كيفية التعامل مع مريض السرطان ...

[! alzaeem]

السلام عليكم ورحمة الله وبركاته
أسعد الله اوقاتكم بكل خير
ياجماعة الخير .. جدي مصاب بالسرطان ( اللهم اشفه ومرضى المسلمين والمسلمات آمين )

الورم في الفك يعني في مكان حساس واخذ جلسات الكيماوي وتساقط شعره ونفسيته اندمرت
سبحان الله ياجماعة كان نشيط ومستصح لكن قدر الله اقوى من كل شي ..

المهم هالفترة وقفوا له الكيماوي عشان جلسات الليزر تبتدي الاسبوع الجاي ,, وابتدا الورم ينتفخ في مكان الفك

خلاصة الموضوع ان جدي نفسيته دمار يقول لعياله خلاص خلوني اموت في بيتي وانا مرتاح
يعلم الله اننا نحاول نطلعه من الجو اللي عايش فيه ونزوره كلنا ونسولف ونضحك وهو ينبسط معنا لكن شوي ويسرح ويفكر

قريت في مرات كثيرة ان السرطان مرض نفسي اكثر من عضوي ولازم نفسيه حديد علشان يتغلب باذن الله على هذا المرض

ارجو منكم الدعاء لجدي يا اخوان ,, واتمنى تعلموني بطريقة التعامل معه لعل وعسى نقدر نسوي له شي ونطلعه من الجو الكئيب اللي عايش فيه

اللهم اشف مرضانا ومرضى المسلمين والمسلمات واسال الله العلي القدير الا يريكم اي مكروه في انفسكم واهليكم

 

 

[hmeed.9]

اقرب شي سفروه اسبوع اسبوعين ان شاء الله بتلقى تحسن

ومايشوف شر ان شاء الله

 

 

[كتو موتو]

الله يعطية الصحة والعافية ويشافيه ..
للأسف ياخوي ابوي وعمتي ماتوا من نفس هالمرض الله يرحمهم ويغفر لهم
وبصراحة قد ماسوينا وفعلنا من ترفيه مافي نتيجة ينبسطون خمس دقايق وياليت الضحك من قلب وتلقاهم ساعة في فلك لحالهم !!
ابوي الله يرحمة مات مبطون والمرض ما اخذ وقت معاه تقريبا شهر الى شهرين لأنه رفض الكيماوي ..
لكن عمتي طالت مدتها والمشكلة قد مانحاول نعدل نفسيتها نبلش في الناس اللي تزورها ونظرات التعاطف والتراحم ..
لدرجة فيه حريم قالوا لها بهذا المنطق فلوسك بتعطينها مين اذا رحتي
المرض هذا متعارف بين الناس يعني اي شخص يجيه السرطان نفسيا يعرف انها آخر ايامه ..
.
لكن حاولوا تاخذونه للحرم المكي ولا النبوي يمكن ينشرح خاطرة شوي واوصيك بماء زمزم وبالقرآن
الله لايوريكم فيه مكروه ..

 

 

[! alzaeem]

اقتباس: المشاركة الأصلية كتبت بواسطة hmeed.9     اقرب شي سفروه اسبوع اسبوعين ان شاء الله بتلقى تحسن ومايشوف شر ان شاء الله

الشر مايجيك يارب
وديناه مكه في رمضان اخذ له 3 ايام هناك وارتاحت نفسيته الحمد لله
لكن المشكله الحين هو في المستشفى والنفسيه ماش .. الله يعين

اقتباس: المشاركة الأصلية كتبت بواسطة كتو موتو     الله يعطية الصحة والعافية ويشافيه .. للأسف ياخوي ابوي وعمتي ماتوا من نفس هالمرض الله يرحمهم ويغفر لهم وبصراحة قد ماسوينا وفعلنا من ترفيه مافي نتيجة ينبسطون خمس دقايق وياليت الضحك من قلب وتلقاهم ساعة في فلك لحالهم !! ابوي الله يرحمة مات مبطون والمرض ما اخذ وقت معاه تقريبا شهر الى شهرين لأنه رفض الكيماوي .. لكن عمتي طالت مدتها والمشكلة قد مانحاول نعدل نفسيتها نبلش في الناس اللي تزورها ونظرات التعاطف والتراحم .. لدرجة فيه حريم قالوا لها بهذا المنطق فلوسك بتعطينها مين اذا رحتي المرض هذا متعارف بين الناس يعني اي شخص يجيه السرطان نفسيا يعرف انها آخر ايامه .. . لكن حاولوا تاخذونه للحرم المكي ولا النبوي يمكن ينشرح خاطرة شوي واوصيك بماء زمزم وبالقرآن الله لايوريكم فيه مكروه ..

