برامج تدريبيه او اي نصائح لطالب هندسه كهربائيه مستجد
وعليكم السلام، وضعك سهل جدا، لكن الكلام اللي تحت كله رأيي الشخصي، والقرار لك:
1- شخصيا ما أنصح بأغلب البرامج اللي قاعد تتكلم عنها. للأسف الشديد أن أغلب البرامج هذي للغرض والاستهلاك الإعلامي فقط، وقليل ما تحصل فيها فائدة كبيرة. يعني ممكن تروح عشان تدرس يوم كامل من 7 إلى 4، وبالأخير ما راح تطلع بفائدة إلا ساعة أو ساعتين.
في الجامعات اللي برا تحصل فرص كثيرة مثل المشاركة في مشاريع، المساعدة في أبحاث، حضور دورات عملية مهمة وغيرها. وهذي الحاجات تفيدك بشكل كبير وتضيف الكثير على سيرتك الذاتية، لكن للأسف هنا ما فيه شي مثل كذا (على حسب علمي)، وزي ما قلت لك البرامج هذي قليلة، وصعب تحصل مقاعدها، ولو حصل لك مقعد فما راح تستفيد الشي الكثير منها.
2- أفهم رغبتك بإضافة شهادات ودورات على سيرتك الذاتية، لكن راح تواجه مشكلة كبيرة في الناحية هذي (وبحط لك الحل المناسب تحت)، يعني راح يكون وضعك إما:
الحالة الأولى: تحصل دورات عليها شهادات، لكنها دورات أساسية وما راح تفيدك. يعني راح تحصل دورات في المايكروسوفت وغيرها من البرامج، لكن حصولك على شهادات بهذي الدورات ما يضيف شي حقيقي لسيرتك الذاتية. لكن ما راح تحصل مراكز معتمدة أو جامعات أو حتى جهات عمل تعطيك دورات مهمة في أمور لها علاقة بتخصصك. يمكن تحصل شهادات عالمية (أغلبها أمريكية) تكون على وظائف معينة في قطاعك، والشهادات هذي معترف بها لكن عليها مشكلتين: غالية جدا (يعني ممكن تدفع 500-1000 دولار عشان تدخل الاختبار) ومردودها غير مؤكد، يعني مو شرط تحصل وظيفة لأن معك الشهادة هذي، لأن الأغلبية يتوظف بدون الشهادات هذي، ولو احتاجتها جهة العمل فراح تطلبها من الشخص.
الحالة الثانية: تحصل دورات أون لاين مفيدة جدا وفيها شهادات، لكن لأنها أون لاين فما راح يكون لها وزن حقيقي. يعني بتحصل مواقع كثيرة تقدم لك كورسات مختلفة، وعادة تحصل فيها مواد قيمة، لكن عشانها أون لاين فما راح ينظر لها.
الحلول والنصائح:
ممكن الكلام اللي فوق أصابك بالإحباط، لكن صدقني الوضع سهل. وشخصيا هذا النظام اللي اعتمده بشكل شخصي، ولو تطبقه فراح يفرق معاك بشكل كبير. اختصار الموضوع هو أنك لا تعمل ولا تشتغل ولا تدرس عشان الشهادات، سو كل اللي قبل عشان تطور من نفسك، ووقتها معرفتك وفهمك العميق للتخصص راح يكون واضح وضوح الشمس، ووقتها ما تحتاج الشهادات لتعطيك أي مصداقية. وعليك عمل الآتي:
1- لازم البداية تكون في فهم أساسيات التخصص بشكل جيد، يعني ما ينفع تكون حافظ المنهج، أو عندك فهم مغلوط عنه، لازم تكون الأساسيات هذي زي الحلق في أذنك. لذلك لازم تركز على الكتب العلمية الأكاديمية (Textbooks). ما أدري إذا لغتك الانجليزية جيدة ولا لا، لكن لو لغتك ضعيفة فتطوير لغتك لازم يكون اولويتك الأولى.
بعدها لازم تذاكر من الكتب الأكاديمية، لأن شرحها (خصوصا الجيد منها) أفضل من شرح أي دكتور. لذلك لو عندك أي مادة معينة، ادخل امازون وابحث عن كتاب باسم المادة، وراح تطلع لك عشرات الكتب. وقتها ادخل وشف مراجعات الناس، وش رأيهم بالكتاب. وبعد ما تختار كتاب معين إبدأ فيه واستمر عليه حتى تخلصه، يعني لا تنتقل من كتاب لآخر فقط عشانك حصلت شي صعب أو غير مفهوم، لو ما فهمت شي معين ابحث عنه بالانترنت وبكل مكان، وبمجرد ما تفهمه ارجع للكتاب وكمل. ولازم طبعا تحل المسائل الموجودة في آخر كل فصل، قراءة بدون حل المسائل بنفسك (مو تشوف الكتاب كيف حلها) ما راح تفيدك. لذلك أنصحك تبحث عن كتب لها حلول متوفرة على الانترنت (Solution Manual) عشان تتأكد أن حلك صحيح.
