تجربتي في تبديل هارديسك imac 27 late 2015
banner
2020-04-24 , 09:49 مساءً
Be EaSy’s Avatar
Be EaSy

مشارك

المشاركات:295
التسجيل:May 2007
Be EaSy
السلام عليكم

الشهر عليكم وتقبل الله منا ومنكم صالح الاعمال.

وأسأل الله العظيم ان يرفع الغمه عن هذه الامه.

كنت ادور احد غير الهاردسك وكتب تجربته نستفيد منه ماحصلت
فكتبت استفساري بقسم الاستفسارات

تبديل هارديسك imac

وشجعوني اطلب من برا يعطيهم العافيه فتوكلت على الله وطلبت :d
واشكر السمي eng_abdulaziz هو اللي جابلي فكرة الموضوع ولا كنت حاطه رد في نفس استفساري :d

يلا نبدا :27:

الحمد الله امس وصلتني الاغراض حق تغيير الهاردسك

القطع اللي جت تخدمك وتسهلك الامور وماراح يصعب عليك شي ان شاء الله

بمر على الخطوات واذكر النقاط اللي عندي عشان الكل يستفيد

بأستعين بالصور من ifixit لانها كافيه ووافيه

Image

اول شي تاخذ القطاعه وتدخلها بين الشاشه والفريم "لاحظ كيف ماسكها لانه اذا ماسكتها بهذي الطريقه احتمال تطلع من مكانها وتنشب بالشاشه وبتقعد كل شوي ترجعها مكانها :33: " وتبدا تقطع " كانك تقطع بيتزا :19: " من تحت الى ان توصل الزاويه الثانيه تحت .... الحلو فيها ان توقفك عند حد معين ماتخرب اي شي داخل الجهاز فتطمن وادعس وقطع :d طبعا يمكن تروح وترجع عادي اهم شي تاكد العجله تدخل وتقطع

Image

بعد ماتخلص اسدح الجهاز وخل الشاشه على فوق مثل الصوره.
بعدين فيه بطاقتين بلاستيك خذ وحده ودخلها من الزاويه اليمين او اليسار طبعا مو كل البطاقه لا جزء منها بس عشان يرفع الشاشه

Image

لاحظوا كيف بالصوره مادخل الا جزء بسيط

Image

حاول ترفع الشاشه بالهداوه عشان ماتنكسر ومشي البطاقه الى ان توصل قبل الكاميرا ووقف ورجع البطاقه بالزاويه عشان تمسك الشاشه وترجع تلزق
الحين خذ البطاقه الثانيه وسو نفس الطريقه من الزاويه الثانيه

Image

الحين حط البطاقه الثانيه بعد ماتخلص بالزاويه الثانيه بتصير بطاقتين كل وحده بزاويه
وحاول ترفع الشاشه اذا حسيت فيه جزء لسا لازق وقف ومرر عليه البطاقه عشان يفك بعدين ارجع حاول تفك الشاشه مره ثانيه

Image

اذا فتحت الشاشه لا تفتح بسرعه استنى ترا باقي كابلين موصوله امسك الشاشه بيد واليد الثانيه افصل فيها الكيبلين الاول مثل مواضح بالصوره سحب

Image

الثانيه عليه زي القفل الحمايه ترفعه بعدين ترفع الكيبل وبيطلع معك اهم شي ماتش بقوه في فصلهم عشان ماتنقطع الكيابل

Image

بعد ماتفصلهم ترا ماخلصنا باقي فيه شريط لاصق بالمنطقه اللي تحت اهم شي لاترفع الشاشه اكثر من الصوره عشان ماتنكسر الحواف

Image

انتبه تلمس ذا تراه مولد الطاقه يمكن يصير شرار ولا شي يخرب الجهاز

Image

اقطع الباقي من الشريط اللي تحت بالبطاقه ولاتنسى تكون ماسك الشاشه باليد الثانيه وماترفعها كثير


Image

ارفع الشاشه وانتبه تراها ثقيله " هي اللي مثقله الجهاز :66: " وطريقه شيلها زي ماهو واضح بالصوره حاول انك ماتضغط بيدك على الاطراف ولا الزوايا لانها تنكسر بسرعه
ركز ضغطك داخل الشاشه... حطها بمكان آمن

وترا ذا الشغل كله مايطول بسرعه تخلصه :69:

Image

هنا تبدا المخمخه :d من هنا تقدر تسوي اللي تبي والقطع والشروحات ifixit مايقصر :69:
اول شي شفت الغبار على المروحه وافكها وانظفها وارجع اكمل الشغل .. فكها بسيط اللي يبي الطريقه يضغط ويشوف

