لو انا منك اشتري راحتي ب 1500 ريال

الشغله فيها عقبات كثيره ، لاتطلع عليك اكثر من بيع السوق

خلك بالسيف سايد نصيحه وادفع تكاليف الشحن وباذن الله ربي يعوضك

فيه فرامل للقلص بعضها نظام طبلة و بعضها ديسكات وسعرها كامل مع المنظم اقل من 1000 ريال

وهي الان ببعض الولايات الازامية خاصة بعد فضيحة شركة U HALL SWAY OF DEATH


لانك حتي اذا فرملت تبقي العربة في وضع حركة حرة ويصير يدف موترك

خاصة اذا الهوك مايوزن اتجاه الحركة لمنتصف السيارة بدل جوانب السيارة ويسبب تمايل



[/IMG]


شف ربعك الي معاه شاحنة بيك اب
خذة بالسياسة
خلة يجي معك بموترة وقل له الموتر عليك و الفندق و الفلة علي:d

أذكر فية فندق بعد ما تدخل الأراضي الأماراتية ماهو بعيد عن منفذ الجمارك وأنت داخل الأمارات يكون على يسارك ماشاء الله فندق كبير فية مالذ وطاب مطاعم وغيره بس هالكلام كان عام 2003م ياليت تتأكد حتى تريح فية أن كان لا يزال موجوداً

وتوصل بالسلامة

الكفر ثم الكفر ثم الكفر

عندنا جمس 2012 ممشاه ما تعدى ال 30 الف وكفراته ما قد غيرناها
سافرنا عليه قبل 4 شهور تقريبا من مكه الى الرياض وضرب علينا الكفر الخلفي (انشق بالكامل) وهاتك حوسة تركيب الاستبنه يا ان الامريكان معقدين فتحها بشكل لكن الحمدلله جووا ناس من جنسيه اماراتيه وساعدونا ولا كان قعدنا للفجر حايسين

الكفر له تاريخ وينتهي اظن سنتين من تاريخ الانتاج مو متأكد + انت بتحمل عليه وزن مو سهل فكذا لو الكفر جديد راح تخاف عليه يضرب

الله يوفقك في تجارتك اخوي وفاهم وضعك ومعجب بحماسك صراحه ياليت بعض الشباب يتعلم منك لكن نصيحه لك ادفع ال 1500 واشتري راحتك او انك تكلم احد تعرفه وتمون عليه وتكون سيارته بحجم سيارتك وتروحون بسيارتين مع اني اشوف الخيار الاول افضل بسبب كفرات سيارتك.. بالتوفيق

صراحه بعد التفكير بالموضوع وقراءة الردود ارى انك تتوكل على الله وتبدا الرحله
حتى لو تعرضت لعقبات وخسرت مبلغ وقدره بتتكون عندك خبره عن هالحركه وممكن تسويها بعد كذا بشكل دوري وتوفر اكثر من الف وخمسميه ولا الفين في الرحله الوحده خاصتا انك تاجر وباين انك ماخذ الموضوع بشكل جدي قد معك سجل تجاري ومؤسسه
منها تغيير جو ومنها تحلل السياره اللي دافع فيها ومنها تتعرف على ناس جدد وخبرات اكثر مع الزمن ومنها ربح مادي ايضا

اوضح لك نقطة

أن البضاعة اللي بتاخذها معك تعتبر بضاعة للتجارة

وبكذا ستحول الى الجمارك وعليها مبلغ(( نسبة من البضاعة))

ولن تستلمها في الحال ولو أنتظرت لأستلامها قد تأخذ ساعات كثيرة جدا

اصحاب الدينات عندهم خبر بهذا النوع من البضاعه والتعامل مع الجمارك

تحتاج لمعرفة الامر بشكل صحيح قبل الذهاب

طبعا اذا الجواز منتهي الصلاحية ما تقدر تعبر بالبطاقة

ما عندي أجوبه تخص السفر لدبي تحديداً لاني ما جربته
لكن بتكلم عن السفر اللي جربته داخل المملكه بالسياره
ألف كيلو والله مهي سهله
لو تمشي 180 بعد بتطفش وانت ما وصلت :25:
فما بالك لو ركبت هالعربه اللي بتعيق المشي تمام غير انها بتقلقك مع الخط عن سواقتك وهذا خطر على سلامتك
انا قبل كم سنه سافرت من الطايف لتبوك 1200 كيلو
اقسم بالله اخس سفره سافرتها بحياتي :14:
الخط طويل وممل ومتعب هذا وانا اتناوب مع العيال على السواقه ونريح بعد كل مسافه في محطه
انا اشوف ان خيار الشحن هو الحل الانسب لك حتى لو كان غالي
صدقني بتتعب في السفر وبتضطر تريح بفندق وبتدفع تكاليف تتعدى قيمة الشحن
فأخذها بالمختصر يا ابو فهد اما الله يعينك تدفع قيمة الشحن وتفك نفسك من عنا الخط ومخاطره او تنسى هالطلبيه والله يعوضك

اعذرني ما قريت موضوعك

لكن سالفة قطع مسافة لمدة 9 ساعات

كم بالكيلو المسافة الكلية ؟

اذا كانت 3000 كيلو وتحت بسيطه ي رجال


انا بعض المرات اقطع في اليوم 2500 كيلو خط واحد بدون توقف والحمدلله مافيه لا تعب ولا نوم

بالعكس مروق

اذا انك من الناس الي تمسك خطوط واجد فلو تقول 4000 كيلو صد رد اقلك قدام


وبالتوفيق

السلام عليكم

بخصوص الكفرات اشوف لو بتمشي عليها بحدود 120 كويسه ولا تسرع فيها ...

