اكسيوم تطرح الحجز المسبق لهاتف بلاك بيري كي2

[متعب الحارثي]

راعي اليوكن

ما تقصر يامتعب لا يارجل ماارتاح حق اي موقع بنتظر الشكوى الله... هانت كلها اسبوع او اكثر شوي

بس انت عجل علينا بالتقرير إذا استلمت الجهاز عشان نتحمس زود صراحة اكسيوم جابت لي احباط ليته ينباع في جرير ولا يكون حصري عند وكيل واحد .

الله يعافيك يارب عاد هم يقولون بكره يوصل 23 و 24 يبدئون الشحن للي طلبوا مسبق والاولويه للي حجز من بدري..

فنقول يارب ما يطول وابشر بسعدك بعطيكم رايي فيه كمستخدم عادي وليس خبير تقنيه يهتم بكل نواحي الجوال عشان متابعينه وكذا.

ومن جد حركت الحصريات ذي تجيب المرض ؛ لا سمح الله لو ما صدقوا مباشره رح اكلم حماية المستهلك وعندي صور للمحادثات معاهم و كل ما غيروا التاريخ لقطت صوره له ونشوف.

 

 

[متعب الحارثي]

شوفهم توهم مرسلين لي بكل وقاحه يقولون اخروه الى يوم 5 من الشهر الجاي لا تطلب منهم نصيحه لا تشتري منهم انحاش.

 

 

[da5eel]

ياخي يكرهونك بالجهاز يعني متحمس وودك تستخدم الجهاز وذولي يسحبون فينا صارلهم شهر ودك يعطونهم مخالفه وزارة التجارة .. حصرية الجهاز على اكسيوم سيئة جداً

 

 

[Gentleman‏]

اخي متعب بما انك خبره بالبلاك بيري
هل التحديثات له مستمره من حيث النظام ودعم بعض التتطبيقات مثل واتس توتير تلغرام

غالبا احتاجه لهذه التطبيقات مع ايميلاتي الخاصه

منتظر ردك

 

 

[windstorm]

Gentleman‏

اخي متعب بما انك خبره بالبلاك بيري
هل التحديثات له مستمره من حيث النظام ودعم بعض التتطبيقات مثل واتس توتير تلغرام

غالبا احتاجه لهذه التطبيقات مع ايميلاتي الخاصه

منتظر ردك

تحديثات التطبيقات بتجيك مثل اي جهاز اندرويد بالضبط لان النظام واحد
تحديث الاندرويد سنتين

 

 

[Gentleman‏]

windstorm

تحديثات التطبيقات بتجيك مثل اي جهاز اندرويد بالضبط لان النظام واحد
تحديث الاندرويد سنتين

يعطيك العافيه ع التوضيح

 

 

[راعي اليوكن]

الله يعافيك يارب عاد هم يقولون بكره يوصل 23 و 24 يبدئون الشحن للي طلبوا مسبق والاولويه للي حجز من بدري..

فنقول يارب ما يطول وابشر بسعدك بعطيكم رايي فيه كمستخدم عادي وليس خبير تقنيه يهتم بكل نواحي الجوال عشان متابعينه وكذا.

ومن جد حركت الحصريات ذي تجيب المرض ؛ لا سمح الله لو ما صدقوا مباشره رح اكلم حماية المستهلك وعندي صور للمحادثات معاهم و كل ما غيروا التاريخ لقطت صوره له ونشوف.

شوفهم توهم مرسلين لي بكل وقاحه يقولون اخروه الى يوم 5 من الشهر الجاي لا تطلب منهم نصيحه لا تشتري منهم انحاش.