Image

شل الكيبل

Image

وفك الثلاث مسامير وتنشال

Image

فيه لزقه عليها مايحتاج تشيلها تقدر ترفعها بدون ماتشيل اللزقه :d ونظف يالذيب :69:


المرجع


طبعا الان الجهاز خفيف وبيصير عالق على فوق حتى لو نزلته على تحت راح يرجع فوق

Image

هذي القطعه جت مع البكج تثبت الجهاز عشان وانت تشتغل مايرقى وينزل

Image

نفك المسمارين حق السماعات

Image

نشيل الكيبل حق السماعات ... اذا فكيته حاول انك تطلعه اذا ماقدرت مو لازم تشد عليه عشان ماينقطع تقدر تشيله بعد ماتفك الهاردسك

Image

الحين نفك الكيبل حق زر الباور استخدم العده اللي جت مع البكج مفيده وتسهل الموضوع
وانتبه تلمس مولد الطاقه :66:

Image

ارفع السماعه شوي بس بتلاحظ الكيبل حق زر التشغيل يمر داخل السماعات اسحبه ويطلع معك بعدها تقدر ترفع السماعه كامله على فوق وراح تطلع معك

Image

شل الكيبل حق الهاردسك

Image

شل المسمارين اللي ماسكين الهاردسك وخلك ماسكه يمكن يطيح هو ماسك بحاملين على اليمين بس بدون مسمار

Image

شيل القطعه الحامله من الهاردسك

Image

فك الاربع مسامير عشان تركبها بالهاردسك الجديد

هنا اللي يبي يبدل الهاردسك بنفس النوع ماراح يحتاج شي اضافي يرجع يعيد الخطوات بالعكس :69:

بالنسبه ل ssd

Image

نفك القطعه الحامله للهارديسك

Image

ندخل الهاردسك ونركبها مع المنفذ .. لاحظ ان فيه زي اللسان تحت اضغط عليه عشان يمشي معك الهاردسك

Image

بعد تركبه اربطه بمسمارين عشان مايتحرك ... طبعا يجي معه مسامير الحامل
بعدها قفل القطعه من تحت

Image

بعدها اشبك الكيبل اللي جاي مع الحامل

Image

بعدها حط الحساس عند نهايه الهاردسك زي الصوره

Image

نركب المسامير الاربعه ... يحتاجلك تشد عليها عشان تدخل اهم شي حاول تكون مستقيمه مو مايله

Image

الحين اقلب الهاردسك " يعني وجه الهاردسك خله جهت الفريم وانت تشوف الكفر بس " ورجع القطعه اللي تمسك الهاردسك بالجهاز وثبته مره ثانيه مكانه

Image

واشبك الكيبل حق الساتا

كل ذي الخطوات سهله ماراح تعاني فيها :69:

نجي لأصعب شي ممكن بالسالفه كلها تقفيل الشاشه :66:

للامانه السيل اللي جاني اتوقع وبنسبه ٨٠٪ انه لمقاس ٢١ انش وهذي اللي ماحسبت حسابه وجلست ابحث وتوصلت لذا الشي لان المقاسات اصغر ماغطت كل الشاشه :32:

وتوكلت على الله وقلت بركبها وكيفها :39:

Image

اول شي لازم تفك السيل القديم من الفريم والشاشه .. ابدا من الزوايا راح يطلع معاك اسرع ... اذا فكيته نظف المكان بحول عشان ينظف الاوساخ ويمسك افضل

Image

هذي اماكنها كل سيل له رقم ...طبعا انا جتني ارقامها نفس ارقام شاشه ٢١ انش :66:

Image

السيل وجهين وجه عليه رقم والثاني بدون فانت تفتح الوجه اللي يلزق على الفريم بس اللي هو بدون رقم ... ولاحظ بعد ان السيل ماينفتح كامل مره وحده تقدر تفتحه جزء يمين وجزء يسار وهذا يساعدك ماتغلط

Image
Image
Image

عشان ماتغلط فيه حفر تستخدم فيها الاداه اللي بالصوره " تجي مع البكج " والحفر موجوده بالسيل والفريم وبكذا تكون الوزنيه ان شاء الله مضبوطه :d استعن بالله ولزق يالذيب :69:

Image

اذا خلصت رجع الشاشه واوزنها ... تذكر ان اطراف الشاشه وحوافها خفيفه وممكن تنكسر فشوي شوي وانت تحطها

