التخطيط لشهر العسل والمكاتب السياحية

[General-Engineer]

السلام عليكم
كيف حالكم يا اخوان
بدون مقدمات
انا انسان كذا ما عندي وقت وعملي ضغط جدا وقررت اروح لمكتب سياحي يخططلي لشهر العسل ان شالله وعقبال كل العزاب مقدما

المهم رحت لمكتب سياحي بدون ذكر اسماء
اتفاجأت بصراحة انه الأسعار ممتازة
مثلا الرحلة الى باريس ذهاب وعودة في التاريخ الاي انا طالبه 2 اغسطس كلفت 3500 ريال للشخص على الخطوط التركية، محطة الاقلاع المدينة الى اسطنبول بعدها من اسطنبول لفرنسا
فتحت الموقع بنفسي حق الخطوط التركية وسويت الحجز عشان اشوف السعر وطلع السعر 3900!!
وشفت سعر الخطوط السعةدية طلع 4100 ريال تقريبا

اتفاجأت انه عند المكتب السياحي ارخص

وبالنسبة للفنادق في النمسا مثلا لقيت خيارات الليلة ب1600 فندق 5 نجوم ولقيت فندق 3 نجوم شكله مرررة نظيف وجميل ب400 ريال الليلة!!

سألت الرجال هل تاخذ رسوم مني او شي قال لا فقط التذاكر والفنادق والاسعار شاملة الضرائب!
قلتله اجل كيف تربح قال هذي الفنادق كلها احنا مسوين عقود معاها وهي تدفعلنا لما الناس تسكن فيها، لأن كل الفنادق هذي اللي عرضها علي عندهم عقود معاها

وقال انه ربح المكاتب ايضا في رسوم اصدار فيزا الشنغن ونصحني اسويها بنفسي ما تكلف غير 441 ريال للشخص
بالأضافة الى التأمين قال بيكلفك بحدود ٢٥٠ للشخصين ، والتأمين الزامي ومن شروط اصدار الشنغن

اتغيرت نظرتي صراحة عن المكاتب السياحية

الموضوع الثاني احتاج مخطط رحلة لأوروبا لأن للآن ما رسيت على خطة
والف شكر مقدما

 

 

[skrooop]

مبروكك ,,

للاسف م عندي شي اقدمه لك ,, بالتوفيق عزيزي

 

 

[General-Engineer]

اليوم كلمني المكتب وقال هل تحب تروح عن طريق ينبع؟ يقول السعر ارخص بفرق كبير
ورحت وتم الدفع و الحجز على الخطوط التركية بسعر ٢٨٠٠ ريال للشخص فقط
حجز الذهاب يشمل: ينبع اسطنبول- اسطنبول ميلان
حجز العودة يشمل: فيينا اسطنبول- اسطنبول ينبع

الخطة المبدئية تشمل ٤ دول: ايطاليا > سويسرا > المانيا > النمسا
كلهم جنب بعض
ايطاليا : ميلان وفينيس و ليك غاردا
سويسرا : انترلاكن
المانيا: ميونخ او فرانكفورت
النمسا: زيلامسي و فيينا

استبعدت فرنسا واسبانيا لأنها تحتاج طيران داخلي وابغى اوفر التكاليف وقلت اخليها للسفرة اللي بعدها
بالنسبة لأسعار الفنادق، انا ما يهمني الفندق كثير لأني لما اسافر فقط احتاجه للنوم عشان كذا كل فنادقي ٤ نجوم او اقل
اسعار الفنادق في جميع الدول المذكورة لقيت الليلة تبدأ من ٣٠٠ الى ٥٠٠ بهذي الحدود ، ما عدا سويسرا كانت بحدود ٩٠٠ ريال

احتاج نصائحكم ورأيكم في خطتي هل مناسبة او لا، بالنسبة للتنقلات الداخلية كلها بالقطار والمواصلات العامة، احتاج اعرف اسعارها اذا عندكم خلفية

الخطة هذي مبدئية ولسا ما تم حجز الفنادق للآن

والف شكر للجميع مقدما

 

 

[Exsodia]

شي جميل صراحه .. ما كنت افكر ان المكاتب السياحيه كذا


بالنسبه للرحلة فانا ما عندي تجربه لكن تقدر تبحث في النت عن الاماكن السياحيه الموجوده في المدينه اللي ناوي تزورها

 

 

[King of DmaaR]

بخصوص فرنسا تراهم متشددين في لبس النقاب للمراه

 

 

[dsl saudi]

فرانكفورت بعيدة عن مخططك ولايوجد فيها شيء مميز سياحيا

مخططك ممتاز ومريح إذا استبعدت فرانكفورت

 

 

[General-Engineer]

dsl saudi

فرانكفورت بعيدة عن مخططك ولايوجد فيها شيء مميز سياحيا

مخططك ممتاز ومريح إذا استبعدت فرانكفورت

الله يعطيك الف عافية
اذا المانيا فقط ميونيخ
وشكرا جزيلا لك

 

 

[m3gb]

سويسرا : انترلاكن

جنة الله في ارضه \ الله يوفقك بينكم ويطرح البركه فيكم

 

 

[انا استقيل]

الله يجمع بينكم ويوفقكم...لاتنسى تجيب لنا كم صوره....