الله يرحمهم ويسكنه فسيح جناته امين يارب العالمين

والله ياخوي انك فتحت موضوع مهم جدا
اللي يزورونه يحطمونه تحطيم مو طبيعي
واحد يقول والله لي اخو صار له نفس اللي فيك ومات الله يرحمه
والثاني يقول والله السرطان مالقوا له علاج ممكن يكتشفونه بعد 3 سنوات
ولا يجيك واحد من الديرة يعلمه باخبار مثل وجهه كلها وفيات ومشاكل وحوادث
اعوذ بالله من الشيطان الرجيم
الله يجزاك خير ولا يريك مكروه في قريب وحبيب

 

 

[valmer]

الله يشفيه ويقومه لكم بالسلامة

واحد من قرايبنا كان فيه سرطان في الحلق وجلس يتعالج منه كم سنة والحين ما فيه الا العافية الحمدلله

مثل ما قلت انت أهم شيء عند المريض تكون نفسيته زينة لأنها نص العلاج, اذا اللي يزورونه من النوعية اللي كل ما جوا قالوا فلان عطاك عمره وعلان بيموت لا تدخلونهم عليه, اذا جوا يزورونه قولوا لهم الدكاترة مانعين الزيارة عنه

الضعف والهزال هذا من تأثير الكيماوي


اضحكوا وسولفوا معه مثل هذا

 

 

[MAJDMSA]

وده مكه وان شاء القدير يطيب
الله يشفيه

ايه كم عمره هو
هل هو مخرف ولا تمام ممتاز ولاكن قدر الله وما شاء فعل

اقول انتم لاتعطونه الى الاخبار الحلوة
ونتبهو

انا خالتي العام الفايت توفت بالصرطان الله لايوريكم مكروه
وكان يا هي يا الولد الي في بطنها يا بتر العضو

والنفسية *** مافيه امل بعدها طاحت 60 كيلو ونقص الدم وتوزع الخبيث في جسمها وما صارت تقدر تبلع ريقها ولا تتكلم وتوفت الله يسكنها الجنة امين

بس انا اقول خلوه يكثر من الاستغفار ويتصدق بالخمس والعشر الاف وخلوه المكان الي هو به ممتاز وريح مو غرف المستشفا الي تمرضه

والدكتور لايكلمه مهما كان خلو اخوكم الكبير يكلمه

ونسوه وفرحو صدرة وخلوه يقوم اليل ويكثر من العبادة لا تمنعونه من شي الي يشتهيه عطوه وماعليكم من نصايح الدكتور الغذائية تراها ما تنفع

الله يشفيه

 

 

[كتو موتو]

اقتباس: المشاركة الأصلية كتبت بواسطة valmer     اذا اللي يزورونه من النوعية اللي كل ما جوا قالوا فلان عطاك عمره وعلان بيموت لا تدخلونهم عليه, اذا جوا يزورونه قولوا لهم الدكاترة مانعين الزيارة عنه

فالمر مو بالساهل تمنع الناس خصوصا اذا كانت صله القرابة بالحيل ..
حتى لو سلمت من اللسان ماتسلم من النظرات غير اللي يشوفون وضع الشخص ويبكون بخفيه لكن واضح البكاء
والله صعبة ياخوي الكلام اصعب من التطبيق ..

 

 

[valmer]

اقتباس: المشاركة الأصلية كتبت بواسطة كتو موتو     فالمر مو بالساهل تمنع الناس خصوصا اذا كانت صله القرابة بالحيل .. حتى لو سلمت من اللسان ماتسلم من النظرات غير اللي يشوفون وضع الشخص ويبكون بخفيه لكن واضح البكاء والله صعبة ياخوي الكلام اصعب من التطبيق ..

