البنق PING او LATENCY !! ماهو ؟؟ وما تأثيره على الأتصال ؟؟ وكيف يقاس ؟؟ وكيف انزله ؟؟

[S H E Z O N]

السلام عليكم ورحمة الله وبركاته

لاحظت انه كثير من الأخوان يسألون عن البنق وما هي فائدته وهل البنق اذا كان عالي افضل او اذا كان قليل زي التساؤل في هذا الموضوع

http://adslgate.com/dsl/showthread.php?t=75150

وكتبت هالمشاركه على شكل رد لكن يوم شفتها طويله واعتقد انه مهمه وشاملة حبيت اني اضعها على شكل موضوع على شان يستفيد اكبر قدر من الأشخاص

ان شاء الله يكون شرحي واضح وانا راعيت انه يكون الشرح بالتفصيل الممل وكثرت امثله على شان ترسخ

========================================
========================================

البلاي ستيشن او الكمبيوتر أو ....... إلخ حقك يتصل بالسيرفر
البلاي ستيشن او الكمبيوتر او ...... إلخ حقي يتصل بالسيرفر

نلاحظ انه الشي المشترك بيننا السيرفر

خلونا نعرف البنق

البنق بالأنجليزية ping او ما يسمى بـ LATENCY أي زمن التأخير

يقاس بالملي ثانيه ms اختصار الملي سكند

لو طلبت شي انا من السيرفر او اعطيته امر الساعه 2 و 30 دقيقه و 40 ثانيه و 545 جزء من الثانية وكان اللاتنسي او البنق عندي 1150 ملي سكند وش بيصير ومتى راح يوصل للسيرفر انه فيه واحد اسمه شيزون طلب هالأمر
راح يوصل للسيرفر الساعه 2 و 30 دقيقه و 41 ثانيه و 695 جزء من الثانيه

نلاحظ صار فيه فرق بين طلبي ووصوله للسيرفر والفرق هو ثانيه و 150 جزء من الثانية
الفرق هذا هو اللاتنسي او البنق
وانا في المثال قلت انه البنق عندي 1150 ms ومعروف انه التحويل من الملي ثانية الى الثانية يقسم على 1000 يعني 1150 ms نقسمها على 1000 بيعطينا 1.15 ثانية

بالمختصر انه امري او طلبي يحتاج على شان يوصل للسيرفر ثانية و 15 جزء من الثانية

طيب ممكن واحد منكم يقول التأخير بس ثانية عادي ما راح يأثر

هو صح ما راح يأثر لو انك طالب تفتح موقع مثلاً ياهو او موقعنا موقع البوابة الرقمية لو تأخر ثانية عادي وش بيصير
لكن في الألعاب السريعه لا راح تفرق معك وبقوه

وهذا مثال للعبة ريزيستنس ومعروف انه اللعبة لعبة منظار اول (( امش واقتل )) وراح يوضح الفرق اللي بيصير

فالنفرض مشغلين اللعبه وقاعدين في خريطه انا وياك وقاعدين قدام بعض وكل واحد معه رشاش
وانا البنق عندي 300 ms وانت البنق عندك 150 ms

وفي نفس الوقت الحقيقي يعني مثلاً كلنا الساعه 10 و 50 دقيقه و 500 جزء من الثانيه ضغطنا زر إطلاق الرصاص وش بيصير ؟؟

اللي بيصير انه صاحب البنق الأقل راح توصل طلقته قبل صاحب البنق العالي يعني انت راح توصل طلقتك قبلي ومعناته انا بموت قبلك

لأنه السيرفر راح يستجيب للأمر حقك امر الأطلاق الساعه 10 و 50 دقيقه و 650 جزء من الثانية
وانا راح يستجيب السيرفر لطلب الأطلاق حقي الساعة 10 و 50 دقيقه و 800 جزء من الثانية
وبكذا انا راح اموت وانت راح تظل حي ترزق

نستنتج انه الأشياء اللي تحتاج سرعة عالية هي اللي يأثر عليها البنق ولكن فيه اللعاب ما يهم فيها البنق لأنه اللعبه لاتعتمد على من يعطي الأمر اولاً

========================================
========================================

نجي لطريقة قياس البنق
فيه عدة طرق فيه اللعاب توضح لك البنق عندك كم وفيه عن طريق جهاز الكمبيوتر

عندك موقع http://www.speedtest.net يقيس لك السرعة والبنق او زمن التأخير

شوفوا هذا اختبار اجريته في الموقع لسيرفر بالرياض



نشوف انه البنق او زمن التأخير 108 ms يعني لو بطلب شي من السيرفر هذا حق الرياض بيوصل طلبي بعد 108 حزء من الثانيه

لكن لو تلاحظون انه حنا ما راح نلعب في هذا السيرفر يعني لعبة ريزيستنس ما ادري السيرفر وين موقعه ولكن فالنفرض انه في لندن

