تجربتي بالتفصيل: المشروع اللي عرفني بالمليون ريال .. وسأهديه اليوم للجميع
banner
2019-10-14 , 10:30 صباحاً
Norway’s Avatar
Norway

Xbox Elite Team

المشاركات:5520
التسجيل:Oct 2013
Norway
راع البل كتب:
السلام عليكم .. سأدخل في التجربة بلا مقدمات

بدأت الفكرة أيام طفرة الأسهم وقبل انهيارها عام 2006 .. اهتمامي كان برمجة وتقنية بشكل عام ولا كانت تهمني ! دخولي للنت كان على كم موقع عربي مهتم بتطوير الويب ( سوالف سوفت - المبرمجون العرب ) وكم موقع أجنبي بنفس الاختصاص .

صار موضوع بالمنتدى حول مشكلة الضغط على السيرفرات وانهيارها عند دخول أعداد كبيرة من الزوار .. وكانت أحد مواقع الأسهم المشهورة (موقع تداول الأسهم والذي يملكه الأستاذ طارق الماضي الله يمسيه بالخير :stalite: ) الظاهر تبحث عن حلول لتلك المشكلة !! موقع يتجاوز أحيانا 50 ألف مستخدم متواجد وقت عمل سوق الأسهم وضغط بيانات وترافيك مهول على المستضيف !!

ضغطت الرابط وسجلت ( لاعادها الله من تسجيله ):58::58:
خلال أول شهرين لقيت موضوع لأحد عمالقة التوصيات بالمنتدى كاتب موضوع يبحث عن مبرمج لعمل برنامج ينظم اشتراكات مدفوعة بين الخبير صاحب التوصيات وبين المشتركين .. فقمت بمراسلته ومن ثم اللقاء بالماسنجر وحددنا موعد نتقابل فيه عشان نتفق على العمل .

قابلت الرجال ومنذ أن كلمته بالجوال في أول اتصال وهو الظاهر غير واثق أن فيه سعودي بينفذ المشروع !! كل شوي يسألني : أنت وسيط ولا مبرمج ؟! بتسويه بيدك ولا تعرف مبرمجين ؟!
المهم يوم تقابلنا لقيت معه أخ مصري كان جايبه عشان يختبرني :d ويتأكد أني فاهم ببناء هالمشروع وأني أقدح من راسي وماني مقاول بالباطن :d :d

المهم .. استلمت منه المشروع وعطيته سعر (خمسين ألف) حسيت أنه بغى يقوم يحب على راسي :22: وقلت له مدة التنفيذ شهرين وخلال الشهر الأول أكون رافع نص البرنامج على السيرفر عشان تطمئن وتتابع بنفسك التحديثات حتى يكتمل المشروع .. فتم الاتفاق وسلمني 10 الاف مقدم .

بالفعل رفعت اللي خلصته من البرنامج خلال أقل من شهر وعطيته الرابط وكان بيتشقق من الفرحة !! وصار بالجوال يدق علي وهو قدام الكمبيوتر ويقول عدل هذي بالبرنامج وشيل هذي وأضف كذا .. وأنا معاه أنفذ طلباته .. فعطاني وضعية زعيم مافيا مع ضحكة قوية وقام يعتذر لأنه قام بالاتصال بمقر عملي وسألهم هل فلان شغال عندكم .. نبي نزوجه وحقي عليكم تعطوني نبذه عنه :d:new4::new4: عشان كذا عطاني المقدم بدون أي تعاقد أو ورق يثبت حقه !!

المهم بعدها غطس الرجال فجأة وقفل جواله ولاعد له حس حتى بالمنتدى .. والعمل خالص بالكامل!! شهرين ثلاثة أربعة وأنا أدفع شهريا للسيرفر 2300 ريال على الفاضي!! المشكلة أن فيه ناس من خوياه أشوفهم يدخلون بالبرنامج مع قروباتهم وقت التداول ولا أقدر أغلق عليهم البرنامج بدون ما أعرف ظرف الرجال !!
أحد المرات طلب أحد المشتركين بالبرنامج جوال أحد الخبراء وعطاه إياه .. فقلت أكيد عنده علم بالرجال فقمت كلمته بعد انتهاء التداول بعد ماتأكدت أنه فاضي لي .. عرفته بنفسي وسألته عن الرجال فقال الرجال صار عليه حادث وداخل غيبوبة من شهور !! لكن بالنسبة لك باعطيك رقم أكبر أبنائه وتواصل معه وبلغه هل يبغون البرنامج ولا عاد يبلغونك أنهم مايبغونه !!
تواصلت معاهم وأفادوني بأنهم مايبغون البرنامج .. ومن طيبهم قالوا لي إذا تطلب الوالد فلوس وعندك مايثبت أبشر .. فأبلغتهم بأني فوق مصيبتهم في أبوهم ماراح أكون مصيبة في مالهم .. تنازلوا وتنازلت وانتهى الوضع على كذا !!