 

 

[مشغول البآل]

أول شي احرررص انك تستأجر سيارة ولا تعتمد على القطارات لأنك بتتعب جداً .. السيارة متعه وراحة وما اتوقع بتكلفك شي مهول الا البنزين له ميزانية خاصه .. يبي لك رخصة مترجمة للانجليزي ( ما ادري عن الرخصة الدولية) عن نفسي استخدمت رخصتي الامريكية .. في شركات كثير واسعارها متفاوته .. راح ياخذون منك مبلغ كبير شوي على الـ GPS علشان كذا اعتمد على الايفون افضل لك وطلع شريحة طبعاً .. اغلب السيارات بتكون عادي مب اوتوماتيك وحاول احجز بدري من موقع الشركة لأن صارت لي سالفة علشان ماحجزت من بدري


كنسل فرانكفورت لأنها بعيدة شوي زائد ان مافيها شي سياحي ويحمس انك تزورها ابداً .. وهالشي من تجربة

انترلاكن جنة لكن انت بتروح بموسم وراح تحس انك بدولة خليجية من كثر السعوديين والاماراتيين .. الا ان كان هالشي مايفرق معك .. اذا قررت احرص انك تسكن بفندق يطل على البحيرة\النهر لأن هي زبدة الموضوع

ميلان ما احسها تنفع لشهر عسل .. الا اذا كنت بتروح انترلاكن مايمنع تمرها يوم بالسيارة


بالنهاية حاول ماتكثر التنقلات لأنكم بشهر عسل وبتتعبون عكس انها سفرة شباب .. استمتع مع زوجتك اكثر ههههه

 

 

[General-Engineer]

مشغول البآل

أول شي احرررص انك تستأجر سيارة ولا تعتمد على القطارات لأنك بتتعب جداً .. السيارة متعه وراحة وما اتوقع بتكلفك شي مهول الا البنزين له ميزانية خاصه .. يبي لك رخصة مترجمة للانجليزي ( ما ادري عن الرخصة الدولية) عن نفسي استخدمت رخصتي الامريكية .. في شركات كثير واسعارها متفاوته .. راح ياخذون منك مبلغ كبير شوي على الـ GPS علشان كذا اعتمد على الايفون افضل لك وطلع شريحة طبعاً .. اغلب السيارات بتكون عادي مب اوتوماتيك وحاول احجز بدري من موقع الشركة لأن صارت لي سالفة علشان ماحجزت من بدري


كنسل فرانكفورت لأنها بعيدة شوي زائد ان مافيها شي سياحي ويحمس انك تزورها ابداً .. وهالشي من تجربة

انترلاكن جنة لكن انت بتروح بموسم وراح تحس انك بدولة خليجية من كثر السعوديين والاماراتيين .. الا ان كان هالشي مايفرق معك .. اذا قررت احرص انك تسكن بفندق يطل على البحيرة\النهر لأن هي زبدة الموضوع

ميلان ما احسها تنفع لشهر عسل .. الا اذا كنت بتروح انترلاكن مايمنع تمرها يوم بالسيارة


بالنهاية حاول ماتكثر التنقلات لأنكم بشهر عسل وبتتعبون عكس انها سفرة شباب .. استمتع مع زوجتك اكثر ههههه

الله يجزاك الف خير
بخصوص التنقلات كثير نصحوني باليورال باس، هل عندك فكرة عنه؟
التكلفة 5000 ريال للشخصين، تنقلات غير محدودة لمدة شهر
ايش رايك فيها؟

 

 

[Super DSL]

تبي النصيحة
شهر العسل لازم فنادق فخمة لانه جلستك فيها اكثر من طلعتك

ثانيا ترا الشنغن لازم تبصيم يعني ما ينفع تطلعها من المكاتب الا اذا عندهم بصمه

 

 

[هكونا متاتا]

ياخي لخبطتني ههههه
رحت لكم محل قبل فتره وسألت عن برامجهم لماليزيا مثلا
اعطاني التكاليف ورحت احجز بالبوكينغ ولقيته ارخص من هالمحلات يمكن ب40%
وحتى بالحجوزات نفس المسأله فيه زياده كبيره

بس بعد كلامك شكلي بشوف مكتبك
بعد اذنك ممكن ترسل لي اسم المكتب او رقمهم (F)

 

 

[aa2aa]

ماشاء الله تبارك الله
بارك الله لكما وبارك عليكما وجمع بينكما بخي
الله يوفقك ويسعدكم ويرزقكم الذرية الصالحة

اخوي الله يعطيك العافية ياليت بعد ماتنتهتي من التخطيط تقولنا التكلفه التقريبيه والمتوقعه مع الخطة بحيث الكل يستفيد

 

 

[تميم العز]

بالتوفيق منك المال ومنها العيال

 

 

[جليس نت]

بالنسبة للتذاكر في تذاكر اسسمه كلاس M هذي بين شركات الطيران ومكاتب السفر وكلاس M هذا ما يطلع الا بعد ما تختفي نص المقاعد



او المكتب يكون حاجز التذكرة هذي قبل وقتها بشهر او شهرين بس يجلس يغير اسم وغير التاريخ والوقت

 

 

[نمممس]

قبل الصيف الماضي سافرت لباريس 6 ليالي ثم الى المانيا بالسيارة 3 ليالي ثم النمسا (زيلامسي) 5 ليالي والرجوع من ميونخ ليلتين ..
الطيران على طيران الامارات الشخص 3400 ريال الرياض دبي باريس _ ميونخ دبي الرياض
التنقلات بالسيارة حجزتها بالنت 10 ايام ب 3400 ريال والفنادق ما فيه مثل بوكينق تغير وتعدل في الفنادق وتشوف تعليقات الي سكن فالفندق .. بالنسبة للمكاتب اذا شافك ما تعرف الفنادق عطاك فندق ممكن يكون سيئ عشانهم متعاملين معه ويكسبون اكثر..
الآن المنتديات موجودة اسأل وتلقى الجواب
واحجز فنادقك بجوالك وانت جالس ببيتك أفضل..
عموما مبروك الزواج مقدما وأي سؤال حاضرين لاني كتبت مستعجل بالجوال