خلونا نقيس البنق لسيرفر في لندن ونشوف وش النتيجه اللي بيعطيني اياها



نلاحظ انه البنق عندي زاد الى 251 ms يعني انا اذا طلبت امر من السيرفر هذا اللي في لندن راح يتأخر طلبي الى ان يوصل 251 ملي ثانية يعني تقريباً ربع ثانية

وهناك طريقة اخرى لقياس البنق
في الوندوز تروح لأبداء Start >>> تضغط على الأمر تشغيل >>> RUN
تكتب في الخانة الفاضية cmd

راح تفتح لك الشاشة السوداء
اكتب الأمر
ping www.yahoo.com
راح تطلع لك النتيجة مشابهه للشكل هذا

[PHP]
Reply from 10.21.10.1: bytes=32 time=497ms TTL=254
Reply from 10.21.10.1: bytes=32 time=496ms TTL=254
Reply from 10.21.10.1: bytes=32 time=496ms TTL=254
Reply from 10.21.10.1: bytes=32 time=496ms TTL=254

Packets: Sent = 4, Received = 4, Lost = 0 (0% loss
Approximate round trip times in milli-seconds:
Minimum = 496ms, Maximum = 497ms, Average = 496ms[/PHP]

نلاحظ انه سوا اربع اختبارات واعطى متوسط للبنق يساوي Average = 496ms

========================================
========================================

نجي لأخر نقطة
وش الشي اللي يأثر على البنق يعني مثلاً واحد يقول البنق عندي عالي ابي انزلة كيف ؟

للأسف هالشي هذا موب زي السرعة تتصل على الأتصالات وتقولهم نزلوا لي البنق او ارفعوه لي

سرعة الأتصال راح يكون لها تأثير بسيط جداً ولكن التأثير القوي يكون في سعة الباندويث والبنية التحتية السليمة من نقطة الأنطلاق (( جهازك )) الى نقطة الوصول (( السيرفر )) وبعد النقطة اللي تطلبها ايضاً لها تأثير قوي يعني لما تطلب شي من سيرفر في امريكا ما راح يكون افضل من انك تطلب شي من سيرفر في الرياض وهالشي شفناه في الأختبارين اللي سويناها فوق وورينكم الفرق بين سيرفر الرياض وسيرفر لندن

========================================
========================================

اذا كان في هذا الموضوع شي من الصواب فهو من الله وان كان به خطاء فمن نفسي والشيطان

اي استفسار انا حاظر

دمتم بود
شيزون

 

 

[BUOMR]

تسلم يا غالي وتبقى مشكلة البنق بدون حل

 

 

[عـــــبـــــدالــــمــلك]

يعطيك العافيه والله اخيراً فهمتها

مشكور اخوي شيزون

 

 

[المتصفح 2005]

ا لله يعطيك العافية اخوي على الشرح الوافي الصراحة توني افهم هالنقطة وتاثيرها على الاتصال.

 

 

[العراب]

مشكور ويعطيك الصحة على الشرح

 

 

[عطر الحروف]

مشكور ياشيزون لكن عندي سؤال البتق يؤثر على البلاي ستيشن 3 مثل لعبة ريسيستانس

 

 

[S H E Z O N]

اقتباس: المشاركة الأصلية كتبت بواسطة عطر الحروف     مشكور ياشيزون لكن عندي سؤال البتق يؤثر على البلاي ستيشن 3 مثل لعبة ريسيستانس

هذا الرد ان دل على شي فأنه يدل انك ما قرأت الموضوع
لأني في الموضوع استخدمت مثال والمثال هذا كان لعبة ريزيستنس

العفوا اخواني جميعاً

 

 

[saee123]

مشكووووور على الشرح الرائع..

 

 

[Fegaru]

SHEZON

الله يسعدك دنيا واخره ويجمعنا واياك والمسلمين بالجنه

كوني مبتدىء كنت ادور معلومات عن البنق من فتره

وانت ماقصرت عسى ربي يوفقك

عندي سؤال بسيط

هل للـ ping علاقة بالتقطيع ؟

انا فهمت انه زمن الاستجابه

او الفترة بين اعطاء الامر والاستجابه

لكن هل لها علاقة بالتقطيع

والف الف شكر يالغاالي

 

 

[BlueTooth]

شكرا شيزون

 

 

[King Fire]

موضوع ممتاز جداً، جااااااا في وقته
5 نجوم وإلى الأمام سر

اقتباس: المشاركة الأصلية كتبت بواسطة الساهر $     SHEZON الله يسعدك دنيا واخره ويجمعنا واياك والمسلمين بالجنه كوني مبتدىء كنت ادور معلومات عن البنق من فتره وانت ماقصرت عسى ربي يوفقك عندي سؤال بسيط هل للـ ping علاقة بالتقطيع ؟ انا فهمت انه زمن الاستجابه او الفترة بين اعطاء الامر والاستجابه لكن هل لها علاقة بالتقطيع والف الف شكر يالغاالي

بعد إذن أخوي شيزون
إذا كان قصدك في الألعاب يا الساهر فنعم له علاقة بالتقطيع لو كان مرتفع جدا، لأنه حيصير اللعب شبه مستحيل، وفي النهاية السيرفر حيطردك!!