القصة فيها أحداث كثيرة وأحاول أختصر عشان لا تملون .. لكن فيه تفاصيل صعب أتجاوزها والله يعينكم إذا طال الموضوع :63:
رجعت للي موجودين بالبرنامج واعتذرتهم بأني سأقوم بإغلاقه .. فلموا قشكم وبلغوا مشتركيكم خلال أسبوع وكانت صدمة بالنسبة لهم !! واتصل علي اثنين منهم بنفس اليوم يطلبون مقابلتي لأمر ضروري بأقرب وقت !! تقابلنا وقالوا اسمع يالحبيب نبغاك معانا ونكمل هالمشروع .. وشكلك ماتعرف دخل الأسهم والتوصيات !! فقلت لهم ماعرف الأسهم لكن اشتروا البرنامج كامل واخصموا عشرة الاف رجعوها لولد خويكم وسلامتكم .. فقالوا حنا بعد مانفهم شي بالتقنية خلك معانا دعم فني ومتابعة وتطوير وحماية واستلم كل بيانات الموضع وتفاهم مع هالكفار اللي عندهم السيرفر !! لو شلنا بعض وكنا فريق عمل واحد فالكل مستفيد .. وترى بنعتبرك شريك ولست موظف تقني .. مافي أحد يأمرك أو يحسسك بأنك غريب عن مدراء المشروع حتى لقاءاتنا واجتماعاتنا حياك الله بأي وقت تعال وشارك بالقرار !! وطلعوا لي مجلد كبير زي اللي مانشوفه إلا بمكاتب العقار .. المجلد هذا كان فيه أسماء مشتركين وتواريخ انتهاء الاشتراكات وقروبات مصنفة للمضاربة والاستثمار وكشوف حسوبات وقيم المبالغ اللي كانت تدخل لهم شهريا :5::5::5::5:
كنت أسمع بالرواتب العالية وقصص الدخول الشهرية الخرافية مثلي مثلكم !! لكن أول مرة أشوفها موثقة قدامي بأوراق وكشوفات حساب رسمية !! مبالغ بتخليك تترك وظيفة وزير ولاعاد تفكر بالوظيفة نهائيا !!
كلمتهم اليوم الثاني وبلغتهم أني موافق واتفقنا على نسبة 25% لكل شخص ( عددنا أربعة واحد تقني و 3 خبراء ) .. وقالوا أجل الله لايهينك جهز 20000 ريال لأننا بنحط مبلغ 80 ألف مبدئيا ونخصصها للإعلان الرسمي عن انطلاق البرنامج :22::22::22:

يشهد الله سبحانه ماكانت بحسابي ولا معي حتى ألف ريال .. توي متخرج وعزابي وأصرف الراتب صرف الذي لايخشى الفقر ..وساكن ببيت الوالد متى ماشافني معتكف بغرفتي درى أني على الحديدة ولا أدري إلا برسالة التحويل على حسابي بدون مايقول لي كلمة :)
المهم استلفت ودخلت معاهم .. وبدأوا يعلنون في أشهر المنتديات المتخصصة بالأسهم والاقتصاد !! والمنتدى اللي يرفض الإعلان أو مايتفقون معه على مبلغ الدعاية كانوا يختارون اسم معين لأحد الأعضاء الكبار ويقولون له حط موضوع بالمنتدى واذكر برنامجنا وضع رابط تحميله ..وعشان الذمة لا تمدح ولاشي حطه على شكل تساؤل وش هالبرنامج ومن هم الخبراء .. زي كذا !!
طبعا الشركاء قاموا بالتنسيق أيضا مع أسماء لها وزنها بالمنتديات كخبراء إضافيين ينضمون للبرنامج .. وكانوا على ثقة أن هالأسماء بتجيب عالم بالهبل .. وأصدقكم القول إني كنت إذا طلعت من اجتماعاتهم أقول بقلبي وش ذا العالم ووش هالأرقام الفلكية اللي يتوقعونها ؟!! كيف يجيبون الخبير بمبلغ مقدم كبير جدا عشان يوافق بس ويواعدونه بالسداد خلال شهرين ؟!! طيب إذا ماسددوا مصيبة فالموقع مسجل باسمي رسميا وجوالي على الدومين وكل البيانات باسمي !! فرجعت وبلغتهم بأنني غير مستعد بالتورط في أي ديون أو المشاركة بقطع وعود مالية لأحد !! فقاموا يضحكون وقالوا لاتخاف من شي .. كمل معانا أول شهر وإذا شفت دخل البرنامج ضعيف وتحس أنك بتتورط فقم بنقل الموقع بأسم أي واحد فينا .. وسنعلن للجميع خروجك من مجلس الإدارة (صوريا)!!