Image

حطها عليها لزقه "ماتجي مع البكج" تمسكها عشان ماتطيح لان مابعد نفك السيل .. هذي الخطوه عشان بنسوي تجربه للشغل قبل نقفل :27: " انا ماسويتها قفلت بدون ما اجرب وذا خطأ :25: "
الحين نرجع نشبك الكيبيلن حق الشاشه "واحد يركب كبس والثاني تحطه وعليه قفل تامين" ونشبك الكهرب ونشغل نشوف كل شي تمام

اذا تمام طف الجهاز وافصل الكهرب وافصل الكيبلين حق الشاشه

Image
Image

ارفع الشاشه شوي وابدا اسحب السيل اللي اسفل الشاشه عشان يلزق
ارجع اشبك الكيبلين حق الشاشه ونظف مكان الكاميرا اذا يحتاج تنظيف ونزلها

Image

الحين ابدا اسحب الارقام عشان تلزق الشاشه ولاحظ كل رقم جزئين يمين ويسار

Image

اذا خلصت شل الزقه واسدح الجهاز وجيب زي الفوطه وامسح على اطراف الجهاز عشان يمسك كويس بس انتبه ترص بقوه وخليه شوي بعدين عيش :69:


ملاحظه
اذا حطيت السيل على الفريم لاتشيله لانه بيحوس عليك السيل وينعفط فحاول قد ماتقدر توزنه صح وجرب على الفريم قبل تبدا وتفكه :69:

انا للامانه السيل اللي جاني كان مو قد المقاس وفي مناطق مو مغطيها لكن الحمدالله ثابت والحين اكتب منه :201:

Image

وبدلنا ال ٢ تيرا HDD ب 1تيرا SSD :201:

Image

وهذا الحطبه اللي خلانا نسوي هذا كله :33:

وهذي مغامرة تغيير الهاردسك حقتي :201:

كانت تجربه جميله واستفدت منها ... للأمانه كنت متخوف منها بس الحمدالله صارت ممتعه والحين بقمة االسعاده اني صلحته بنفسي :new4:
اتمنى اني افدتكم في التجربه اذا في اغلاط سامحونا :19:
اي سؤال اي استفسار انا حاضر :60:

مرجع١
مرجع٢
رابط الشراء
محدثكم من خلف الكيبورد عزوز :70:

:bye:
Enlarged Image
2020-04-24 , 09:49 مساءً
2020-04-25 , 01:03 صباحاً
spai’s Avatar
spai
مشرف

مشارك

المشاركات:235
التسجيل:Jan 2018
spai
ما شاء الله عليك زين سويت وفعلا الموضوع بالبداية يخوف بعدين اصبح ممتع مثل ما ذكرت .. انا سبق فكيت جهازي imac 27 2014 بسبب المروحة وقلت بالمره اغير الهاردسك لكني غامرت اكثر وفكيت اللوحة وركبت M.2 . من سامسونج وخليت القديم اضافي .
2020-04-25 , 01:03 صباحاً
2020-04-25 , 01:10 صباحاً
eng_abdulaziz’s Avatar
eng_abdulaziz

متميز

المشاركات:6092
التسجيل:Aug 2008
eng_abdulaziz
يعطيك العافية

اتمنى من المشرفين تثبيت الموضوع
2020-04-25 , 01:10 صباحاً
2020-04-25 , 05:38 صباحاً
Be EaSy’s Avatar
Be EaSy

مشارك

المشاركات:295
التسجيل:May 2007
Be EaSy
spai كتب:
ما شاء الله عليك زين سويت وفعلا الموضوع بالبداية يخوف بعدين اصبح ممتع مثل ما ذكرت .. انا سبق فكيت جهازي imac 27 2014 بسبب المروحة وقلت بالمره اغير الهاردسك لكني غامرت اكثر وفكيت اللوحة وركبت M.2 . من سامسونج وخليت القديم اضافي .


فعلا اذا فتحت الشاشه خلاص الباقي يصير سهل زي اي PC عادي :69:

eng_abdulaziz كتب:
يعطيك العافية

اتمنى من المشرفين تثبيت الموضوع


الله يعافيك يارب


[U]تحديث[/U]

ماقدرت اثبت وندوز عن طريق BootCamp يطلعلي error بدون ذكر السبب :66:

فبحثت شوي اتضح ان BootCamp يشيك على جهازك ويشوف ايش عدد الهاردات اللي المفروض تكون بجهازك وعليها يحكم ... كمثال انا جهازي يوم خرب HDD انفصل عن SSD الداخلي ... ويوم ركبت بداله SSD جديد صار عندي 2 SSDs مفصولين عن بعض .. فعشان كذا رفض انه يثبت فاضريت ارجعهم بنظام fusion drive :66:

Image

الطريقه بأمر واحد لنظام Mojave واعلى
اما High Sierra واقل يبيلهم عده اوامر

من هنا الطريقه

[U]*ملاحظه[/U]: الطريقه تحذف جميع محتويات الهاردسك فسوي نسخ لملفاتك قبل تطبقها.

