كبير او غيرها لأنها ما راح تناسب.