وصلنا ليلة الافتتاح على أن التوقيت الرسمي لافتتاحه بيكون بكرة الصباح الساعة 9 بالضبط .. ذيك الليلة والله ماطب النوم عيني وأنا أراجع البرنامج وأختبره وأتأكد أن كل شيء شغال زي الساعة .. وكل ساعة يدق علي واحد منهم يطمئن على جاهزية العمل ويحذرني من العدد الكبير للمستخدمين المتوقع دخولهم .. ويعطيك كلام يخليك تهاب وتتوتر ( معتمدين عليك ياوحش - تراك بلحالك أساس هالمشروع لو طحت طحنا وراك - المشتركين دافعين فلوس لا ناخذ حقوق العالم ونقدم لهم خدمة سيئة !! )

فكرة البرنامج يدخله أي شخص ويتابع التوصيات اللي تظهر له على شكل نافذة من عند الساعة بالأسفل لمدة ثواني وتختفي .. لكن بعض التوصيات تظهر محجوبة ولا يشوفها إلا المشتركين اللي بفلوس !! واللي يحرق الأعصاب أنه بعد انتهاء فترة التداول يقوم كل خبير بعرض توصياته اللي حقق فيها أرباح للمشتركين بموضوع عام يخلي الشخص يتحسف أنه ما أشترك معاهم ودخل معهم لحظتها دون حجب الاشتراك المجاني !! ويحق للمستخدم الاشتراك مع أي خبير يثق فيه ويقدر يشترك مع أكثر من خبير .. هذا غير خدمات إضافية مدفوعة مثل الاستشارات أو تحليل فني لسهم معين أو التواجد من الخبير لمدة ساعة مفتوحة شاتنق مباشر مع المشتركين ( طبعا الشات يكون مغلق تماما وقت التداول للتركيز مع الخبراء فقط ) !
التحويل لمبالغ الاشتراكات كان على الحساب الشخصي لأحد أعضاء الإدارة اللي تم اختياره للإدارة المالية واستلام المبالغ .. وآخر كل شهر نجتمع بإثنين محاسبين لبناني وسوداني ونصفي النسب ونحول فلوس الخبراء ونوزع الدخل الصافي علينا كل واحد 25%

بسم الله بدأنا وأرسلت إشعار لجميع من قام بتحميل البرنامج على الويندوز بالافتتاح الرسمي و (اقلطوا حياكم الله) :7:
ثم انصرفت للوحة تحكم السيرفر لأتابع من هناك تدفق الحركة والترافيك على السيرفر وأتأكد بأنه سيصمد دون مشاكل وأجيب على الرسائل التقنية للمستخدمين اللي تتعلق بكيفية التسجيل والتعامل مع البرنامج .. وعن آلية الاشتراك والتحويل .. بدون مبالغة منذ أول نصف ساعة عجزت عن متابعة إشعار التحويل البنكي اللي كانت توصلني من البرنامج !! أنا من باب الحرص كنت معطي البرنامج أمر أنه عند ورود إشعار من المستخدم يفيد بتحويل المبلغ فإن البرنامج يعطيني صوت موسيقي عالي ونافذة كبيرة تظهر لي على الشاشة !! يااااجماعة فصلت السماعات من كثر التنبيهات .. رسايل تنبيه هنقت بجهازي .. أقسم بالله أني توقعتها هجمة للتخريب أو حوالات وهمية أو البرنامج انلحس وقام يخمبق ويهذري !!
خلصت فترة التداول الصباحية وأنا في ذهول من حجم التعاملات والاستفسارات ومن الضغط على الموقع !!! خلصت حوالي بكتين دخان وشكلي بالغرفة ووسط الدخنة تقولون ساحر !!!! ثم جاء الاتصال اللي عاد جابها من الآخر وخلاني أتأكد من أن الوضع جد وأنني قدام الأمر الواقع !! شريكنا اللي مستلم المالية دق علي وسألني مباشرة : فلان رح الآن للبرنامج وعطني مجموع المبالغ اللي تم رصدها كحوالات بنكية اليوم فأنا دخلت على حسابي بالبنك وجمعتها ونبي نتأكد .. بسرعة .. رحت ولقيت مبلغ استحيت أقوله خفت يقول برنامجك مهذري .. فقال لي تأكد لي بالله هل مجموع المبالغ هو كذا وكذا ريال !!!!!!!!!!!!!!!!!!!!!!! كأنه قاعد يقرأ من شاشتي !!! فقلت نعمممممممم نفس المبلغ .. فقال كويس وقفل على طول .. وقعدت ماسك الجوال على أذني وفمي مفتوح ساعة !!!!!!!!!!!!!