انا سويت الطريقه السهله بحكم نظامي Catalina وتعرف لحاله يقولي ايهم اسرع وايهم اكبر ويصلح حق التخزين :69:

وبعدها تثبت الوندوز طبيعي :27:

Image

الشي الثاني ifixit اعتذروا وقالوا بنرسلك السيل الصحيح حق جهازك :201:

وبس :27:
2020-04-25 , 05:38 صباحاً
2020-04-25 , 06:21 صباحاً
eng_abdulaziz’s Avatar
eng_abdulaziz

متميز

المشاركات:6092
التسجيل:Aug 2008
eng_abdulaziz
Be EaSy كتب:


فبحثت شوي اتضح ان BootCamp يشيك على جهازك ويشوف ايش عدد الهاردات اللي المفروض تكون بجهازك وعليها يحكم ... كمثال انا جهازي يوم خرب HDD انفصل عن SSD الداخلي ... ويوم ركبت بداله SSD جديد صار عندي 2 SSDs مفصولين عن بعض .. فعشان كذا رفض انه يثبت فاضريت ارجعهم بنظام fusion drive :66:


يعني جهازك الان فيه اثنين SSDs

fusion drive هل هو مساوي لمجموع الهاردين ؟؟؟؟؟

وسرعة الاقلاع نفسها او تغيرت ؟
2020-04-25 , 06:21 صباحاً
2020-04-25 , 04:32 مساءً
spai’s Avatar
spai
مشرف

مشارك

المشاركات:235
التسجيل:Jan 2018
spai
Be EaSy كتب:


ماقدرت اثبت وندوز عن طريق BootCamp يطلعلي error بدون ذكر السبب :66:

فبحثت شوي اتضح ان BootCamp يشيك على جهازك ويشوف ايش عدد الهاردات اللي المفروض تكون بجهازك وعليها يحكم ... كمثال انا جهازي يوم خرب HDD انفصل عن SSD الداخلي ... ويوم ركبت بداله SSD جديد صار عندي 2 SSDs مفصولين عن بعض .. فعشان كذا رفض انه يثبت فاضريت ارجعهم بنظام fusion drive :66:
:


ممتاز معلومة جديدة اشكرك

بخصوص الويندوز تقدر تستخدم برنامج Parallels desktop تشغل الويندوز كانه نافذه وفي تجربة
https://www.parallels.com/landingpage/pd/genera...
2020-04-25 , 04:32 مساءً
2020-04-25 , 08:35 مساءً
Be EaSy’s Avatar
Be EaSy

مشارك

المشاركات:295
التسجيل:May 2007
Be EaSy
eng_abdulaziz كتب:
يعني جهازك الان فيه اثنين SSDs

fusion drive هل هو مساوي لمجموع الهاردين ؟؟؟؟؟

وسرعة الاقلاع نفسها او تغيرت ؟



معطيني المساحه 1.12 تيرا ... الداخلي حجمه 128 قيقا واللي ركبته 1 تيرا نفسه المجموع
سرعة الاقلاع نفسها الخط يمشي سريع :d الماك ما اشوف انه يتأخر بالاقلاع

spai كتب:
ممتاز معلومة جديدة اشكرك

بخصوص الويندوز تقدر تستخدم برنامج Parallels desktop تشغل الويندوز كانه نافذه وفي تجربة
https://www.parallels.com/landingpage/pd/genera...


حبيبي بالخدمه :27:
بجرب البرنامج اذا ينفع لإحتياجي ولا لا ماقصرت :69:
2020-04-25 , 08:35 مساءً
2020-05-12 , 07:41 صباحاً
Basilsa’s Avatar
Basilsa

عضو جديد

المشاركات:7
التسجيل:Mar 2020
Basilsa
موضوع جميل ومفيد الله يعطيك العافيه
عندي استفسار لو سمحت استخدام الجهاز وتعليق البرامج مثل برامج المونتاج والجرافيكس وبطئها خلال العمل بسبب ايش بالعادة هل هو الهارد ولا الرامات وفي حال كان هالامر بسبب الهارد هل الهارد الخارجي يفي بالغرض ويسرع العمل على البرامج ؟
2020-05-12 , 07:41 صباحاً