أكيد لكن وش تسوي اذا ما بيدك حل غيره

قريبنا اللي صابه المرض مع انه شباب وعمره 27 الناس ما تركوه في حاله كل من زاره قال له انت المسلم والموت احسن للمسلمين من الحياة ومن هالكلام حاولوا الدكتور وابوه يفهمون هالخلق يوم عجزوا نقله أبوه للرياض وخلاه سنتين هناك ما احد يزوره غيره

 

 

[! alzaeem]

اقتباس: المشاركة الأصلية كتبت بواسطة valmer     الله يشفيه ويقومه لكم بالسلامة واحد من قرايبنا كان فيه سرطان في الحلق وجلس يتعالج منه كم سنة والحين ما فيه الا العافية الحمدلله مثل ما قلت انت أهم شيء عند المريض تكون نفسيته زينة لأنها نص العلاج, اذا اللي يزورونه من النوعية اللي كل ما جوا قالوا فلان عطاك عمره وعلان بيموت لا تدخلونهم عليه, اذا جوا يزورونه قولوا لهم الدكاترة مانعين الزيارة عنه الضعف والهزال هذا من تأثير الكيماوي اضحكوا وسولفوا معه مثل هذا

يعطيك الف عافيه ياخوي والله يجزاك خير

اقتباس: المشاركة الأصلية كتبت بواسطة MAJDMSA     وده مكه وان شاء القدير يطيب الله يشفيه ايه كم عمره هو هل هو مخرف ولا تمام ممتاز ولاكن قدر الله وما شاء فعل اقول انتم لاتعطونه الى الاخبار الحلوة ونتبهو انا خالتي العام الفايت توفت بالصرطان الله لايوريكم مكروه وكان يا هي يا الولد الي في بطنها يا بتر العضو والنفسية *** مافيه امل بعدها طاحت 60 كيلو ونقص الدم وتوزع الخبيث في جسمها وما صارت تقدر تبلع ريقها ولا تتكلم وتوفت الله يسكنها الجنة امين بس انا اقول خلوه يكثر من الاستغفار ويتصدق بالخمس والعشر الاف وخلوه المكان الي هو به ممتاز وريح مو غرف المستشفا الي تمرضه والدكتور لايكلمه مهما كان خلو اخوكم الكبير يكلمه ونسوه وفرحو صدرة وخلوه يقوم اليل ويكثر من العبادة لا تمنعونه من شي الي يشتهيه عطوه وماعليكم من نصايح الدكتور الغذائية تراها ما تنفع الله يشفيه

عمره تقريبا 60 ماشاء الله عليه نشيط وحكيم لكن الحمد لله على كل حال وان شاء الله يرجع لنا مثل اول واقوى
والله يجزاك خير ويوفقك

اقتباس: المشاركة الأصلية كتبت بواسطة كتو موتو     فالمر مو بالساهل تمنع الناس خصوصا اذا كانت صله القرابة بالحيل .. حتى لو سلمت من اللسان ماتسلم من النظرات غير اللي يشوفون وضع الشخص ويبكون بخفيه لكن واضح البكاء والله صعبة ياخوي الكلام اصعب من التطبيق ..

هالاشكال يبي لها واحد وجهه مغسول بمرق وراح نشوف لهم حل ان شاء الله مثل ماقال اخوي فالمر افضل شي التصريف

 

 

[الاقزام السبعة]

الله يشفيه ويشفي مرضى المسلمين والله يكفينا والمسلمين منه

 

 

[gxgx14]

اسمح لي بها الكلمتين بس جدك عنده ضعف ايمان شوي

لو اقول لك وش فيني الان ووش عانيت بالثلاث سنين اللي راحت ان تقول وشلون هذا يضحك للحين !!

طلعت اورام من ظهري وصدري وراسي ورمين الاورام حميده بس اثرها قوي على الاعصاب فقدت سمعي وظهري ورقبتي تجيني فيها الام وفخذي الايمن تجيني فيه الام مدري وشي كأن احد يغرس ابر فيها لدرجة اني ما اقدر انام الليل وانا توني عمري 19 سنه ولا كملت دراستي ولا سويت شي بحياتي بس ما افكر بشي ابدااااا ولا افكر بنفسي لاني بتعب نفسي على الفاضي

مره انا مطنش وساحب سيفون على الدنيا وعايش ما همني اموت ولا لا ولا افكر بمرضي ابوي يعاني نفسيا مرضي وانا والله منب لم السالفه ولا افكر لدرجة ان اهلي يكلموني ويقولون لا تتأثر نفسيتك وخل ايمانك بالله قوي وانا اناظرهم نظرات استغراب من قال لكم اني اشيل هم !!! يحسبونني اضحك عشانهم