استمرينا بالمشروع لحد ماصار أول اجتماع محاسبي وطلع لي منه بعد التصفية مبلغ 22690 ريال مانسيت هالرقم وجنوني برسالة البنك يوم وصل بحسابي قعدت أقراها مية مرة وكل شوي أدخل موقع البنك أشيك عليه موجود ولا حلم :33: ..
رجعت للبيت وبلغت الوالد وقلت له شكلي باترك الوظيفة !! وقام متضايق وقال لي كلام صرت أقوله لأولادي إلى اليوم : انتبه .. لاتأخذ أي قرار وأنت في نشوة فرح أو نوبة غضب .. وتأكد بأن مشروع دخله كبير لهالدرجة لايخالف قوانين الدولة ... أبي منك هالحاجتين بس وبعدها الله يرزقك ياولدي !!!!!
ركدت الأمور وأجلت فكرة الفصل من الوظيفة .. وحاولت أقرأ عن القوانين المنظمة لهكذا مشاريع مالقيت فاستمريت بالعمل خاصة أن هناك برنامجين آخرين شغالين بنفس الفكرة وأيضا يوجد مؤسسة رسمية نزلت برنامج أيضا لسوق الأسهم وفيه اشتراكات وحوالات ولا أحد قال لهم شي ( البرنامج اسمه أوامر لعصام الزامل مؤسسة رمال للتقنية )

بعد السنة الأولى كان دخلي من البرنامج يطق 60 ألف وأذكر العطلة الصيفية كان يوصل للثمانين وأكثر بسبب العطلة وتفرغ الكثيرين لسوق الأسهم !! شريت سيارة ماياخذها أي شخص من جيلي توه متعين وبادي حياته العملية .. وظفت اثنين مصريين أعرفهم كانوا مهتمين بالتقنية وعطيتهم راتب لكل واحد 1500 ريال بشرط تواجدهم اليومي كدعم فني للمشتركين وتفرغت أنا للأمور الكبيرة وصرت أقدر أرتاح بعض الأيام وأتغيب عن فترة التداول .. وأصبحت من كبار العملاء لدى شركة الاستضافة الأمريكية لأنني مستأجر منهم سيرفرات ضخمة وأحاسبهم شهريا بمبلغ كبير أضعاف أضعاف المبلغ اللي كنت أدفعه قبل سنة فقط !! إلى درجة أني كنت أرسل لهم ناس من الزملاء يبغون استضافة مواقعهم وكانوا ينفذون له على طول قبل ماتوصلهم الحوالة :61:
كبر راسي وقمت أخطط على الكبير أوي :) .. وخلال هالفترة تابعت ماكان يكتب في البرنامج من أرباح محققة للمشتركين .. بل أن بعضهم دبل راس ماله في كم شهر !! فطمعت وقلت بنفسي دام كل التوصيات وكل الخبراء عندي بالبرنامج ليش ما أدخل بفلوسي بالأسهم وأستفيد من هالمكاسب الخرافية للسوق !!
وهذا ماتم .. دخلت بمبلغ بسيط تجربة .. ثم طمعت ودبلت المبلغ .. حتى حولت آخر هللة بحسابي للمحفظة اللي وصلت لستة أصفار وشفتها بحسابي حقيقة وليست حلم .. ماتتخيلون حجم النشوة والفرح وأيضا الاعتداد بالنفس يوم قدرت أصنع هالمشروع وأديره بما فيه من الاف المستخدمين ومن أموال نقدية متداولة ومن مشاكل تقنية كانت تأخذ مني بعضها يومين ثلاثة وأنا قدام الجهاز وعيشتي ساندوتش ولا حاجة على الطاير ماتشغلني عن البرنامج .


بعد سنة ونصف تقريبا .. وبعد ماصار سوق الأسهم على كل لسان ومافيه من أرباح أشغلت الناس عن وظائفها ودفعت الخلق للقروض والتسهيلات حتى النساء قاموا يبيعون ذهبهم للدخول بالسوق !! أصبح السوق سهل جدا التأثير على أي شركة فيه ارتفاعا وهبوطا فالشعب 90% منهم مدرعمين خلف قروبات التوصيات والمضاربين ولايفقه أبسط أبجديات التحليل الفني والأساسي .. وين ماقال لهم المضارب دخلنا دخلوا معه وشالوا السهم .. ومتى ماقال بيع قاموا يبيعون وينثرون الكميات نثر بالسوق هبوطا !!! وأقسم بالله أنني لازلت أذكر أحد الخبراء انضم للبرنامج مؤخرا وفي أول يوم من دخوله للبرنامج وقبل افتتاح السوق بحوالي نص ساعة حط رسالة عامة للجميع كتب فيها ( هدية مني للجميع بمناسبة انضمامي للبرنامج ولكي أعرفكم بنفسي .. أدخلوا سهم المراعي مباشرة مع الافتتاح ولاتشاورون .. والوعد نهاية التداول ) !!!! ماوصلنا نصف وقت التداول إلا وسهم المراعي على ضخامة كمياته نسبة عليا !!! سبحان الله هالخبير دورته من باب الفضول قبل سنة ولقيته بتويتر معه حوالي 900 متابع بعد ماكنا نعتذر للناس أن العدد عنده واصل الحد الأعلى .. فقاموا المشتركين يبيعون العضويات اللي عند هالخبير بمبالغ وصلت لخمسة الاف ريال لمدة شهر !!! مع أن الاشتراك الأساسي أعلى شي 1000 ريال !!