طبعا الخطوة الأولى هذي راح تستمر معاك للأبد، يعني لا تعتقد أنها فقط للسنوات الأولى. ومع الوقت راح تتعود على الشي هذا، وتصير تعتمد على نفسك بتحصيل المعلومة، وهذا يخليك قابل للتطور، عكس غيرك اللي ما يدرس إلا إذا فيه دكتور يشرح له وواقف فوق راسه في مسألة الاختبارات والمشاريع.
2-تعلم الأمور اللي لها علاقة بتخصصك. يعني ابحث بالانترنت عن البرامج اللي يستخدمها المهندس الكهربائي، وهذي (بحسب علمي) إما تكون: لغات برمجة، برامج تصميم، برامج حسابات، برامج محاكاة. برامج المحاكاة تجي شوي احترافية وما أنصحك تبدأ فيها، لكن عليك بالثلاث الأولى. ابحث عن لغات البرمجة المستخدمة بكثرة بالمجال (ممكن تكون لغات برمجة صرفة مثل Python او Java، وممكن تكون برامج حسابية قوية مثل MatLab). وكمل نفس الشي على برامج التصميم والحسابات. طبعا ما تحتاج معاهد أو أماكن تعطيك دورات، بتحصل مقاطع بعشرات الساعات على اليوتيوب، وبتحصل كتب ومشاريع أون لاين تقدر تطبق عليها.
3- التفت (وخصوصا بعد ما تفهم أساسيات التخصص) للجانب العملي. اللي يميز تخصصك هو سهولة القيام بتجارب عملية، عكس مثلا الهندسة المدنية أو الميكانيكية. وبتحصل كتب كثيرة (تكون موجهة للفنين عادة) تركز على الجانب العملي من التخصص. لازم تبدأ تقرأ الكتب هذي وتشتغل على الاجهزة بشكل عملي. هذا راح يفيدك من الناحية العملية، وأيضا راح يرسخ المفاهيم اللي تعلمتها، وتصير تشوفها قدامك على أرض الواقع. يعني إبدأ بداية بالقراءة، بعدين شراء أجهزة قياسات بسيطة، بعدين تفك أجهزة وتشوف وتتعرف على مكوناتها، وتستمر على هذا النحو.
4- وهذي النقطة الأخيرة (ما أنصحك تبدأ فيها إلا بآخر سنة أو سنة ونص من الدراسة)، وهي انك تشوف الجانب العملي الفعلي للتخصص. يعني بتحصل حاجات يسمونها Standards، أو مراجع. هذي تكون زي الكتالوج اللي يجي مع الأجهزة، لكنها للعمليات الهندسية المعقدة. يعني مثلا كيف تدير محطات الطاقة، كيف تشغلها، كيف تسوي لها صيانة، كيف تكون عملية مراقبة الجودة وغيرها. طبعا بتحصل مراجع أمريكية، ومراجع بريطانية وأوروبية، وبتحصل أيضا من منظمة ISO وغيرهم. أنت شف المعمول به عندنا ايش، يعني الشركات المحلية وش تعتمد بالضبط، وإبدا أقرأ فيها لأنها بتعطيك خلفية عن الجانب العملي الهندسي للتخصص. لكن أنصحك تبدأ فيها متأخر لأن بيكون فيها مفاهيم متقدمة، وتحتاج تكون فاهم لأمور كثيرة بالتخصص قبل ما تبدأ تقراها.
طبعا كل الأمور هذي بالنهاية راح تضيفها لسيرتك الذاتية. يعني مثلا راح تذكر فيها أنك متقن للغات برمجة أو برامج معينة، وهذي تقدر تثبتها عن طريق عمل مشاريع ومشاركتها مع جهة العمل. وفهم التخصص راح يوضح من خلال معدلك والمقابلة. وباقي الحاجات تقدر تحطها كمهارات (أو ممكن تاخذ عليها دورات لو حاب)، لكن بالنهاية إذا شافو شي يلفت انتباههم، أو شافوا مهارات كثيرة، فراح يسألونك عن بعضها (عشان يشوفوا أنت فاهم ولا بس حاط كلام)، وهذي لحالها كافية أنها تبثت لهم فهمك بالتخصص بدون الحاجة لشهادات.
الخلاصة: التركيز على الشهادات لو عايش وحاب تشتغل بالسوق المحلي أشوفه مضيعة وقت. لأن ما فيه معايير واضحة، وما فيه شهادات لها قيمة علمية تستاهل المبلغ أو الوقت اللي ممكن يصرف عليها. لذلك أنصحك تشتغل على نفسك بنفسك، وشغلك راح توضح نتائجه من خلال فهمك للتخصص سواءا معاك شهادات ولا لا.
بالتوفيق