ووالله ما عندي اي فكره للتعامل مع جدك لاني ما قد قابلت واحد مريض زي هالمرض الا اخوي الوحيد الله يرحمه يا رب وكنت صغير مره يوم كان مريض ولا اذكر وشلون يتعاملون معه

 

 

[أبوريهم السقف]

اهم شي لا تكذب عليه

 

 

[hoax]

ذكرتني بابوي الله يطول بعمره ويعطيه الصحة !!! كان عنده ورم بظهره !!! !!! وقالنا انه " ديسك " !!! بعد 6 شهور عرفنا انه ورم ,,, والحمدلله استأصلوه وطلع مجرد عضلة !!! والحين ما به الا العافية وما حد خالص من شره XD

 

 

[أبو فاطمة]

لاحول ولا قوة إلا بالله
اسال المولى العلي القدير أن يشفي جدك شفاء لا يغادر سقما
وأن يشفي جميع مرضى والمسلمين
وأن لايرينا ولا يريكم أي مكروه
والله يااخي سفروه لمكة ياخذ عمرة ويشرب ويتروش من زمزم
وبعدين على المدينة وخلوه يجلس فيها فترة وراح تشعروا بفرق كبير

 

 

[هالبينو]

جدي مات بالسرطان الله يرحمه

واخوه مات بنفس المرض الله يبعد عننا الامراض هذي ويبعدها عن حبايبنا وكل من يعز علينا

 

 

[وليد زمانه]

مايشوف شر جدك ياغالي وربي يقومه بسلامه احسن حل عشان تطلعونه من الحاله النفسيه الي هو فيهاا

جيبوه عندنا في مكة خليه يطوف ويصلي ركعتين ويشرب زمزم واذا فيه احد متفرغ ماعنده شغل خليه يجلس معاه في مكة اسبوعين

ثلاث وأن شاء الله حالته بتتحسن وترجع زي اول واحسن بعد وبل مره يفتك من الناس الي تجيب الهم والغم

يعني الواحد تعبااان وحالته الله عالم بهاا وهذول فلان فيه ويقولون مافي علاج بل عكس بطريقه هاذي بيخلوونه

يتعب زيااده ويفكر وراح تدهور حالته كثير ,,

الله يشفيه ويعافيه ويخليه لكم ...

 

 

[وليد زمانه]

اقتباس: المشاركة الأصلية كتبت بواسطة gxgx14     اسمح لي بها الكلمتين بس جدك عنده ضعف ايمان شوي لو اقول لك وش فيني الان ووش عانيت بالثلاث سنين اللي راحت ان تقول وشلون هذا يضحك للحين !! طلعت اورام من ظهري وصدري وراسي ورمين الاورام حميده بس اثرها قوي على الاعصاب فقدت سمعي وظهري ورقبتي تجيني فيها الام وفخذي الايمن تجيني فيه الام مدري وشي كأن احد يغرس ابر فيها لدرجة اني ما اقدر انام الليل وانا توني عمري 19 سنه ولا كملت دراستي ولا سويت شي بحياتي بس ما افكر بشي ابدااااا ولا افكر بنفسي لاني بتعب نفسي على الفاضي مره انا مطنش وساحب سيفون على الدنيا وعايش ما همني اموت ولا لا ولا افكر بمرضي ابوي يعاني نفسيا مرضي وانا والله منب لم السالفه ولا افكر لدرجة ان اهلي يكلموني ويقولون لا تتأثر نفسيتك وخل ايمانك بالله قوي وانا اناظرهم نظرات استغراب من قال لكم اني اشيل هم !!! يحسبونني اضحك عشانهم ووالله ما عندي اي فكره للتعامل مع جدك لاني ما قد قابلت واحد مريض زي هالمرض الا اخوي الوحيد الله يرحمه يا رب وكنت صغير مره يوم كان مريض ولا اذكر وشلون يتعاملون معه

الله يشفيك ويعافيك ياغاالي وماتشوف شر بحياتك وربي يسعدك ويوفقك

 

 

[عقرب الليل]

حاولوا تاخذونه للحرم المكي ولا النبوي يمكن ينشرح خاطرة شوي واوصيك بماء زمزم وبالقرآن
الله لايوريكم فيه مكروه ..


والله يشفيه يارب

 

 

[a14x]

الله يشفيه ويشفي مرضى المسلمين

 

 

[kurdi]

الله يشفيه ويشفي مرضى المسلمين