نرجع للسوق واللي صار فيه من أحداث وتغيرات وقفز جنوني للأسعار .. سهم بيشة وما أدراك ماسهم بيشة !! شركة عبارة عن حوش ونخلتين وقيمته ماتسوى عشرة ريال وصل 3000 وأكثر ثم تجزأ وصك هالمبلغ مرة ثانية وثالثة !! المصافي أتوقع وصلت 6000 وشوي !!!! شركات على ورق مسحت بأسعار سابك والاتصالات القاع حتى أصبحت تلك الشركات العالمية مسخرة ولا يدخلها إلا الشيبان أو الأهبل اللي مايعرف للسوق !! فجأة صار الشعب كله مايتكلم إلا بالملايين .. والجميع بدأ يتغيب عن وظيفته أو ينسحب منها وقت التداول أو تركها فعليا واشترى لابتوب وهو مايعرف حتى للآلة الحاسبة :2: والبعض باع بيته وسيارته .. والكثيرين صدقوا أنهم فعلا خبراء بالسوق يوم ربحوا فقاموا يجمعون الأموال من المقربين منهم ومن أصحابهم ويصيرون مدراء محافظ !!!! بدأت لوبيات المضاربين وقروبات التوصيات بالتناحر فيما بينها وبدأ شراء الذمم لأسماء بعينها في أشهر المنتديات ليطبل للسهم الفلاني أو يحذر منه !! هيئة السوق المالية كانت حرفيا واقفة عاجزة عن هذه الطامة الكبرى ولا عندها أي خطط للتعامل مع الحدث وتتابع بصمت ... بنوك بكبرها تركت الاستثمار وصارت محافظها تضارب يوميا زيها زي أصغر متداول !! الشركات بدأت تترك مشاريعها وتسوي محافظ أسهم وتلحق بالركب !! مجالس الإدارة للشركات المساهمة بدأت تتاجر بالمعلومة وتبيعها على المقربين أو النافذين فتجد الخبر بأي منتدى للأسهم قبل ينزل بموقع هيئة سوق المال الرسمي !!
كلمة يرددها الإخوة المصريين ( هاتخش في الحيط ) وهذا كان وضع الجميع بسوق الأسهم وقتها لأي عاقل متزن .. لكن الطمع والجشع عامل عمايله بعقول الجميع !!! حتى بدأت هيئة السوق تدخل لاحقا على استحياء بإعلانات تحذيرية وأحيانا عقوبات على أشخاص معينين تلاعبوا بسهم معين هبوطا وارتفاعا أو بنشر شائعات أو توصيات مظللة !! لكنها كانت خطوات متأخرة جدا .. وإلى اليوم لا أعفي الهيئة مما حدث لسوق الأسهم إذ تتحمل جزءا كبيرا من تبخر المليارات وتوريط الناس بالديون وامتلاء المحاكم بالقضايا المالية والمطالبات وضياع الكثير من العباد بخسارة أموالهم بل حتى عقول بعضهم ودخولهم في أزمات صحية !!

عودة لبرنامجنا .. قربنا نكمل سنتين والوضع زي الحلاوة والدخل عالي جدا وأصبحنا نوظف 8 أشخاص دعم وتقنية و 4 أشخاص محاسبة ومالية .. والخبراء ماشاء الله اللي شرى له عمارة شقق مفروشة واللي شرى استراحة ورفه عن نفسه وأهله .. وأخوكم في الله قامط على كل ريال ويحوله مباشرة للمحفظة .. وكل ماتقابلنا يسألوني أنت يافلان عساك شريت (أصول) يقصدون عقار .. وأجاوبهم بالنفي فأنا براسي طموح كبير مهوب وقته الان .. فكانوا ينصحون ويحاولون ينوروني لكن رفيقكم على قولة القذافي ( ينطحون صخرة صماء ) :30:

في يوم من الأيام جاني مكالمة من الشريك حق المالية .. وكانت وقت افتتاح السوق .. استغربت توقيته المفروض الان أنه مقابل المشتركين والبرنامج مستحيل يفضي للمكالمات .. رديت عليه وقال اسمع توني طلعت من (مؤسسة النقد) تحقيقات وبهذلة .. بلغ الشباب كلهم ضروري نجتمع الليلة لأننا في مشكلة كبيرة !!!!! ياولد عسى خير قال نجتمع واعلمكم .. وبالفعل اجتمعنا وأبلغنا بأنه تلقى اتصال قبل أسبوع من الإدارة العامة بالبنك وسأله الموظف عن هذه الحركة الكثيفة للحوالات على حسابه ومصدرها .. فيقول جاوبته وعطيته فكرة مشروعنا وطريقته وقلت له هالطريقة موجودة في كل الأسواق العالمية بل أن بعض البرامج الخبير فيها يكون بالصوت والصورة مباشرة مع المشتركين !! فيقول شكرني الموظف وقفل .. لكن اليوم وبعد أسبوع من اتصال البنك تم استدعائي من قبل مؤسسة النقد بلهجة قاسية شوي وقالوا حضورك مطلوب أو بتعرض جميع حساباتك البنكية للإيقاف !! راح لهم ووضعوا قدامه الأنظمة واللوائح المستحدثة والتي تنص على تجريم تلك المعاملات المالية مالم تكن تحت تصريح رسمي باسم مؤسسة وليس حساب شخصي !! وكلمة واحدة لك أنت وبقية المؤسسين للبرنامج بإيقاف البرنامج فورا والحضور غدا للإقرار والتعهد بعدم ممارسة النشاط مرة أخرى دون استصدار التصاريح الحكومية المنصوص عليها نظاما !!!
فقلنا سمعا وطاعة .. ماعلى النظام وعلى كلام الحكومة كلام !! فأعلنا للجميع بالبرنامج عن التوقف امتثالا للنظام وطلبناهم يراسلونا بمبالغ الاشتراكات اللي ماكملت أيامها لإرجاع المبالغ بحساباتهم .. وكنا نظن أن الأمور سهالات وبنطلع سجل تجاري ونستصدر التصاريح اللازمة ونرجع من جديد !!