والله يامتعب ماتسوى عليك يمين بالله انقهرت وانا مالي دخل يارجل اشتكي والله يسهل لاتزعل نفسك

من زود الاحباط رحت السوق وشريت النوت ( فان ادشن ) اتوقع كذا اسمه

وقلت انتظر شهر لاني ماتوقع الشركة تنزلة قريب خلال اسبوع او اقل

والله تذكرتك قلت اللحين متعب دافع لهم وحاجز وشوف كيف مبهذلين فيه لكن ولا يهمك ياصاحبي اذا مافيك صبر اسحب فلوسك وشوفلك جهاز ثاني تمشي فيه امورك وبعد شهر يحلها ربك راح نحصلة بالسوق على قفى من يشيل

اكرر اشتكي يامتعب

 

 

[Talal4Ever]

الجهاز وصلني قبل 9 ايام تقريباً والصراحة سعرة مبالغ مقابل جودة التصنيع وعتاد الجهاز !!






الجهاز طلبته من امازون

 

 

[شــرق]

Talal4Ever

الجهاز وصلني قبل 9 ايام تقريباً والصراحة سعرة مبالغ مقابل جودة التصنيع وعتاد الجهاز !!






الجهاز طلبته من امازون

الله يبارك لك يالغالي

بخصوص الكيبورد عربي ؟

 

 

[Talal4Ever]

شــرق

الله يبارك لك يالغالي

بخصوص الكيبورد عربي ؟

لا , لأني متعود اكتب بدون مااشوف الكيبورد فما تفرق عندي .

 

 

[XxTrookxX]

متعب الحارثي

انا طلبته طلب مسبق ومنتظر يوصلني ..

بس حبيت اذكر ملاحظه للاخوان اللي ربي يهديهم نظرته ضيقه ما يشوف ابعد من الكاميرا ..

الجوال صحيح الى حد ما مبالغ بسعره وهو الحقيقي 2500 اللي وصله الى 2700 هو الضريبه..

الجوال معروف واي مراجع دايم يقولك اذا انت من مستخدمين مواقع التواصل مثل السناب او انستغرام وحق ترزز وكذا الجوال مو لك ؛ دايما اجهزة بلاك بيري موجهه للشخص العملي كثير التراسل سواء بريد او واتساب وخلافها وشغله معظمه عليهم ولا يهتم بمسالة الكاميرا والشاشه انها تكون خارقه هذا اخر ما يهمني صراحه..

وبالنسبه لي انا رجعت لاجهزة بلاك بيري عشان الكيبورد ولان الجهاز بشهادة كثيرين بطاريته جباره ؛ قول ما تقول عن بعض الاجهزه لكن ارفض اني اشيل معاي بنك طاقه او شنطة معدات عشان جوالي.!

عطني اسرع واحد بجوالات اللمس واقدر اتغلب عليه وانا مغمض في سرعة الكتابه على الكيبورد الفيزيائي وهذا الشي بالنسبه لي مفصلي ما احب اكتب خمس كلمات اربع منهم غلط وانا على كيبورد لمس.

وعلى كل حال كل واحد واختياره وذوقه واحتياجاته ؛ لكن لا تنتقد الغير لان استخدامهم يختلف عن استخدامك ؛ لولا اختلاف الاذواق لبارت السلع.

تحياتي.

أشد يدي على يدك و انا معاك قلبا وقالبا
ابيك تصير صديقي

 

 

[XxTrookxX]

للي فاهم في الجوالات ويقول مبلغ وقدره عشان معالج سئ؟
اصلا مستخدم بلاك بيري معروفة توجهاته
انا كمستخدم للبريف والكي ون
ما عندي ولا لعبة على الجهاز ولا فكرت انزل اي لعبة.

التطبيقات اللي عندي كلها تطبيقات خاصة بالتصفح والمحادثات البسيطة والمالية والتجارية.

ما احتاج كاميرا قوية عشان اترزز بالسيلفي أو وجبة عشاء
ولا احتاج معالج قوي عشان عشان العب عليه قراند

كل اللي احتاجه كيبورد وأمان بالاستخدام ان شاء الله، مع اني اقدر اخذ ايفون إكس أفضل نوع مع استخدام أفضل نوع لجوال جالاكسي كجوال ثانوي ومع ذلك مابيهم وان وصل سعر البلاك بيري لأسعارهم أو تجاوزها ماخذه ماخذه ان شاء الله.