 

 

[Bam Beglo]

بيض الله وجهك اخوي شيزون

يعني سؤالي في قسم البلايستيشن فك موضوع كبير هنا

الله يعطيك العافيه اخوي

 

 

[Fegaru]

الف الف شكر kingfire

ولا يهون اخوي الغالي SHEZON

والى الامام

وحقاً موضوع يستحق

 

 

[جـسّـار]

من زمان وانا ابحث في قوقل احط كلمة بنق وابحث عن تعريف لها
بس باءت محاولاتي بالفشل
ماقصرت والله ياغالي كفيت ووفيت




بس الشاشة الي طلعت لي السوداء بعد ماعمل الاربع اختبارات
اختفت على طول قبل تظهر لي النتيجة
وكررتها كم مرة نفس الشي وش المشكلة ؟

 

 

[ANtrah]

بارك الله فيك

وموضوعك يستحق التقيم 10/10

ونسأل الله العفو والعافية....

 

 

[lMarWanl]

الله يعطيك العافية صراحة استفدة من الموضوع
============
عندي سؤال ؟؟
هل يفرق البنق في الــ pc عن ps3 لو السيرفر في نفس المنطقة مثلاً ؟؟؟ وهل اقدر اعرف البنق في نفس الـــ ps3 ....؟؟؟

 

 

[أحلام السنين]

أخي S H E Z O N

ابدااااااااااع وتميز وتألق

لك مني كل التقدير والإحترام
والف شكر لك

 

 

[دكتور / مجنون]

"نستنتج انه الأشياء اللي تحتاج سرعة عالية هي اللي يأثر عليها البنق ولكن فيه اللعاب ما يهم فيها البنق لأنه اللعبه لاتعتمد على من يعطي الأمر اولاً"

اللألعاب تعتمد على البنج اولاً وأخيراً

 

 

[abd402]

شكرا على الموضوع

 

 

[S H E Z O N]

السلام عليكم

بالنسبة للشباب اللي ردوا وشكروا الله يعطيكم العافيه ويخليكم كل واحد بأسمه

اخوي الساهر اخوي ملك النار ما قصر وجاوبك


نجي للأستفسارات

اقتباس: المشاركة الأصلية كتبت بواسطة ((( صهيل )))     بس الشاشة الي طلعت لي السوداء بعد ماعمل الاربع اختبارات اختفت على طول قبل تظهر لي النتيجة وكررتها كم مرة نفس الشي وش المشكلة ؟

اخوي معليش فيه شي نسيته وهو انك تكتب في التشغيل cmd على شان تفتح لك الشاشه السوداء سويت تعديل للموضوع وكتبتها شكراً لتنبيهك واهتمامك

اقتباس: المشاركة الأصلية كتبت بواسطة مروانm     عندي سؤال ؟؟ هل يفرق البنق في الــ pc عن ps3 لو السيرفر في نفس المنطقة مثلاً ؟؟؟ وهل اقدر اعرف البنق في نفس الـــ ps3 ....؟؟؟

ما يفرق اذا كان لهم نفس جهة التوصيل البنق اولاً واخيراً مثل ما ذكرت في الموضوع يعتمد على البنية التحتيه من نقطة الأرسال الى نقطة الوصول

الا اذا فيه مشاكل في كرت الشبكه حقك او سلكك هذا عاد شي اخر

اقتباس: المشاركة الأصلية كتبت بواسطة دكتور / مجنون     "نستنتج انه الأشياء اللي تحتاج سرعة عالية هي اللي يأثر عليها البنق ولكن فيه اللعاب ما يهم فيها البنق لأنه اللعبه لاتعتمد على من يعطي الأمر اولاً" اللألعاب تعتمد على البنج اولاً وأخيراً

كل شي يعتمد على البنق لكن فيه شي البنق لو كان عالي مستحيل تقدر تلعب لأنه اجزاء الثانية راح تفرق معك وفيه اللعاب زي جينرالز كلها تعتمد على اعطاء الأوامر هذي ما راح تشوف للبنق تأثير كبير فيها

فيه اللعاب زي ما اذكر فاينل فانتسي تمشي في الخريطه ومعك أللاف البشر
تقابل واحد وبيصير بينك وبينه قتال
نظام القتال في فاينل فانتسي هو انك تعطي امر والخصم يرد عليك بأمر

حتى لو جاء دورك ورحت جبت لك بيبسي من الثلاجه ورجعت ما راح يأثر شي لأنه اللعبه بتصير تنتظر اعطائك الأمر

زي مثلاً لعبة WOW هذي اهمية السرعة فيها اهم من البنق ولكن البنق مهم ما قلنا انه ماله اي قيمه


ومشكور على اضافتك اللي ان شاء الله الكثير راح يستفيد منها

وعقبال ما نشوف البنق مع سيرفرات في امريكا تساي 12 ms