كله كوم ومعرفتنا بما حصل لبرنامج ( أوامر ) ومؤسسته كوم ثاني !! تم إيقافه وتجميد حسابات المؤسسة البنكية ودخولها في شكاوى ومطالبات مع المشتركين وتجميد كل أنشطتها سواء لها علاقة بالأسهم أو مالها علاقة !!
استنفرنا كل المعارف من ذوي الخبرة للمشاورة أو توضيح الأمور لمستقبل مشروعنا وجميعهم على رأي واحد ( توقفوا حالا فالدولة لاتتساهل في هذا الباب إطلاقا وأنتم في غنى عن تبعات صارمة خاصة أن هالتعاملات تتعلق بأمن الدولة وإحدى وسائل دعم الإرهاب !! ) .

خلال فترة التوقف تلك كان الوضع كارثي بالنسبة لي .. فخسايري بالسوق بدأت تزيد بسبب غياب الخبراء .. وهيئة سوق المال بدأت تجلد السوق بقرارات صارمة وتنظيمات جديدة وإيقاف كامل لشركات مضاربية مشهورة بما فيها من أموال المساهمين مما زاد الوضع سوءا وسبب الفزع والهروب لكبار المتداولين بالسوق وتأثر الصغار وراهم !! فكنت يوميا أخسر أقل شي 30 ألف !! وصرت حرفيا زي المقامر اللي يدخل بالحظ ويعاند ويعيد الكرة ويجازف بالأول والتالي وياغناة الذيب يافقره !!

دابكنا لين حفيت رجلينا وأدركنا أيضا صعوبة أو استحالة استصدار التصاريح الخاصة بمشروعنا .. فهو ضائع بين أكثر من جهة ووزارة ( التجارة - مدينة الملك للعلوم والتقنية - هيئة السوق - مؤسسة النقد ) وكل مارحنا لأحد تلك الجهات أفادونا بعدم الاختصاص أو أنه لا يوجد حتى الآن قانون ينظم ذلك النشاط أو حتى يسمح به !! وتأكدنا قطعيا على أن مشروعنا قد انتهى ماحدث في سوق الأسهم من انهيار مؤلم عام 2006 وحجم الكارثة المهولة التي تسبب بها في حق الناس والخسائر الفادحة التي مني بها اقتصاد البلد !!

بعد تلك الأحداث وبعد مادخلت محفظتي ولقيت الستة أصفار راحت ولم يتبق منها إلا صورتها في كشف الحساب وذهاب الدخل الكبير اللي كنت أحصده كل شهر بدأ عقلي يستعيد بعضا من منطقيته !! أيام ورى بعضها كنت معتكفا في غرفتي ما أكلم أحد ومقابل الشاشة أتحسف على تلك الأرقام التي كانت ملكي قبل أيام وكنت أقدر أسكن أسرتي في قصور .. لكني طمعت وكنت أحرم نفسي وأحرم أولادي حتى من السفريات عشان أزيد رصيدي بالأسهم !!

وش هالسوق اللي طول عمره بيستمر يدبل الفلوس .. وين كان عقلي ليواجهني بالحقيقة أن يعقب الصعود هبوط حتمي طال زمن أم قصر !! وأين ( الأصول) اللي كانت ستحميني وتشد ظهري في مثل هذه الأزمات !! وش يعني أصلا سهم وقت الأزمات والكوارث الاقتصادية !! حقيقة هو لاشيء .. مجرد أرقام لن توفر لك كأس ماء لو حدث عارض أو هزة قوية .. وشفت هذا حولي فشركائي كان عليهم تسهيلات بنكية بالملايين وتخارجوا منها ببيع بعض الأصول لديهم أو تقديمها كضمانات للبنوك ولجهات التمويل تكفل سداد ماعليهم !!