من الاخر انا متعصب لهالشركة مع العتب لها في حاجات كثيرة كعتاب محب وبس واللهي

 

 

[XxTrookxX]

معليش أمر آخر

اخر تواصل لي مع الدعم الفني عن طريق الشات:

اعتقد ان أصحاب الحجز المسبق راح توصلهم الأجهزة خلال هذا الاسبوع
وراح ينزل بمعارض اكسيوم بشكل رسمي إن شاء الله يوم 15 من هذا الشهر "أغسطس"

للأسف راح انتظر إلى يوم 15 لأن عندي تعويض بنص قيمة الجهاز ولا اقدر استفيد منه عن طرىق الحجز المسبق لازم من المعرض مباشرة.

 

 

[متعب الحارثي]

XxTrookxX

معليش أمر آخر

اخر تواصل لي مع الدعم الفني عن طريق الشات:

اعتقد ان أصحاب الحجز المسبق راح توصلهم الأجهزة خلال هذا الاسبوع
وراح ينزل بمعارض اكسيوم بشكل رسمي إن شاء الله يوم 15 من هذا الشهر "أغسطس"

للأسف راح انتظر إلى يوم 15 لأن عندي تعويض بنص قيمة الجهاز ولا اقدر استفيد منه عن طرىق الحجز المسبق لازم من المعرض مباشرة.

اتشرف بصداقتك وانا اخوك لا خلا ولا عدم ..

عاد مالنا الا الصبر وبطلب حتى من خويي يجيب لي كم كفر للجهاز من امازون بحكم انه راجع للسعوديه بعد فتره ويمكن اخذ حمايه للشاشه لانه مستحيل الاقي شي له بالسعوديه ؛ اذا الجهاز نفسه طلعت روحنا عشان نجيبه.

 

 

[® ABU MANSOUR]

يعطيكم العافية جميعاً

شباب عندي استفسار بسيط

بخصوص ازرار الكيبورد في هذا الجهاز هل تعرفون مقاسها

وياليت يتم مقارنتها في كيبورد بلاك بيري باسبورت


ودائماً نقول

أفضل ما أنتجت شركة بلاك بيري هو الباسبورت

 

 

[® ABU MANSOUR]

نقطة اخرى

بالأمس وانا اتصفح موقع سوق كوم حصلت استكر للشاشة وطلبت حبتين طبعا ما اتوقع انه يكون بجودة ممتازة جداً لكن هو مؤقت لين يتم الشراء عن طريق امازون

 

 

[® ABU MANSOUR]

طبعا حصلت البلاك بيري باسبورت مقاس الكيبورد هو 72 ملي

ياليت تتم المقارنة

 

 

[متعب الحارثي]

YeS InTeR

طبعا حصلت البلاك بيري باسبورت مقاس الكيبورد هو 72 ملي

ياليت تتم المقارنة

بس يوصل الجهاز رح اعطي انطباعي عنه لكن المشكله انه جاب لي العقده كل ما قلت انفكت عشان اشتريه ينط لي شي يخربها علي الله يعين بس.

 

 

[متعب الحارثي]

الجهاز اليوم توفر ما كمل كم ساعه الا الكميه كلها نفدت ومافي طلب مسبق وانما خيار الاعلام عند توفره فقط.

الله يلعن الحظ وش ذا الجهاز اللي مره معاند ما يجي نهائي لا بارك الله في بلاك بيري.

اي احد يقدر يوفره لي يراسلني خاص يا اخوان بالله عليكم ؛ او اذا يعرف محل ممكن يبيعه في اي منطقة بالمملكه مو مهم.

 

 

[No Mercy G]

xiaomi redmi plus 5 افضل منه بمراحل وب 600 ريال
معالج متوسط بسعر 2700 !! واذا جيت تبيع مايجيب 1200
حرام الي يضيع فلوسه على مثل هالاجهزه والله والحجه الكيبورد ماعاد احد يحتاج الكيبورد الكتابه على اجهزة شاشة اللمس صار اسرع !!