القلص مسموح وشفت واحد باخر زيارة لي لكن كان قلص مغطى كاممل وماادري عن المكشوف

الطريق الى ذكره لك قوقل ابدا لاتمشي معه لو تموت هذا طريق حرض

الطريق خط واحد رايح جاي وكله شاحنات ويختصر لك 150 كيلو عن الخط العادي

الخط العادي تمشي بطريق الدمام وتاخذ مفرق سعد لين الاحساء وبتجيك لوحات منفذ البطحاء ، الطريق الى الاحساء مافيه ساهر بعد الاحساء لين الهفوف فيه سيارتين ساهر ، بعد سلوى خلاص ماعاد فيه ساهر ...

المنفذ متعاونين لكن بخصوص الكمية التجاريه مااقدر افيدك ... تقدر تسال اي مكتب تخليص جمركي عند المنفذ فيه مليان


انا من رأي تشوف لك احد الشباب معه حوض او سوبربان وتقوله مكفول محفول يومين ونروح نشوف سينما وباتمان وماوكلي وطرزان ونرجع .... والسكن رخيص من بوكنق هالفتره ... واهم شي استمارته ساريه وعنده تفويض اذا السيارة مو باسمه


واذا مصمم تمشي على موترك روح الغرابي ركب انوار للقلص ببطاريه عاديه ومكان للوحه عشان تكون واضحه بالقلص ...

المشكلة عندك مو في المسافة ولا الجمرك المشكلة في كفراتك اولا وثانيا القلص وهذا الأخطر ودي أقولك امش 80 لكن صعبة جدا على هالمسافة الطويلة

أنا جربت خط 7 ساعات روحه فقط تعبت بشكل مو طبيعي ولا فيني طاقة اكمل فـ حط ببالك ماتقدر ترجع الا لما تريح أول أو انك وانت راجع في نص الطريق بتضطر توقف من التعب

بعدين لاتنسى المسافة 9 ساعات صحيح لكن لما تكون ماتوقف نهائيا وهذا مستحيل

يكفيك زيارتك للمحل وتحميل البضايع و الجمارك بدخلتك للامارات ماتطول نص ساعة الا انت عديت الجمارك لكن الرجعة الله يعينك بسبب البضايع الي بتجيبهم معاك غير انك بتوقف المحطة أكثر من مرة و بتدخل مطعم لان هناك مطاعم على خط دبي توقعي بتاخذ بالراحة 22-25ساعة على هالرحله يعني انسى ترجع من هناك بدون ماتنام

اذا بتشيل هم ففكر في القلص لازم تشوف لك حل معاه وسيارتك صغيرة والله تنقلب افضل شي تشوف لك سيارة كبيرة وتحمل البضايع داخلها ادري ماتقدر تشيل الي تبيه لكن اهم شي سلامتك

اما ياخذون جمرك على البضايع وباقي الكلام لاتشيل همهم نصيحتي اعتبرها خبرة لك حتى لو ماجابت السعر الي ببالك لأن بالمرة الثانية بتعرف أفضل طريقة تجيب بضايع من هناك وبأقل سعر

اعتقد اذا قطع كمبيوتر معفاة من الجمارك

الخوف من القلص وكفراتة فقط

لو مشيت من الرياض 6 الصبح غالبا بتوصل على العصر لازم تريح اليوم ومن بكرة تمشي ماراح تقدر تكمل

بيكون متعب لك وخط بالليل اكثر تعب ولحالك الخط مريح واغلبة سيدين لكن اذا جاك غبار بالخط بيتعبك خاصة كلة صحراوي ورمل

اعتقد 1500 تدفعها افضل لان بسفرتك راح تدفع حول الألف مابين بنزين وتأمين وتموين اكل

1- الكفرات قديمة ياغالي

بالنسبة للخط رايح جاي اشوفه معقول 18 ساعة تعب بسيط انا قد مسكت خط اطول من كذا وماهو ذاك التعب

بالنسبة للقلص مدري ماني متطمن لوضعه احسه طويل بزيادة وخطر
ونفس البضاعة ماعليها رسوم جمارك ؟

اهم شي خذ معك خوي منه يونسك واذا تعبت من السواقة يسوق مكانك

تبي الصدق

لو أنا مكانك

أدفع الـ 1500 واريح راسي وعمري.