انتهت قصة المشروع لكن أعتبر نفسي لازلت كسبان .. خبرة كبيرة استفدتها من هالتجربة ولو كنت بنفس عقليتي المالية قبل هالمشروع لكنت ضائعا مشتتا إلى اليوم ولم أستطع توفير ريال واحد وكنت سأستيقظ متأخرا جدا !! كسبان لأني خرجت أقل شي ومافيه أحد يطالبني بفلوس ولم أستلف وماضعت زي اللي باع بيته وسيارته وطلع منها مشرد يطلب المعونات والفزعة .. صحتي بخير ولم أتعمق في التفكير بحجم الخسارة وأسقط في غياهب اللوم وجلد الذات والأدوية النفسية والاكتئاب .. كنت أنظر لبيتي وأسرتي وأطفالي وهم بفضل الله بكامل عافيتهم ومبسوووطين بوجودي بينهم بعد أن كنت أغلق في وجوههم باب الغرفة بالأيام .. صرت أكثر إنصاتا للوالد الذي كنت أرى نصحه وإرشاده تجارب عفى عليها الزمن وأنني أكثر علما واطلاعا وخريج جامعات بينما الوالد انشغل برزقه في رعي الأغنام والزراعة عن المدارس .... انتهى !


الهدية : سأضع للجميع نسخة من هذا البرنامج أو ( المشروع الحلم ) .. ولا أستبعد أن يخرج لي من بينكم من يعرفه سابقا أو كان من مشتركيه :2::2:
البرنامج تم بيع نسخ منه قبل المنع بمبالغ كبيرة جدا .. وقدمت عروض للحصول على السورس كود وحقوق الملكية لولا أن أتهم بالمبالغة لذكرت لكم مبالغ تلك العروض .
البرنامج بالسورس كود يعني تقدر تعدل عليه وتضيف وتقوم بتخصيصه كما تريد .. والكود البرمجي مكشوف بالكامل بدون أي تشفير .. مكتوب بلغة فيجوال بيسك 6 وقاعدة البيانات MySql ويتم الاتصال بينهما عن طريق صفحة بلغة php .
سيفيد كل طالب مهتم بالبرمجة أو ريادي أعمال حاب ياخذ فكرة عن هذا النوع من البرامج .. أو حتى يستفيد منه مبرمج آخر يقوم بتطويره للعمل على بيئة الدوت نت ويقوم ببيعه على دول يسمح فيها ببرامج من هذا النوع .. ينفع حتى للهواة أو المترددين في الدخول لعالم البرمجة ليدركوا أنهم يترددون عن فتح الباب الذي قد يفتح لهم خزائن الرزق وكسب المال .

وضعت نسخة منه بمنتدى سوالف سوفت عام 2012 عرفانا لهذا الموقع العربي شبه الوحيد على أيامنا اللي كان يعلمنا البرمجة وتطوير المواقع متنازلا عن الإعلانات وكثرة الزوار للموقع مقابل ماكانت تحققه مواقع الإسفاف والمحتوى الشعبوي من سخافات وتسطيح للعقول .. ثم وجدت أن المستفيدين منه قليل من المهتمين بالتقنية فقط .. ولم يسمع الكثير عن تجربته .. فآثرت اليوم أن أعيد رفعه بينكم هنا وفي القسم العام دون اختصاص .


تحميل مباشر : http://www.mediafire.com/file/cwcy52p21w2c877/M...



المعذرة على الإطالة .. وختاما أستودعكم الله


كلام جميل اخي الكريم لكن انت لم توضح نقطة معينة

من اين تحصل علي الخبراء :d

بالنسبة للكود البرمجي هل هو 100% بدون حقوق نشر

بمعني
اقدر استخدمه بدون دفع رسوم لصاحبه ؟
اقدر ابيعه بدون دفع رسوم او اذن من صاحبه ؟
طريقة تركيبه لتجربته ؟ هل هناك كود داخله مشفر يفيد بعدد من قام بتحميله او تثبيته ؟

شرح مبسط لطريقة تركيبه علي سيرفر محلي او عالمي للتجربة !

ياليت تخليه مفتوح 100% بدون اي حقوق لهذا الاصدار علي الاقل

اذا ودك تدخل بهذ المشروع عندك امارة موناكو و امارة اندورا وضعهم في السليم بخصوص الاسهم و ايضاً منطقة ماكاو ذاتية الحكم في الصين :69:


حتي عندنا في شمال اوروبا مسموح محافظ الاسهم و المضاربة لكن مدري عن القوانين التنظيمية لها

اهم شئ توضح النقطة الخاصة بالحقوق و هكذا

:11:
:11:
:11:
2019-10-14 , 10:30 صباحاً
2019-10-14 , 10:43 صباحاً
New Folder’s Avatar
New Folder

مبدع

المشاركات:3088
التسجيل:Apr 2006
New Folder
قصه جميلة ... بس مدري عن صحتها .. وعندي شكوك في البرنامج الي رافعه حتى ..
واشارك اخوي Tq007 برأيه انك ترفعه على github .
2019-10-14 , 10:43 صباحاً
2019-10-14 , 11:04 صباحاً
Norway’s Avatar
Norway

Xbox Elite Team

المشاركات:5520
التسجيل:Oct 2013
Norway
New Folder كتب:
قصه جميلة ... بس مدري عن صحتها .. وعندي شكوك في البرنامج الي رافعه حتى ..
واشارك اخوي Tq007 برأيه انك ترفعه على github .