هذا رأي ودمت بخير

اذا ركبت قلص او مقطورة ما تفرق التسمية

لا تمشي اكثر من 80 كم و لازم القير يكون معشق على الثالث بحيث يكون RPM ما يتجاوز 2.5

انتبه ثم انتبه

ترى السيارة اللي تسحب مقطورة تحتاج جهد اكثر و القيادة بسرعة عالية يؤثر على الدفرتس

فانت تكون وفرت 1500 ريال لكن ربما تفتح لحالك مشكلة ثانية بسيارتك تكلفك اكثر من 1500 ريال

انا معاك في هذي الرحلة بشرط ان تكون سرعتك 80 كم و خصوصا لمن تحمل بضائع على المقطورة
و ايضا يفضل بشدة ان يكون معاك خوي - صديق يساعدك

مع انه اخاف ان البضائه بتتجمرك و وساعتها الله يكون بعونك تعبك هذا كله راح فاضي

أنت لو تحسب مصاريفك خلال هالرحلة من بنزين سواء بالسعودية أو الإمارات والتأمين الدولي على غير الفندق ب أبو ظبي .. ف الغالب بتتعدى المبلغ اللي تبي توفرة

نصيحتي إشتر راحتك وسلامتك وخلها بالشحن أفضل لك :)

اخي صاحب الموضوع
انت تقريبا رتبت وحسبت حساب كل شي
الا التكلفة الجمركيه ما حسبت حسابها
دام بضاعتك ينطبق عليها كمية تجاريه بياخذون عليك جمرك
في تفاهمك مع حقين النقل اللي قالك 1500 هذي حق النقل والجمرك عليك . ولا 1500شامله كل شي
طبعا القلص ماهو ممنوع اذا متوفر فيه شروط السلامه لكن حمولته ومحتواها تفرق
خويي سحب قلص عليه سياره عطلانه بالسياره باسمه ومر عادي
لكن وضعك يختلف معاك بضاعه وكميه تجاريه
الوقت المستغرق للرحله بيكون اطوول من الطبيعي بحكم ان معاك قلص والرجعه بتكون وقت اطول ووقود اكثر لانك محمل بضاعه وهذي كلها لها تاثير لاحظ الايدج دفع امامي وثقلها كله قدام ايضا حسب الظروف الجويه لو فيه هواء قوي وانت مسرع شوي يمكن يقلب الموتر
احسبها صح عزيزي والله يوفقك واتوقع ماحسبتها صح من قبل شراء البضاعه
انت شريت البضاعه قم حسبت تكاليف النقل والشحن والجمرك .




أرسلت بواسطة iPhone بإستخدام Tapatalk

بالنسبة للشباب اللي مستكثرين 2000كيلو
اللي ماتعود عالخطوط لايتهم الناس
انا طوال السنين اروح من الرياض لابهاء اقضي لزوم وارجع من غير السفريات لتبوك قبل يفتحون طريق حائل تيما -تيما تبوك
وياما من جيزان الى تبوك مع الساحل مرورا بجده رابغ ينبع المدينه ضباء تبوك
بس حبيت اوضح


أرسلت بواسطة iPhone بإستخدام Tapatalk

السفر الى دبي ومسافة 1000 كيلو مو مشكلة خاصة اذا معك خوي ونيس

المشكلة في التكلفة اللي يمكن تطلع عليك اكثر من بيع السوق

اول حاط المقطورة تحتاج الى صيانة ( كفرات - بريك - اسطبات )

ثانيا البنزين والمشوار ( اكل وشرب وكوفي وغيرة ) وفي حالة انك سكنت في دبي ارخص الفنادق من 150 الى 250 ريال.
انا اعرف شباب يروحون صد رد ( الاحساء - دبي ) تقريباً 8 ساعات والمشي يكون اخر الليل عشان يكون الوصول الصباح يتسوقون ويخلصون شغلهم ويرجعون بعد العصر.


ثالثاً الجمارك احتمال يحولك الى الشحن وهنا تكمن المشكلة الكبرى ( زحمة وقرف ومخلص جمركي ) واذا عزمت تروح حاول تخلي وصولك الى منفذ البطحا الصباح بدري عشان اذا حولك عالشحن تخلص بسرعة.


نصيحتي اذا مشوارك لدبي بيتكرر مايمنع انك تدرسها صح وتروح حتى لو صارت التكلفة مقاربه لتكلفة الشحن.


بالتوفيق

إضافه
التأمين ( 150 ريال )
البنزين بحدود 150 ريال - إلى 200 ريال سيارتي كيا كرنفال 2016
( نصيحه قبل ما توصل المنفذ عبي سيارتك فول
الفندق ليله واحده 150 ريال ( في بر دبي )

---------------------
مسار رحتي كامله
امشي يوم الخميس أخر الليل بالعاده الساعه 11 بالكثير 12
أوصل الساعه 8
على طول إلى الفندق العصر أبتدي ( اركب الشحنات في السياره ) بكميات تجاريه
( مرتين رحت ولا أحد كلمني من الجمارك ) للعلم اني شريت مكائن
بعدها الفندق نوم أول ما أجلس أمشي