اضم صوتي لصوتكم و نطالب برفع البرنامج علي جيتهوب و تاكيد نوع صلاحية استخدام الكود المصدري

سؤال هل هذا الكود هو الكود النهائي الخالي من المشاكل التي واجهتها عند انشاء الموقع ؟ بمعنى ادق انت قلت مشكوراً انك واجهت مشكلات استغرق منك ايام لحلها فهل هذا الكود يتضمن تلك الاصلاحات ؟ او انه الكود الاساسي لبداية المشروع و اي تطوير او تعديل لم يرفق به :69:

:11:
:11:
:11:
2019-10-14 , 11:04 صباحاً
2019-10-14 , 11:10 صباحاً
sniper 7’s Avatar
sniper 7

متميز

المشاركات:12033
التسجيل:Oct 2008
sniper 7
قصة ممتعة, والله يسعدك ويعوض عليك خير

اهم شي الصحة والعافية وانك ماتكون ظالم احد

جدا استمتعت بالموضوع
2019-10-14 , 11:10 صباحاً
2019-10-14 , 12:28 مساءً
sounds ideal’s Avatar
sounds ideal

**

المشاركات:1443
التسجيل:Oct 2010
sounds ideal
أحمد الحويطي كتب:
هذا سورس كود البرنامج يعني لو عندك إهتمام بالبرمجة بتشوف كيف كان يشتغل وتقدر تطوره أو تسوي واحد مثله




ذكرني بأسلوب الصحفيين لما يحط لك عنوان مثير,, حركات رخيصة
2019-10-14 , 12:28 مساءً
2019-10-15 , 08:41 صباحاً
bnFawaz’s Avatar
bnFawaz

مبدع

المشاركات:2597
التسجيل:Aug 2010
bnFawaz
sounds ideal كتب:
ذكرني بأسلوب الصحفيين لما يحط لك عنوان مثير,, حركات رخيصة


ياخوي اذا ماتدري وش السالفة اسكت ترا شكلك والله بايخ

السورس كود مفيد لأي شخص عنده اهتمام بالبرمجة حتى لو ان البرنامج قديم او قفل
-صاحب الموضوع زي ما قالوا الشباب حط الكود في github
2019-10-15 , 08:41 صباحاً
2019-10-15 , 12:11 مساءً
sounds ideal’s Avatar
sounds ideal

**

المشاركات:1443
التسجيل:Oct 2010
sounds ideal
bnFawaz كتب:
ياخوي اذا ماتدري وش السالفة اسكت ترا شكلك والله بايخ

السورس كود مفيد لأي شخص عنده اهتمام بالبرمجة حتى لو ان البرنامج قديم او قفل
-صاحب الموضوع زي ما قالوا الشباب حط الكود في github




انا ما انكر انه محتوى الموضوع مميز ومشوق في نفس الوقت,, اللي قهرني العنوان فقط وبالنسبة للبرمجة انت تحسب كل الناس عندهم اهتمام في هذا المجال؟؟ ما راح اسكت انا مو في بيتكم عشان تقول هالكلام
2019-10-15 , 12:11 مساءً
2019-10-16 , 02:57 صباحاً
Sohaib’s Avatar
Sohaib

متميز

المشاركات:9690
التسجيل:Oct 2006
Sohaib
من زماااااااااااااااااااااااااااااااااااااااان ما قرأت مقاله بمثل هذه .. يارجل بغض النظر عن القصه البطله التي حصلت لك و التي خرجت منها بمعرفه و عبره

الا ان مشاركتك هذه رجعتني لايام المنتدى 2006 الى 2010 ..
2019-10-16 , 02:57 صباحاً
2019-10-17 , 10:05 صباحاً
عبد الكريم مهند’s Avatar
عبد الكريم مهند

فعال

المشاركات:1454
التسجيل:Jan 2010
عبد الكريم مهند
ما شاء الله عليك، استمتعت، ورجعت لي ذكريات ونفائس تلك الأيام، والحمد لله أنك طلعت منها سالم وغانم بخبرتك، وإن شاء الله أنك مستفيد منها.

عشت تلك الأيام، لكن بدون معرفتك (وأتذكر معرفك) وبدون البرنامج، لكن فقط بعد توفيق الله حرص مثل حرص الشياب، والحمد لله، خرجت منها سالم معافى برأس مالي، لا خسائر ولا ديون.

ويتبين لي ما كان مشاعاً وقتها أن تدخل الدولة بين متأخر وخاطئ وعشوائي الخ كان أحد أسباب الإنهيار.
2019-10-17 , 10:05 صباحاً